Madamu Jeannette Kagame yifatanyije n’umuryango w’Umwamikazi Rosalie Gicanda mu kumwibuka (Amafoto)

Yanditswe na Ishimwe Israel
Kuya 20 Mata 2019 saa 11:26
Yasuwe :
0 0

Madamu Jeannette Kagame yifatanyije n’abatuye Akarere ka Nyanza mu gikorwa cyo kwibuka ku nshuro ya 25 Umwamikazi Rosalie Gicanda wishwe muri Jenoside yakorewe Abatutsi mu 1994.

Gicanda ni we wabaye Umwamikazi wa nyuma w’u Rwanda, akaba yari umugore wa Mutara III Rudahigwa. Yavutse mu 1928, yicwa ku wa 20 Mata 1994 n’abasirikare ba Leta ubwo Jenoside yakazaga umurego mu yahoze ari Perefegitura ya Butare.

Kuri uyu wa Gatandatu, Madamu Jeannette Kagame yifatanyije n’abarimo umuryango w’Umwamikazi Gicanda mu muhango wo kumwibuka no kuzirikana ubugwaneza bwamuranze.

Mu buhamya Perezida Kagame yatanze mu 2017 avuga ku mateka y’ubuto bwe kuva afite imyaka ine y’amavuko ubwo yatangiraga ubuzima bw’ubuhunzi, yashimiye na Gicanda nk’umwe mu bamufashije akabasha kurokoka.

Ubwo buhamya bugaragara mu nimero 2944 ya Jeune Afrique yasohotse ku wa 11 Kamena 2017, yiswe amabanga y’ubuto [Secrets de Jeunesse] bw’abakuru b’ibihugu barimo Perezida Kagame, Ali Bongo Ondimba, Umwami Mohammed VI wa Maroc na Alpha Condé.

Perezida Kagame yasobanuye ko mu 1961 mbere gato y’uko u Rwanda rubona ubwigenge, ubwo yari afite imyaka ine, Abahutu bari batuye ku musozi wa Tambwe bashyigikiwe n’ubuyobozi, bigabije aho umuryango we wari utuye batwika inzu zaho ndetse bagirira nabi Abatutsi. Icyo gihe umubyeyi we Asteria Rutagambwa yatangiye kumutegura ngo bahunge.

Hahise haza imodoka, umushoferi wayo ashyikiriza umubyeyi wa Perezida Kagame ibaruwa ivuga ko atumwe n’Umwamikazi Gicanda wari utuye i Nyanza mu rugendo rw’iminota nka 45 uvuye aho bo bari batuye. Rosalie Gicanda yari amusabye kubahungisha muri ibyo bihe by’amakuba.

Perezida Kagame n’abantu bari baturanye binjiye muri iyo modoka mu gihe igihiriri cy’ababahigaga cyaturukaga ku wundi musozi, gihita cyirara mu byo bari batunze.

Icyo gihe ngo basanze Umwamikazi i Nyanza, mbere y’uko bafata inzira bakerekeza mu Mutara aho naho ubwicanyi bwabasanze bakabuhungira muri Uganda.

Gicanda yavukiye i Rwamagana mu 1928. Yakuze arangwa n’ikinyabupfura ari nabyo byatumye abengukwa n’Umwami Mutara III Rudahigwa.

Ku wa 13 Mutarama 1942 nibwo Gicanda yashyingiranwe n’Umwami Mutara III Rudahigwa waje kubatizwa Charles Léon Pierre. Nyuma y’imyaka ibiri Rudahigwa atanze (ku wa 25 Nyakanga 1959), mu 1961 hatangiye inkubiri yo kwimakaza ubutegetsi bwa Repubulika.

Icyo gihe uwari Perezida Kayibanda Grégoire yirukanye mu rukari Umwamikazi Gicanda, waje kwicirwa i Butare muri Jenoside. Yicanywe n’abagore batandatu bari inshuti ze n’abandi bo mu muryango we barasiwe imbere y’ingoro y’umurage w’amateka y’u Rwanda iri i Butare.

Umwamikazi Gicanda aruhukiye i Mwima ya Nyanza ahatabarijwe Umwami Mutara III Rudahigwa na Kigeli V Ndahindurwa.

Madamu Jeannette Kagame yari kumwe na Minisitiri w'Umuco na Siporo, Nyirasafari Espérance n'Umuyobozi Mukuru w'Ikigo cy'Ingoro z'Igihugu z'Umurage w'u Rwanda, Amb. Robert MASOZERA
Inshuti n'umuryango bitabiriye iki gikorwa
General Fred Ibingira ni umwe mu bitabiriye uyu muhango
Minisitiri Nyirasafari yitabiriye iki gikorwa
Umuyobozi Mukuru w'Ikigo cy'Ingoro z'Igihugu z'Umurage w'u Rwanda, Amb. Robert MASOZERA
Ubuhamya n'ubutumwa bwatanzwe mu Kwibuka Rosalie Gicanda bwagarutse ku mutima mwiza wamurangaga, ubwiza ndetse no kwihangana
Madamu Jeannette Kagame yunamira aharuhukiye Gicanda
Hakozwe isengesho ryo kumusabira
Rosalie Gicanda ni we mwamikazi wa nyuma u Rwanda rwagize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza