Madamu Jeannette Kagame yitabiriye imurikwa ry’Igitabo ‘Moi, le dernier Tutsi’ cya Habonimana

Yanditswe na Ishimwe Israel
Kuya 24 Mata 2019 saa 10:20
Yasuwe :
0 0

Madamu Jeannette Kagame yitabiriye imurikwa ry’igitabo ‘Moi, le dernier Tutsi’ cyanditswe na Habonimana Charles [Karoli] afatanyije n’Umufaransa Daniel Le Scornet, kivuga amateka yanyuzemo muri Jenoside yakorewe Abatutsi mu 1994.

Uwo muhango wabereye muri Kigali Conference and Exhibition Village [KCEV] ku mugoroba wo ku wa Kabiri, tariki ya 23 Mata 2019.

‘Moi, le dernier Tutsi’ bishatse kuvuga ‘Njye, Umututsi wa nyuma’ ni igitabo cy’amapaji 187, gikubiyemo inkuru mpamo y’ubuzima umwanditsi yanyuzemo muri Jenoside yamugize imfubyi, akanayiburiramo abavandimwe n’umuryango.

Habonimana wari ufite imyaka 12 muri Jenoside, yiciwe abe mu maso, abana n’Interahamwe ndetse akanaziherekeza mu bitero.

Igitabo agitangira agaragaza uko Jenoside ku musozi w’iwabo mu yahoze ari Segiteri ya Mayunzwe, Komini Tambwe, Perefegitura ya Gitarama, ubu ni mu Karere ka Ruhango, yatangiye nyuma y’iminsi 10 ahandi mu gihugu irimbanyije.

Yavuye imuzi amazina y’abiciwe ku musozi wa Nzaratsi wahimbwe ‘Kaluvariyo’ kubera umusaza wasomaga misa witwa Sebuyonde Leonard, wishwe akahabambwa nka Yezu.

Agaragaza uko batangiye kwihishahisha, ariko bakaza gufatwa n’Interahamwe zikajya kubicira kuri Kaluvariyo. Aho ni na ho yashingiye inyito yahaye igice cya mbere mu gitabo cye acyita ‘Calvaire’.

Mu gitabo cye yanditse ko yabonye ibyo amaso ye atari akwiye kureba ku myaka 12 gusa.

Habonimana ufite abana bane yiciwe se Célestin Ruhigira na nyirarume mu maso mu gihe nyina Mukankuranga Odette n’abavandimwe be bajugunywe mu musarani areba.

Mu gitabo cye hari aho yifashishije indirimbo nk’uburyo bwo kuzirikana ko ababyeyi be bakundaga Imana kandi bishwe bizera.

Yabwiye abitabiriye umuhango wo kukimurika ko “Umwanya munini nawuhaye indirimbo kuko benshi bari abakirisitu kandi bagiye mu ijuru. Mama umbyara, yagize ubuzima bwo kubaho mu Mana mu minsi yose. Bamutaye mu musarani, aririmba ‘Nyiribambe ndaje unyakire’ n’ivuga ngo ‘Nimukomere bagaragu ba Nyagasani’.’’

Yagize ati “Mama yari afite Bibiliya yera, bamujugunye mu musarani, barayimwambura. Byarambabaje cyane nshatse kuyimwambura ntibyankundira kuko numvaga agomba kujyana nayo.’’

Ku mapaji ya 64 na 65 avuga ku ifatwa ku ngufu ry’abagore ariko mu gitabo agaragaza Inkotanyi (umusirikare watanze ubuzima bwe) mu guhagarika iri hohoterwa na Jenoside.

Habonimana yasobanuye ko impamvu yahisemo kwandika igitabo ari ugufasha ibinyejana bizaza kumenya amateka u Rwanda rwanyuzemo.

Yagize ati “Njye nzagenda ariko ubuhamya buzagumaho. Nahisemo kwandika igitabo nk’igikoresho cy’ingenzi, kizifashishwa n’Isi mu binyejana bizaza. Nzi neza ko Karoli azahoraho kubera iki gitabo.’’

Habonimana yanzuye kwandika amateka ye nyuma yo guhurira na Daniel Le Scornet mu Bufaransa aho yari yatumiwe gutanga ubuhamya.

Uyu mwanditsi ukomoka mu Bufaransa mu gace ka Argenteuil, yananditse igitabo ‘Bisesero, Les Héros de la Résistance’, kivuga ku ’butwari bwaranze Abanyabisesero bahanganye n’Interahamwe’ yavuze ko Jenoside yashoboraga guhagarikwa.

Ati “Nziko ingabo z’Abafaransa zari zihari, ariko igihe yari zikenewe ntacyo zakoze. Hari amahirwe ko ababuze ubuzima bari gukomeza kubaho, Jenoside yashoboraga guhagarikwa.’’

Imvano y’izina ‘Moi, le dernier Tutsi’

Habonimana yavuze ko igitabo yacyise ‘Moi, le dernier Tutsi’ ashingiye ku buryo yarokotse yari ku rutonde rw’abazicwa.

Tariki ya 23 Mata 1994 nibwo uwitwa Clotilda, wari umugore wa mwarimu Gerard yabaye uwa mbere wishwe i Mayunzwe.

Yavuze ko “Ku wa 24 Mata nabuze umuryango wanjye wose, nasigaranye na mushiki wanjye mukuru Uwanyirigira Yvonne.’’

Ku ikubitiro, umuryango wa Habonimana ntiwahunganye n’abagiye Kabgayi kuko babwiraga ko ibiri kuba byabaye no mu 1959, 1973 n’indi myaka, bizashira.

Nyuma yo kubona ubwicanyi bwakajije umurego, bahungiye mu nshuti, bageze ku witwa Kanyamashokoro bari bafitanye igihango abanza kubimana ariko birangira abuzukuru be babahururije Interahamwe zirabica.

Ati “Aho niho twavuye tujyanwa Kaluvari. Bishe data na data wacu, babakubise ubuhiri. Mbibonye nasabye ko bankubita umuhoro sinirirwe nsamba. Ubwo busabe nibwo bwangize Umututsi wa nyuma. Sebuhuku wayoboraga Interahamwe yahise avuga ati ‘uwo twahigaga ndamubonye, muribuka ko twemeranyije ko tugomba gushaka Umututsi w’igitsina gabo n’uw’igitsina gore tukazababika tukazabica nyuma mu buryo buboneye, tukabamanika mu kivumu tukazabereka abana bazavuka uko Umututsi yasaga.’’

Habonimana ni we wenyine wavuye Kaluvariyo, yaje kujyanwa n’uwayoboraga ibitero akajya amufasha mu mirimo yo mu rugo.

Habonimana w’imyaka 36 yashimye Inkotanyi zamurokoye, asaba ko buri wese yagira uruhare mu bufatanye bugamije kubaka u Rwanda rutekanye.

Igitabo cye gitangira kigaragaza igihugu cyihebye, gisoza cyerekana urugendo rwo kuzura u Rwanda no kurwubaka bushya.

Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG), Dr Bizimana Jean Damascène, yavuze ko icyemezo cya Habonimana cyo kwandika ku mateka ya Jenoside gikwiye kubera abandi urugero.

Ati “Ubutumwa naha abacitse ku icumu ni ukubahamagarira kwandika amateka ya Jenoside yakorewe Abatutsi. Abacitse ku icumu bato n’abakuru nubwo twibuka imyaka 25 Jenoside ihagaritswe, hashize 60 ibaye kuva mu 1959. Nta gitabo na kimwe dufite ku mateka ya Jenoside yakorewe Abatutsi mu 1973. Birasaba ko abakuru bazi amateka, bayabayemo Habonimana ababere urugero.’’

Moi, le dernier Tutsi cyanditse mu Gifaransa cyageze hanze ku wa 21 Werurwe 2019, mu muhango wabereye i Paris. Biteganyijwe ko kizahindurwa mu zindi ndimi ngo kirusheho kugera kuri benshi.

Mu Rwanda ubu kirabarizwa ku Rwibutso rwa Jenoside rwa Kigali ku Gisozi no mu Isomero Ikirezi ku mafaranga 18 000 Frw.

Umuhango watangijwe no gufata umunota umwe wo kwibuka
Umunyamakuru wa RBA, Novella Nikwigize ari mu basomye incamake y'igitabo 'Moi, le dernier Tutsi'
Madamu Jeannette Kagame asoma incamake z'ibikubiye mu gitabo 'Moi, le dernier Tutsi'. Yari agaragiwe na Minisitiri w'Umuco na Siporo mu Rwanda, Nyirasafari Espérance n'Umunyamabanga Nshingwabikorwa wa Komisiyo y'Igihugu yo kurwanya Jenoside, CNLG, Dr Bizimana Jean Damascène
Habonimana yashimye Inkotanyi zamurokoye mu gihe yahigwaga mu gace avukamo nyuma ya Jenoside, ngo yicwe
Umunyamakuru wa RBA, akaba n'Umuyobozi w'Urwego rw'Abanyamakuru Bigenzura mu Rwanda, RMC, Cleophas Barore, yavuze ko igitabo cya Habonimana gikwiye gutanga isomo ko abatuye igihugu bakwiye kutarangwa n'amagambo abiba amoko
‘Moi, le dernier Tutsi’ ni igitabo cy’amapaji 187 ava imuzi urugendo rwa Habonimana muri Jenoside yakorewe Abatutsi
Itorero rya Mashirika ryakinnye umukino ugaragaza uko Jenoside yashegeshe igihugu ariko kikongera kwiyubaka, abari bafite imitima ishenjaguwe bakongera kugira akanyamuneza
Umunyamabanga Nshingwabikorwa wa Komisiyo y’Igihugu yo kurwanya Jenoside, CNLG, Dr Bizimana Jean Damascène yakanguriye abacitse ku icumu kwandika ku mateka ya Jenoside yakorewe Abatutsi
Iam Blameless ubarizwa muri Canada yatanze ubutumwa bunyuze mu ndirimbo, bwo kwiyubaka k'u Rwanda
Uwanyirigira Yvonne uvukana na Habonimana ni we basigaranye mu muryango w'abantu 10. Yavuze ko 'Njye na Charles twarokowe n’Imana n’Inkotanyi. Ubwana bwacu bwabonye urupfu ariko turarokoka'
Christine Illana le Scornet uri mu bagize uruhare mu iyandikwa ry'icyo gitabo yashimye intambwe u Rwanda rumaze gutera nyuma ya Jenoside yakorewe Abatutsi
Madamu Jeannette Kagame asuhuza umwe mu bana bitabiriye umuhango wamurikiwemo igitabo 'Moi, le dernier Tutsi' kivuga ubugome ndengakamere Jenoside y'i Mayunzwe yakoranywe
Madamu Jeannette Kagame yitabiriye imurikwa ry’Igitabo ‘Moi, le dernier Tutsi’ cya Habonimana Charles
Habonimana Charles [Karoli] asinya mu gitabo cye 'Moi, le dernier Tutsi' kivuga umunota ku wundi uko yabonye Jenoside, yaburiyemo umuryango we

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza