00:00:00 IGIHE NETWORK KN KINYARWANDA EN ENGLISH FR FRANCAIS

Manzi watsinze muri Future Leaders Awards yiyemeje impinduka mu mibereho y’abatishoboye

Yanditswe na Ntabareshya Jean de Dieu
Kuya 17 April 2022 saa 12:43
Yasuwe :

Umunyarwanda Manzi Guevara, witabiriye irushanwa rya Future Leaders Awards aho yahuriyemo n’abandi bakiri urubyiruko bo hirya no hino muri Afurika banafite imishinga itanga igisubizo ku baturage b’ibihugu byabo yiyemeje guharanira impinduka ku mibereho myiza y’abatishoboye binyuze mu mushinga we.
Byari ku nshuro ya mbere Umunyarwanda abashije gutsinda muri ayo marushanwa yitabiriwe n’urubyiruko rusaga 800 ruturutse mu bihugu bya Afurika ariko hagahembwa 10 ba mbere bafite imishinga ifatika ari (...)

Umunyarwanda Manzi Guevara, witabiriye irushanwa rya Future Leaders Awards aho yahuriyemo n’abandi bakiri urubyiruko bo hirya no hino muri Afurika banafite imishinga itanga igisubizo ku baturage b’ibihugu byabo yiyemeje guharanira impinduka ku mibereho myiza y’abatishoboye binyuze mu mushinga we.

Byari ku nshuro ya mbere Umunyarwanda abashije gutsinda muri ayo marushanwa yitabiriwe n’urubyiruko rusaga 800 ruturutse mu bihugu bya Afurika ariko hagahembwa 10 ba mbere bafite imishinga ifatika ari naho Manzi Guevara yaje kwisanga.

Abo 10 bahembwa bahabwa nibura ibihumbi 10$ nk’igihembo cyo gushimirwa ibyo umaze gukora no guterwa ingabo mu bitugu mu kwagura ibikorwa byawe mu gihe uwa mbere we hiyongeraho n’ibihumbi 25$ by’igihembo gikuru.

Manzi Guevara nawe yaje muri abo 10 ba mbere ahabwa amafaranga asaga miliyoni 10 Frw aho yizeye ko agiye kumufasha guteza imbere umushinga n’ibikorwa by’urukundo yari asanzwe akora.

Ubusanzwe Manzi afite umushinga wo gufasha abaturage bafite ubushobozi buke kwishyura ubwisungane mu kwivuza aho yifuzaga kwishyurira mituweli imiryango 1000 no gufasha abantu b’amikoro make mu gihe cya Covid-19.

Uyu ni na wo mushinga yatanze ndetse uza gutoranywa mu mishinga 10 ya mbere yahembwe nk’itanga icyizere cyo gufasha no guteza imbere sosiyete ba nyirayo babarizwamo, anahabwa inkunga y’asaga miliyoni 10 Frw yo kumushyigikira.

Mu kiganiro cyihariye yagiranye na IGIHE, Manzi Guevara yavuze ko kwitabira aya marushanwa byamubereye inzira yo kubona ko akwiye gukomeza umurongo w’ibyo yatangiye wo gufasha abatishoboye.

Yagize ati “Ikintu nakuyeyo ni uko muri Afurika hari abantu benshi bari gukora kugira ngo babashe guteza imbere ibihugu byabo. Riguha imbaraga zo gutangira gutekereza uburyo ushobora kugira uruhare mu guteza imbere igihugu cyawe nk’urubyiruko.”

Yakomeje ati “Ryari irushanwa ritoroshye ariko ryanyeretse ko igihe cyose ufite ikintu ku mutima kandi ufite aho ushaka kugera mu buzima ntacyaguhagarika.”

Manzi Guevera yavuze ko amafaranga yahawe agiye kumufasha kwagura ibikorwa bye kandi bikazagera kuri benshi binyuze mu murongo wo gufasha Abanyarwanda no kureba ku bindi bibazo byugarije umuryango Nyarwanda.

Yavuze ko yahisemo gutangirira ku kwishyurira abatishoboye ubwisungane mu kwivuza nyuma yo kubona ko hari abagore bagiye kubyara bajya bagera mu bitaro batabufite cyangwa abandi barwaye uburwayi busanzwe, ikiguzi cyo kwivuza kikiyongera kandi ari ba ntaho nikora.

Ati “Naravuze ngo reka ntangire umushinga uzajya ufasha ababyeyi n’abana kuba babona ubwisungane mu kwivuza baka babasha no kujya babona uko bagera ku buvuzi.”

Manzi kandi kuri ubu afite umushinga wo gukoresha ikoranabuhanga mu buvuzi by’umwihariko muri gahunda zigamije gutanga amaraso.

Iyi ni porogaramu igamije gufasha ibigo nderabuzima cyangwa ibitaro mu gihe hateguwe ibikorwa rusange byo gutanga amaraso kugira ngo ibitaro bimenye neza ingano y’abazitabira iyo gahunda mu buryo bufatika, hakamenyekana n’uburyo bashobora kwitegura hirindwa kugwa mu gihombo cyaterwa no kuba umubare utazwi.

Iyi porogaramu nubwo itaratangira kwifashishwa n’ibitaro runaka Manzi yavuze ko mu igeregezwa byagaragaye ko bishoboka kandi ishobora no kwifashishwa ku zindi ndwara mu gihe yakongererwa imbaraga ku bitaro biyikoresha.

Ikindi kibazo iyo sisitemu ishobora gukemura ni mu gihe hari abantu bakeneye guhabwa amaraso bafite icyiciro cy’amaraso cyihariye bikaba byagorana kumenya uwo bahuje ushobora kumufasha kuko ibika amakuru mu buryo bwiza aho kwifashisha impapuro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .