Madamu Jeannette Kagame yavuze ku kamaro ko guha umwanya abagore mu miyoborere

Yanditswe na Ferdinand Maniraguha
Kuya 14 Ugushyingo 2018 saa 09:48
Yasuwe :
0 0

Madamu Jeannette Kagame yagaragaje ko iyo ibitekerezo by’abagore bihawe agaciro, bigira ingaruka nziza ku iterambere kuko aribo bumva neza ibibazo umuryango uhura nabyo.

Yabitangaje kuri uyu wa Kabiri ubwo yagezaga ijambo ku bitabiriye ikiganiro kivuga ku mpinduka nziza abagore bari mu buyobozi bakwiye kuzana mu iterambere ry’Isi.

IKi kiganiro ni kimwe mu bigize inama mpuzamahanga yiga ku kuboneza urubyaro yatangiye I Kigali tariki 12 Ugushyingo, ikazasozwa tariki 15 Ugushyingo 2018.

Muri icyo kiganiro cyari cyitabiriwe n’Umufasha wa Perezida wa Haiti, Martine Moise, Igikomangomakazi Sarah cya Jordan n’abandi, Madamu Jeannette Kagame yavuze ko kuva kera abagore bagiye bagaragaza uruhare rukomeye mu mibereho y’imiryango.

Yavuze ko ikibabaje ari uko uruhare n’imvune zabo bitakunze guhabwa agaciro, bikagira ingaruka ku buzima bwabo n’imibereho yabo.

Agendeye ku ruhare rw’umugore mu miyoborere, yavuze ko bigaragaza ko iyo ahawe umwanya akagaragaza ijwi rye bizana impinduka nziza.

Ati “Birigaragaza ko iyo umugore ahawe umwanya akanafashwa ngo ibitekerezo bye byumvikane, bitanga umusaruro. Twagiye tubona abagore bahindukamo abantu bakomeye, bakazana ibisubizo birambye ku bibazo bibugarije.”

Yakomeje agira ati “Ni inshingano zacu kubongerera ubushobozi hagamijwe kubateza imbere no kubegereza serivisi zigamije kubahindurira ubuzima, kuboneza urubyaro ndetse n’ibijyanye n’ubuzima bw’imyororokere.”

Madamu Jeannette Kagame yavuze ko kubera ubushishozi n’ubwitonzi abagore bakoresha, bakunze kwitabazwa mu nshingano zikomeye kandi bakazitwaramo neza.

Yatanze urugero rw’uburyo bifashishwa nk’umusemburo w’impinduka zifuzwa, mu guhuza abantu, gutera abandi ingabo mu bitugu n’ibindi.

Ati “Mwibaze uko byagenda nta bagore b’abayobozi bicaye ku meza aho imyanzuro ireba imiryango ifatirwa kandi aribo bafitanye isano rya hafi n’iyo miryango, ari nabo bumva neza ibibazo byayo.”

Yasabye abitabiriye icyo kiganiro kuba ku isonga mu kongera ingamba zo guteza imbere abagore, kugira ngo babe umusemburo w’impinduka nziza Isi ikeneye.

Umugore wa Perezida wa Haїti, Madamu Martine Moїse yavuze ko guteza imbere abagore ari ukubaha umwanya mu gushaka ibisubizo by’ibibazo bibugarije.

Yagize ati “Ni inshingano za buri muntu kumva ko iterambere ry’abakobwa ari irya buri wese. Guteza imbere abangavu bikwiriye kujyana no kubongerera ubushobozi by’umwihariko hitawe ku burezi mu by’ubuzima bw’imyororokere n’ubuzima muri rusange.”

Yasabye za Guverinoma gushyiriraho urubyiruko uburyo budasanzwe buborohereza kubona serivisi zo kuboneza urubyaro n’iz’ubuzima bw’imyororokere.

Igikomangomakazi cya Jordan, Sarah Zeid yashimangiye ko icyakorwa cyose abagore batakigizemo uruhare, nta terambere rirambye cyageraho.

Yavuze ko guharanira uburenganzira ku buzima bw’imyororokere na serivsi zo kuboneza urubyaro bikwiye kuba mu ntego za buri wese.

Toyin Saraki washinze Umuryango Wellbeing Foundation, we yasabye abitabiriye inama guhuriza hamwe imbaraga, hagashakwa uburyo serivisi z’ubuzima bw’ibanze zigera kuri bose.

Saraki yavuze ko serivizi z’ubuzima bw’ibanze ari ryo pfundo ry’iterambere ry’ibindi byose byakorwa.

Raporo y’Ishami ry’Umuryango w’Abibumbye ryita ku baturage, UNFPA, yasohotse umwaka ushize ku busumbane bwo kubona serivisi z’ubuzima hagati y’abagore b’abakire n’abakene, yagaragaje ko u Rwanda ari kimwe mu bihugu byabashije kwegereza abagore bose serivisi z’ubuzima mu gihe cy’imyaka 10 (2005-2015).

Igaragaza ko abasaga 70% bazigeraho bakanaringaniza imbyaro.

Ubwo Madamu Jeannette Kagame yagezaga ijambo ku bitabiriye inama yiga ku kuboneza urubyaro
Abantu batandukanye bitabiriye ikiganiro kivuga ku mpinduka nziza abagore bari mu buyobozi bakwiye kuzana mu iterambere ry’Isi
Igikomangomakazi cya Jordan Sarah Zeid; Umugore wa Perezida wa Haïti, Martine Moïse; na Toyin Saraki washinze Wellbeing Foundation
Umuyobozi Mukuru mu ishami rishinzwe ubuzima muri USAID, Alma Golden; Umugore wa Perezida wa Haïti, Martine Moïse; Igikomangomakazi cya Jordan, Sarah Zeid na Toyin Saraki washinze Umuryango Wellbeing Foundation, ubwo bari mu kiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza