Maroc yagaragaje umwihariko w’umubano n’u Rwanda, uruhare rwayo muri Afurika n’ahazaza h’ubufatanye

Yanditswe na Rabbi Malo Umucunguzi
Kuya 24 Ukuboza 2019 saa 04:08
Yasuwe :
0 0

Maroc ikomeje kuza imbere mu bihugu bya Afurika byakira abanyeshuri benshi bakomoka kuri uyu mugabane, biturutse ahanini ku buryo yamaze kubaka urwego rw’uburezi, ku buryo magingo aya ari igihugu kirimo amashuri atanga ubumenyi buhanitse.

Ni ibikorwa iki gihugu gihamya ko ari ingirakamaro, kuko abantu bize neza babasha kwihangira imirimo, umugabane wose wahumeka kuko ubushomeri bwongera ibyago byinshi byo kujya mu biyobyabwenge, iterabwoba cyangwa izindi ngaruka ziterwa n’abimukira.

Umuyobozi Mukuru w’Ikigo gishinzwe Ubutwererane Mpuzamahanga muri Maroc (Agence Marocaine de Coopération Internationale, AMCI), Amb Mohamed Methqal, avuga ko umubano wa Maroc n’ibihugu byo muri Afurika yo munsi y’ubutayu bwa Sahara umaze igihe kirekire. Ubwo iki gihugu cyari kiyobowe n’umwami Hassan II, mu 1986 nibwo hashyizweho icyo kigo gihabwa inshingano zo kubaka gahunda z’ubutwererane hagati y’ibihugu bitandukanye.

Ati “Niyo mpamvu kuva icyo gihe ku isonga twahise dutangira kwibanda ku kubaka ubushobozi hagamijwe iterambere rusange ry’abaturage. Mu myaka nibura 20 ishize, bitewe n’icyerekezo cy’umwami Mohammed VI washyize Afurika imbere muri politiki yacu mpuzamahanga, hagamijwe gusangira ubunararibonye.”

Ibyo ngo biri no mu byatumye umwami wa Maroc akora ingendo zisaga 50 mu binyacumi bibiri bishize, azigirira mu bihugu bisaga 30 byo muri Afurika.

Methqal yagize ari “Kandi iyo asuye ibi bihugu bya Afurika ntabwo amara iminsi ibiri, amara ibyumweru kugira ngo hanozwe imishinga itandukanye.”

Ni muri izo ngendo ku wa 18 Ukwakira 2016 Umwami Mohammed VI yageze mu Rwanda mu ruzinduko rw’iminsi itanu, rwaranzwe no gusinya amasezerano y’ubutwererane mu nzego zinyuranye, arimo 19 arebana n’ishoramari mu mabanki, ubutwererane n’imikoranire isesuye hagati yabyo, korohereza abafite pasiporo z’abadipolomate kuva mu gihugu bajya mu kindi n’andi.

Hasinywe amasezerano y’ubufatanye mu by’ubuhinzi kuwa 20 Ukwakira 2016, kuwa 21 Ukwakira hasinywa amasezerano hagati y’Umuryango Imbuto Foundation n’Umuryango w’Umwami Mohammed VI wa Maroc ugamije iterambere rirambye, azareba iterambere ry’inzego z’ ubuzima uburezi, ubukungu n’iterambere ry’urubyiruko n’abagore.

Muri Werurwe nabwo u Rwanda na Maroc byashyize umukono ku masezerano 12 y’ubufatanye hagati y’ibihugu byombi, yasinyiwe i Rabat muri Maroc mu ruzinduko rw’akazi uwari Minisitiri w’Ububanyi n’Amahanga w’u Rwanda, Dr Richard Sezibera yagiriyeyo.

Amb Methqal avuga ko mu kubaka umubano na Afurika, uwa Maroc n’u Rwanda wo ufite umwihariko bitewe n’ubushake bw’abayobozi babyo. Ni abayobozi bubatse ibihugu bifite imikorere igira ibyo ihuriraho, umutekano, isuku no guteza imbere ishoramari.

Methqal ati “Umubano mu bya politiki uhagaze neza kubera umubano hagati y’Umwami Mohammed VI na Perezida Paul Kagame nawo ari mwiza cyane, mu byumweru bike bishize nibwo Ambasade y’u Rwanda hano yatangiye gukora, dufite ambasade mu Rwanda ubu imaze imyaka itatu kuko yatangiye mu 2016, hari amasezerano menshi yagiye asinywa hagati y’ibihugu byombi kandi tumaze kubona umubare munini w’abayobozi ndetse n’abikorera bakora ingendo hagati y’ibihugu byombi.”

“Mu minsi ishize mu Rwanda mwagize igikorwa kinini kijyanye n’ubuhinzi kandi hari ibigo binini byo muri Maroc by’abikorera mu bijyanye n’ubuhinzi byacyitabiriye bishaka gutsura umubano, dufite icyizere ku bufatanye bwa Maroc n’u Rwanda kandi hari byinshi twiteze kuko u Rwanda rushobora kubera Maroc irembo ryinjira muri Afurika y’Iburasirazuba n’Amajyepfo, ndetse na Maroc yabera u Rwanda irembo ryinjira mu Burayi bw’amajyepfo ndetse no muri Afurika y’Iburengerazuba.”

Uruhare Maroc mu burezi bwa Afurika

Kugeza ubu Maroc iri mu bihugu bitanga buruse nyinshi ku banyafurika kuri uyu mugabane, kandi amashuri yaho ari mu yubashywe cyane cyane mu mashami ajyana na siyansi na engineering. Muri uyu mwaka iki gihugu kibara ko gifite abanyeshuri ibihumbi 14 baturuka mu bihugu 111 bitandukanye. Abo barimo ibihumbi 12 b’Abanyafurika bakomoka mu bihugu 47.

Muri abo kandi harimo abanyeshuri b’abanyarwanda 61, barimo abashya bagera kuri 24, boherejweyo mu mashami atandukanye.

Mathqal yagize ati “Ubu butwererane mu bijyanye n’uburezi si ubugenewe igice kimwe cya Afurika, ni amahirwe asangiwe n’uturere twose twa Afurika. Kandi 90% by’Abanyafurika bigira kuri buruse z’Ubwami bwa Maroc, bivuze ko uyu mwaka dufite ibihumbi 11 by’abanyeshuri b’abanyafurika bigira kuri izo buruse.”

Abo banyeshuri kandi bahabwa amahirwe yo kugera no ku mpamyabumenyi z’ikirenga, byose bigakorwa hagamijwe ko umugabane wa Afurika wishakamo ibisubizo, kuko inzira ibihugu byose zanyuzemo bijya gusa.

Agaruka ku bunararibonye Maroc ifite isangiza Afurika, Metqual yakomeje ati “Nk’iyo tuvuze ibijyanye n’amashanyarazi, ibyo bibazo twari tubifite mu myaka 30 ishize, uyu munsi amashanyarazi amaze kugera ku baturage nibura 99%, dushobora gusangiza ubunararibonye abavandimwe bacu muri Afurika, kuko bamwe ibibazo bafite natwe twari tubirimo, kimwe n’ingufu.”

“Mu myaka ishize nta ngufu zisubira twagiraga muri Maroc nk’izikomoka ku muyaga cyangwa izuba, uyu munsi dufite uruganda rwa mbere runini muri Afurika rutanga ingufu zikomoka ku zuba rwa rwa Noor, dufite inganda zitanga ingufu z’umuyaga, tumaze kubaka ubushobozi butuma dukorana n’abavandimwe bacu no kuba twabasangiza ubunararibonye ku buryo twatangiriye ku busa muri ibyo bibazo, tukaza kugera hano. Ubu nk’igiciro cy’ingufu zisubira dukora hano muri Maroc ni kimwe mu bihendutse ku Isi, kandi turi muri Afurika, biduteye ishema.”

Maroc muri AU

Mu nama ya 28 y’Abakuru b’ibihugu yabereye ku cyicaro cya AU i Addis Ababa muri Ethiopia kuwa 30 Mutarama, nibwo abanyamuryango b’uyu muryango bemeye kongera kwakira Maroc mu muryango yivanyemo mu 1984, nyuma y’ibiganiro n’itora ryabereye mu muhezo.

Maroc yatangiye gusaba kugaruka muri uyu muryango mu nama ya 27 y’Abakuru b’Ibihugu bya Afurika yabereye i Kigali, aho yavugaga ko ikeneye gusubirana umwanya yahoranye kuri uyu mugabane. Ni umwanya yiyambuye hakiriho OUA, yari imaze kwakira Repubulika ya Sahara nk’umunyamuryango wuzuye kandi Maroc iyifata nk’intara yayo ndetse ko itaranabona ubwigenge busesuye.

Amb Methqal avuga ko Maroc ikomeje kugira uruhare muri uyu muryango, aho ubu ari kimwe mu bihugu bya mbere bitangamo amafaranga menshi mu ngengo y’imari, ndetse muri uyu mwaka niyo iyoboye Akanama ka AU gashinzwe amahoro n’umutekano.

Ati “Turimo kugira uruhare muri gahunda y’iterambere ry’umugabane kandi turifitemo inyungu, kandi ntabwo twarindiriye ko Maroc igaruka muri AU ngo tubone kubigiramouruhare. No mu gihe hafatwaga umwanzuro ko Maroc iva muri OUA, yakomeje kugira uruhare mu bikowa bireba umugabane by’iterambere, nk’ubu dufite gahunda y’amasomo ku bihugu byose bya Afurika, kandi twanakoranye n’ibihugu 47 tumaze no kuvamo. Ubu twagarutse ho rero dutanga umusanzu uruseho kuko ubu turi imbere mu birimo gukorwa.”

Amb Methqal yanavuze ko igihugu cye gishyigikiye bikomeye gahunda y’isoko rusange rya Afurika, AfCFTA, kuko rizateza imbere ukwishyira hamwe k’uyu mugabane, ndetse rizamure ubukungu bw’ibihugu n’ubuhahirane, ndetse byoroshye ingendo ku batuye uyu mugabane.

Umuyobozi Mukuru w’Ikigo gishinzwe Ubutwererane Mpuzamahanga muri Maroc Amb Mohamed Methqal, ashimangira ko umubano w'ibihugu byombi ari ntamakemwa
Ubwo Umwami wa Maroc aheruka mu Rwanda, uruzinduko rwe rwasinyiwemo amasezerano menshi hagati y'ibihugu byombi
Umwami Mohammed VI aheruka mu Rwanda mu ruzinduko rwasize amateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .