00:00:00 IGIHE NETWORK KN KINYARWANDA EN ENGLISH FR FRANCAIS

Maria Malagardis yashenguwe no gushinjwa guharabika Ntiwiragabo ukekwaho Jenoside

Yanditswe na IGIHE
Kuya 22 Mutarama 2023 saa 02:02
Yasuwe :

Umunyamakuru wa La Libération, Maria Malagardis, yasabiwe gucibwa amande angana n’amayero 10,000, azira umuhate we mu gusaba ko Col Aloys Ntiwiragabo aburanishwa n’inkiko z’u Bufaransa ku ruhare rwe muri Jenoside yakorewe Abatutsi.

Urukiko rw’i Paris ku wa Kane tariki 19 Mutarama nibwo rwumvise ubwiregure bwa Malagardis, warezwe na Ntiwiragabo amushinja kumuharabika, ngo kuko yamwise ‘Umunazi’ w’Umunyafurika’.

Ikirego cya Col Ntiwiragabo wahoze ashinzwe ubutasi bwa gisirikare mbere ya Jenoside yakorewe Abatutsi, yagishingiye ku butumwa bwanyujijwe kuri Twitter nyuma yo gutangaza inkuru ku rubuga rw’ikinyamakuru cya Médiapart ivuga ko Ntiwirigabo Aloys ushinjwa uruhare muri Jenoside yidegembya mu Bufaransa.

Iyo nkuru yo muri Nyakanga 2020, yagaragazaga ko uyu mugabo yihishe ubutabera imyaka myinshi nyamara atuye mu gace kazwi nka banlieue d’Orléans.

Nyuma y’iyo nkuru yatangajwe, uyu munyamakuru yasubije mu buryo busanzwe bwo gutanga igitekerezo kuri iyo nkuru agira ati "Umu-Nazi w’Umanyafurika mu Bufaransa? Hagira unsobanurira?".

Ntiwiragabo kandi yareze umwanditsi w’ikinyamakuru Médiapart, Théo Englebert wanditse iyo nkuru yatumye Maria Malagardis amwibasira ngo akurikiranwe n’ubutabera, kubera kumuharabika.

Maria Malagardis wanditse cyane kuri Jenoside yakorewe Abatutsi, yabwiye urukiko ko nk’umunyamakuru, kugaragaza Ntiwiragabo nk’ukekwaho Jenoside atari uguca inka amabere, hashingiwe ku mwanya yari afite muri Leta yakoze ikanashyira mu bikorwa Jenoside.

Yagize ati "Nshobora kuba ari njye munyamakuru usigaye mu Bufaransa wakurikiranye Jenoside yakorewe Abatutsi. Ntiwiragabo ntabwo yigeze aburana bityo aracyafatwa nk’umwere ariko umwanya yari arimo mu 1994 ni wo utuma akekwa."

Yavuze ko gukoresha ijambo "Umunazi w’umunyafurika" ari igereranya rishingiye ku nyandiko nyinshi z’abashakashatsi, zagiye zigaragaza ko Jenoside yakorewe Abatutsi mu Rwanda ifite byinshi ihuriyeho n’iyakorewe Abayahudi ikozwe n’Abanazi.

Maria Malagardis asanga kuba abashakashatsi batandukanye baragaragaje ihuriro ry’izo Jenoside, kugereranya abayikoze ushaka kumvikanisha uburemere bwayo nta kosa ririmo.

Ati "Hari ibimenyetso byinshi izo Jenoside zihuje nko guha akato Abayahudi no kugaha Abatutsi mbere y’uko zose ziba. Tweet nanditse igaragaza umwe mu bigeze kuba muri Leta ifatwa nk’iy’Abanazi. Tuvuga Abanazi tudashaka kuvuga ko runaka afite amaraso mu biganza ahubwo tugaragaza uwo ari we wese wigeze kuba mu butegetsi bwagenderaga ku mahame y’Abanazi.”

Me Charles-Emmanuel Soussen wunganira Maria Malagardis, yavuze ko atari ubwa mbere ukekwaho uruhare muri Jenoside yakorewe Abatutsi agereranyijwe n’Abanazi.

Yatanze urugero rwa Felicien Kabuga uri kuburanishwa n’Urukiko Mpanabyaha mpuzamahanga, kubera uruhare rwe mu gushinga radiyo RTLM, aho yagereranyijwe na Joseph Goebbels wahoze ari Minisitiri ushinzwe icengezamatwara muri Leta y’Abanazi.

Maria Malagardis yagaragaje ko "biteye isoni kuba mpagaze aha nshinjwa ibyaha kubera ko nagerageje gutanga umusanzu wanjye ku mateka."

Me Benjamin Chouai wunganira Ntiwiragabo, we yavuze ko kwita umukiliya we Umunazi kandi atarigeze akurikiranwa n’inkiko, biteye ikibazo.

Ngo nubwo umukiliya we yimwe ibyangombwa byo kuba mu Bufaransa kubera ibyaha bya Jenoside akekwaho, akaba yaranashyiriweho impapuro zo kumuta muri yombi, Me Chouai yavuze ko ataragezwa mu nkiko mu buryo buzwi, bityo agifatwa nk’umwere.

Yasabye urukiko guca Maria Malagardis amande y’ibihumbi icumi by’amayero, nk’indishyi y’akababaro.

Ntiwiragabo w’imyaka 75, nyuma yo guhunga u Rwanda ubwo Jenoside yakorewe Abatutsi yari imaze guhagarikwa, yagiye muri Repubulika Iharanira Demokarasi ya Congo aho yagize uruhare mu ishinjwa ry’umutwe wa FDLR.

Yashakishijwe kenshi n’abashinjacyaha b’urukiko mpanabyaha mpuzamahanga rwashyiriweho u Rwanda (TPIR), ngo abazwe ku ruhare rwe muri Jenoside yakorewe Abatutsi.

Akekwaho kuba hagati ya 1990 na Nyakanga 1994 ari umwe mu bagize uruhare mu ikorwa ry’amalisiti y’abatutsi bagombaga kwicwa ndetse n’abandi babaga batavuga rumwe na Leta. Uyu mugabo kandi ashinjwa kugira uruhare mu bwicanyi.

Nubwo nta byangombwa bimwemerera kuba mu Bufaransa aho yageze mu 2011, u Bufaransa bwanze kumwohereza mu Rwanda. Mu 2020 yongeye gusaba ubuhungiro barabumwima.

Biteganyijwe ko umwanzuro ku byo Ntiwiragabo ashinja Malagardis uzafatwa kuwa 15 Werurwe 2023.

Ntiwiragabo amaze igihe aba mu Bufaransa nyamara ntiyigeze akurikiranwa mu nkiko
Maria Malagardis yagaragaje ko bibabaje kuba akurikiranywe azira ko yasabye ko ukekwaho Jenoside akurikiranwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .