Makuza yahererekanyije ububasha na Dr Iyamuremye wamusimbuye ku buyobozi bwa Sena

Yanditswe na Philbert Girinema
Kuya 18 Ukwakira 2019 saa 06:57
Yasuwe :
0 0

Bernard Makuza wari Perezida wa Sena yahererekanyije ububasha na Dr Iyamuremye Augustin wamusimbuye kuri uyu mwanya, nyuma y’irahira ry’abasenateri kuri uyu wa Kane.

Umuhango w’ihererekanyabubasha hagati y’aba bagabo bombi wabaye ku manywa yo kuri uyu wa Gatanu, tariki ya 18 Ukwakira 2019. Wakurikiwe n’ibiganiro by’amasaha arenga ane hagati ya Biro Nyobozi ya Sena ishoje manda n’ibakoreye mu ngata.

Dr Iyamuremye Augustin watorewe kuba Perezida wa Sena, yavuze ko nyuma y’umuhango w’ihererekanyabubasha, abasenateri ku munsi wa mbere bazakora gahunda y’akazi kihutirwa, ariko hagati aho inyandiko bahawe na Sena ishoje manda bagiye kuzisoma barebe ibikwiye kwihutirwa.

Umuhango w’ihererekanyabubasha hagati y’aba bombi wabaye mbere y’ibiganiro byamaze amasaha agera kuri atatu, abanyamakuru bategereje hanze y’icyumba.

Iyamuremye yashimangiye koko ko ibiganiro byabaye igihe kirekire ndetse ko iri hererekanyabubasha riruta andi yose yakoze mu buzima bwe.

Ati “Mu buzima bwanjye nagize amahererekanyabubasha menshi, ni ubwa mbere mbona umuyobozi ufata igihe agasobanurira abo ahaye ububasha uko bakwiye kunoza imikorere, imikoranire, ibyakozwe n’ibisigaye kunozwa. Turabimushimira cyane, bizadufasha kugira ngo tubone aho duhera.”

Inteko Ishinga Amategeko, Umutwe wa Sena igizwe n’abasenateri 26 barimo 20 barahiriye inshingano kuri uyu wa 17 Ukwakira 2019; aba baziyongeraho, abandi batandatu bazashyirwaho nyuma y’umwaka manda nshya itangiye ngo mu mikorere ya Sena hatabaho icyuho mu nshingano yo kugenzura ishyirwa mu bikorwa ry’amahame remezo no kwemeza abayobozi.

-  Ibyagezweho na Sena muri manda y’imyaka umunani ishize

Sena yariho yatangiye imirimo mu 2011, ubusanzwe iba ifite inshingano yihariye ku giti cyayo n’izo isangiye n’Umutwe w’Abadepite.

Inshingano zihariye zirimo kugenzura iyubahirizwa ry’amahame remezo, kugenzura imikorere y’imitwe ya Politiki, kwemeza ishyirwaho ry’abayobozi, gutanga ibitekerezo ku mushinga w’ingengo y’imari mbere y’uko wemezwa n’Abadepite, kwakira inyandiko zimenyekanisha imitungo y’urwego rw’umuvunyi.

Mu mahame remezo hazamo guhana icyaha cya Jenoside, gukumira no kurwanya ingengabitekerezo, ihakana n’ipfobya rya Jenoside, kurwanya ivangura, amacakubiri n’irindi, gusaranganya ubutegetsi nta bwiganyize.

Mu yandi mahame remezo harimo kubaka Leta igendera ku mategeko n’ubutegetsi bushingiye kuri Demokarasi n’ibitekerezo bitandukanye, uburinganire hagati y’abagabo n’abagore, kubaka Leta iharanira imibereho myiza, gushaka umuti binyuze mu biganiro no kugera ku bwumvikane busesuye.

Mu nshingano Umutwe wa Sena uhuriyeho n’uw’Abadepite zirimo gusuzuma no gutora amategeko, kugena no kugenzura ibikorwa bya guverinoma no guhagararira abaturage.

Mu bikorwa manda ya Kabiri ya Sena yagezeho mu myaka umunani ishize harimo ko Inteko Rusange yasuzumye raporo 43 yashyikirijwe n’inzego zitandukanye zirimo Komisiyo y’Uburenganzira bwa muntu, iy’abakozi, iyo kurwanya Jenoside, Banki Nkuru y’igihugu n’izindi.

Mu mezi 88 ashize Inteko Ishinga amategeko yateranye inshuro 456 isuzuma ingingo 145 zafatiwemo imyanzuro 723 irimo 37 yarebaga Sena gusa.

Inama y’abaperezida ba komisiyo za Sena ubwazo zateranye inshuro 96 zifatirwamo imyanzuro 413 naho inama za biro 320 zateranye, zafatiwemo ibyemezo 2 986.

Mu kugenzura ibikorwa bya Guverinoma no kubitangaho inama Sena ivuga ko abagize guverinoma bahamagajwe inshuro 21 ndetse inama bagiriwe bazishyira mu bikorwa ku kigero cya 89%.

Muri iyo myaka umunani kandi sena yagiye ikemura ibibazo by’abaturage bitandukanye birimo 51 bayigejejweho mu nyandiko n’ibindi.

Sena kandi yemeje abayobozi 254 barimo abakomiseri n’abayobozi muri komisiyo 97 (38%), abayobozi b’ibigo na ba guverineri 81, abayobozi mu rwego rw’ubutabera 35 na ba ambasaderi 41.

Muri iyo myaka kandi sena yakiriye inyandiko zimenyesha imitungo y’abayobozi n’abakozi b’Urwego rw’Umuvunyi zigera kuri 570.

Mu bikorwa Umutwe wa Sena uhuriyeho n’uw’Abadepite, Sena igaragaza ko hatowe amategeko 270 arimo 76 yatowe mu 2013, mu 2015 hatorwa 53, mu 2016 hatorwa icyenda, mu 2018 hatorwa 10 naho mu 2019 hatorwa rimwe naho 42 aravugurwa.

Mu bindi Inteko rusange yakoze harimo gufungura Radiyo yayo byakozwe ku wa 23 Werurwe 2012, kwakira inyandiko z’abarenga miliyoni eshatu basaba guhindura ingingo ya 101 y’Itegeko Nshinga rya Repubulika y’u Rwanda, ubusabe bwabo bugasuzumwa kandi bugahabwa agaciro.

Sena igaragaza ko ibyo bikorwa byose yabigezeho yifashishije ingengo y’imari y’asaga miliyari 23 Frw kandi raporo y’Umugenzuzi Mukuru w’Imari ya Leta zagiye zigaragaza ko yakoreshejwe neza.

Bernard Makuza wari Perezida wa Sena yahererekanyije ububasha na Dr Iyamuremye Augustin wamusimbuye
Umuhango w'ihererekanyabubasha hagati ya Bernard Makuza wari Perezida wa Sena na Dr Iyamuremye Augustin wabereye mu Nteko Ishinga Amategeko, Umutwe wa Sena
Dr Iyamuremye Augustin yashimye Bernard Makuza wari Perezida wa Sena nyuma yo guhererekanya ububasha. Yavuze ko yafashe igihe gihagije cyo kubasobanurira neza imikorere yayo
Nyuma yo guhererekanya ububasha hafashwe ifoto y'urwibutso hagati y'abayobozi ba Sena bacyuye igihe n'ababasimbuye ku ntebe z'ubuyobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza