00:00:00 IGIHE NETWORK KN KINYARWANDA EN ENGLISH FR FRANCAIS

Mageragere: Ibyishimo ni byose nyuma yo gutangira kubakirwa kaburimbo

Yanditswe na Thamimu Hakizimana
Kuya 8 Ukuboza 2022 saa 03:15
Yasuwe :

Abaturage bo mu Murenge wa Mageragere, bari mu byishimo bikomeye nyuma y’aho hatangijwe igikorwa cyo kububakira umuhanda wa kaburimo w’ibirometero 8,6 uzava Miduha – Mageragere ngo kuko uzoroshya imihahirane n’indi mirenge bahana imbibi.

Aba baturage babwiye IGIHE ko babaga mu bwigunge nk’abataba mu Mujyi wa Kigali kubera ikibazo cyo kutagira umuhanda mwiza ndetse byabagiragaho ingaruka cyane ko banaburaga ibinyabiziga bibatwara kubera ko abashoferi benshi n’abamotari batinyaga ko byangirika cyangwa bakabaca amafaranga y’umurengera kugira ngo babatware.

Bavuga ko uyu muhanda niwuzura uzakemura ikibazo cy’ibyondo kiwugaragaramo iyo imvura yaguye n’umukungugu mwinshi uwubamo mu gihe cy’izuba.

Bemeza ko bari bameze nk’abari mu bwigunge kubera ikibazo cyo kutagira umuhanda mwiza, baboneraho gushimira Leta icyo gikorwaremezo.

Uwimana Winifrida utuye mu Kagari ka Ntungamo, yagize ati “ Twarabyishimiye cyane kuba tugiye natwe kubona umuhanda w’umukara kuko ingendo zatugoraga cyane ugasanga bibaye ngombwa ko umuntu hari aho atajya kubera ikibazo cyo gucibwa amafaranga menshi kuri moto no kubura imodoka.”

Nzeyiman Mathias, yagize ati “Ni ibintu byadushimishije cyane kuko wabonaga ko twari twarasigaye mu bwigunge bitewe n’uko abashoferi benshi bangaga kuza aha kubera umuhanda mubi ikindi noneho nko mu bihe by’izuba nk’umuntu ugiye mu mujyi yagerayo yamaze kwandura cyane yuzuye umukungugu.”

Umushoferi witwa Nzabandora Emile, nawe avuga ko yishimiye ko uyu muhanda wa Mageragere watangiye kubakwa kuko uzatuma imodoka zabo zitazongera kujya zipfa kwangirika.

Ati “Mbere twahuraga n’ibibazo byinshi kuko imodoka zarahangirikiraga bigatuma noneho abashoferi benshi banga kuhakorera bitewe n’icyo kibazo n’icy’ibyondo kuko mu gihe cy’imvura uba urimo ibyondo byinshi ku buryo biba bisaba ko buri munsi umuntu ajya mu Kinamba.”

Uwitwa Nzeyimana we avuga ko yungukiye muri iki gikorwa cyo kubaka umuhanda muri uyu Murenge wa Mageragere kubera ko yabonyemo akazi.

Ati “Wabura kwishima ute se kandi iki gikorwa remezo cyarahaye abantu benshi akazi? Nk’ubu rwose njye ubu ndi gutahana 3000Frw ku munsi kubera uyu muhanda mu gihe namaraga nk’iminsi ine nta 1000Frw nari nakoza mu ntoki.”

Umunyamabanga Nshingwabikorwa w’Umurenge wa Mageragere, Hategekimana Silas nawe yemeza ko uyu muhanda uje gukemura ibibazo bitandukanye.

Yagize ati “ Uje ukenewe kubera ko uyu Murenge ni umwemu mirenge minini kuko ungana na hafi ½ cy’Akarere ka Nyarugenge rero uzateza imbere imigenderanire unoroshye urujya n’uruza ikindi n’umurongo w’imodoka abatwara imodoka bahuraga n’ikibazo kubera ko umuhanda utari umeze neza.”

Yemeje ko uyu murenge wa Mageragere umaze gutera imbere cyane bitewe n’ibikorwaremezo bitandukanye bimaze kuwugezwamo birimo umudugudu w’icyitegererezo, amashuri yubatswe ku muganda w’abaturage n’amazi meza ku buryo ubu ntabacyivoma ibirohwa.

Uyu muhanda uzaba ufite kilometero umunani
Ni umuhanda wari umeze nabi
Umuhanda Miduha-Mageragere watangiye kubakwa
Abaturage bishimiye ko igikorwa cyo kubaka uyu muhanda kiri kubaha akazi
Umunyamabanga Nshingwabikorwa w’Umurenge wa Mageragere, Hategekimana Silas,nawe yemeza ko uyu muhanda uje gukemura ibibazo bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .