Madamu Jeannette Kagame yatanze amapaki 1200 y’ibikoresho by’isuku by’abagore n’abakobwa

Yanditswe na Twarabanye Venuste
Kuya 30 Mutarama 2020 saa 09:33
Yasuwe :
0 0

Madamu Jeannette Kagame yatangaje ko agiye kujya atanga amapaki 100 y’ibikoresho by’isuku abakobwa n’abagore bakoresha mu gihe cy’imihango (Cotex), akazazitanga mu gihe kingana n’umwaka wose mu gufasha abatabasha kuzigurira cyane cyane abanyeshuri.

Kuva mu 2019 kuri Twitter hakomeje gukorerwa ubukangurambaga bwo gukusanya Cotex zo gufasha abatabasha kuzibonera barimo abanyeshuri bwiswe #FreeThePeriod initiative. Bukorwa n’abantu batandukanye izo bakusanyije bakazigeza ku bazikeneye.

Ni ubukangurambaga bukorwa mu buryo bumaze kumenyerwa nka #Challenge, aho iyo umuntu amaze kugaragaza icyo azatanga nawe ahitamo undi muntu ashaka, akamusaba kugira icyo atanga.

Mu buri gukorwa na I Matter I Matter Initiative bwiswe #EndPeriodpoverty, Madamu Jeannette Kagame yatanze amapaki 100 nyuma yo guhabwa #Challenge n’umukobwa we, Ange Kagame watanze amapaki 80.

Yagize ati “Urakoze Ange! Nemeye amapaki 100 buri kwezi, mu gihe cy’umwaka umwe.”

Nk’uko bigenda kugira ngo ubukangurambaga bukomeze na we yasabye abandi kugira icyo batanga, ku isonga Umuryango Imbuto Foundation, yashinze akaba anawubereye umuyobozi w’ikirenga, itanga amapaki 500 n’Umuryango uhuza abari muri Guverinoma, abayibayemo n’abo bashakanye, Unity Club Intwararumuri, na wo utanga amapaki 500 buri kwezi mu gihe cy’umwaka umwe.

Umuyobozi Mukuru wa Banki ya Kigali, Dr Diane Karusisi, na we yahise atanga amapaki 100, Ambasaderi w’u Rwanda mu Buhinde, Mukangira Jacqueline wemeye gutanga amapaki 400 n’abandi.

Cotex zitangwa zituma abana b’abakobwa batishoboye babona izo bifashisha iwabo mu gihe iyo bari ku ishuri bakoresha ‘icyumba cy’umukobwa’ kibamo ibyangombwa byose bashobora gukenera igihe bari mu mihango.

Raporo y’Umuryango w’Abibumbye mu mwaka wa 2014 yagaragaje ko nibura umukobwa umwe mu 10 bo muri Afurika yo munsi y’ubutayu bwa Sahara nibura yasibye ishuri kubera imihango. Ni impamvu zishingira ku kutabona ibikoresho biboneye by’isuku, bamwe bakanakoresha ibitizewe bibyara izindi ndwara.

Ni mu gihe abakobwa benshi batabona ibyo bikoresho by’isuku, muri abo batakaza 20% by’amasomo ndetse bamwe bagahitamo kuva mu ishuri.

Ubukangurambaga bwiswe SHE28 bwerekanye ko mu Rwanda, nibura abogore n’abakobwa 18% basiba imirimo n’amashuri kubera kubura cotex, ibyo bigatera igihombo cy’amadorali 215 kuri buri mugore ku mwaka.

Mu kwezi gushize Guverinoma y’u Rwanda yakuyeho imisoro ku nyongeragaciro (TVA) ku bikoresho byifashishwa mu isuku ku bagore n’abakobwa, umwanzuro wafashwe hagamijwe korohereza abagore n’abakobwa kubona ibi bikoresho.

Madamu Jeannette Kagame asanzwe ashyigikira cyane iterambere ry'umwana w'umukobwa
Guverinoma iherutse gukuraho umusoro ku bikoresho by'isuku by'abakobwa n'abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza