Madamu Jeannette Kagame yasangiye Noheli n’Ubunani n’abana barenga 200 (Amafoto na Video)

Yanditswe na Ishimwe Israel
Kuya 15 Ukuboza 2019 saa 09:48
Yasuwe :
0 0

Madamu Jeannette Kagame yakiriye, anasangira n’abana barenga 200 baturutse mu bice bitandukanye by’igihugu mu kubifuriza Noheli Nziza n’Umwaka mushya Muhire wa 2020.

Iki gikorwa cyabereye mu Busitani bwa Village Urugwiro kuri iki Cyumweru, tariki 15 Ukuboza 2019.

Abana bacyitabiriye baturutse mu turere 30 tw’igihugu bari bahagarariye bagenzi babo. Kuri uyu munsi udasanzwe kuri bo, bahawe umwanya wo kwidagadura no gukina imikino itandukanye yabagenewe ituma bishimana na bagenzi babo.

Banagaragaje impano bifitemo mu ngeri zitandukanye z’ubuhanzi kuva ku baririmbyi, abavuga imivugo n’amazina y’inka mu kugaragaza ko umuco umaze gushinga imizi mu bakiri bato nk’ikinyejana cy’ahazaza.

Ni ibihangano byabumbiye hamwe ubutumwa bugaragaza uko u Rwanda rwahaye agaciro abato, uko rwita ku barutuye n’uruhare rw’ubuyobozi bwiza mu nzira igana ku iterambere ridaheza.

Impanuro rusange bahawe na bagenzi babo bakoze ibikorwa by’indashyikirwa ziganisha ku guharanira kubungabunga ibyagezweho mu ngeri zitandukanye z’ubuzima.

Musoni Rugwiro Brillant yakanguriye bagenzi be gushishikarira gusoma no kwandika kuko bizateza imbere.

Uyu mwana w’imyaka 12 yitabiriye amarushanwa yo kuvuga Icyongereza, aba uwa mbere mu Majyepfo no ku rwego rw’igihugu, ahagararira u Rwanda.

Yagize ati “Nishishikarije gusoma cyane ibitabo, nigirira icyizere, nkurikiza inama abarezi n’ababyeyi bangira, nkanasenga Imana kuko ari yo ya mbere.’’

Rugwiro wiga kuri New Vision Primary School i Huye yabaye uwa kabiri mu marushanwa y’Icyongereza yabereye i Dubai mu Leta Zunze Ubumwe z’Abarabu, ahabwa ibirimo igihembo n’umudali wa zahabu.

Yakomeje agira ati “Ndashimira Leta y’u Rwanda yashyizeho amasomero ariko nkasaba ko yakongerwa ku buryo abana babona aho barushaho kwiyungura ubumenyi.’’

Banasangijwe kandi inkuru na Rukundo Yasri wasannye itiyo y’amazi yari yangiritse yanga ko akomeza kumeneka.

Rukundo utuye mu Murenge wa Kigarama mu Karere ka Kicukiro kuri ubu ufite imyaka 10, mu 2017 yafotowe ari guhambira itiyo yapfumutse akabanza kurihoma nyamara yari ajyanye murumuna we ku ishuri.

Ati “Narahageze mbibonye nibuka ko papa yambwiye ko ninzajya mbona ikintu cyangiritse nzajya ngikora. Nararisannye (itiyo) hanyuma umugenzi amfata amafoto, ayashyira ku mbuga nkoranyambaga. Nabikoze ntagamije guhembwa ariko nahawe miliyoni 1 Frw n’igare.’’

Yashishikarije abandi bana gufata neza ibikorwa remezo byubatswe ngo bikomeze kubungabungwa.

Mu bana bahawe umwanya wo kwerekana impano yabo harimo Ishimwe Pacifique ukoresha izina rya Gaso G mu muziki.

Uyu mwana w’imyaka 11 wakuriye mu buzima bwo ku muhanda akaza kuhakurwa yatanze ubutumwa buganisha ku kwita ku bana no kubaha umwanya wo kugaragaza ibyo bashoboye. Yifashishije indirimbo ze zirimo “Humura’’, “Shine” na “Family time” yitegura gushyira hanze.

Mu mpera za buri mwaka, Madamu Jeannette Kagame, yakira abana bahagarariye abandi mu gihugu mu musangiro wo kubifuriza gusoza no gutangira umwana neza.

Kuri uyu munsi nyuma yo gukata umutsima yabateguriye, Madamu Jeannette Kagame yabahaye impano zitandukanye zirimo ibikapu birimo ibikoresho bitandukanye by’ishuri, imipira yo gukina n’ibitabo byo gusoma nk’impamba yo kwitwaza mu gihe bazaba basubiye ku ishuri.

Ibi birori byitabiriwe n’abana baturutse mu gihugu hose, batoranyijwe kubera ubuhanga bagaragaje mu ishuri, abo mu miryango itishoboye n’abafite ubumuga bwihariye, bahuye n’abandi bana bafite ababyeyi bakora mu Biro by’Umukuru w’Igihugu, Imbuto Foundation n’abanyamuryango ba Unity Club Intwararumuri uhuza ababarizwa n’abahoze muri guverinoma.

Abana babanje gusigwa amarangi atandukanye; aha Ishimwe Pacifique ukoresha izina rya Gaso G mu muziki yashyirwagaho ibendera ry'igihugu riherekejwe n'ijambo "Rwanda''
Abana bitabiriye iki gikorwa bari bishimiye kwifotoza nyuma yo guhabwa impano
Bishimiye impano bahawe nyuma yo kwakira na Madamu Jeannette Kagame
Umwana muto ugororotse bidasanzwe yatangariwe na bagenzi be
Abana bitabiriye iki gikorwa bategurirwa imikino itandukanye irimo no kurya umunyenga mu byicundo
Abana babiri barimo ufite ubumuga bw'ingingo n'uw'ubw'uruhu rwera baconga ka ruhago
Gaso G (hagati) n'abana bagenzi be bifotozaga nk'abahanzi
Abana bitabiririye ibi birori ni abatoranyijwe kubera ubuhanga bagaragaje mu ishuri, hakanazirikanwa abava mu miryango itishoboye n’abafite ubumuga bwihariye
Abana bahawe impano z’iminsi mikuru ya Noheli n’Ubunani bwa 2020
Madamu Jeannette Kagame yari aherekejwe na Minisitiri w'Uburinganire n'Iterambere ry'Umuryango, Nyirahabimana Solina
Ishimwe Henriette yavuze umuvugo wibanze ku bumwe butari amashyengo. Yasabye abato kwirinda gusamara no kwirukira mu bikorwa bishobora gutuma batwara inda zitateguwe
Abana bahawe umwanya wo kugaragaza impano zabo mu kuvuga amazina y'inka
Abato berekanya ko bari gutozwa ubuvanganzo bwo kuvuga imivugo n'amazina y'inka
Madamu Jeannette Kagame yafatanyije n'abana kubyina indirimbo za Kinyarwanda
Isimbi Teta Pamella yafashije Gaso G kubyina zimwe mu ndirimbo ze
Gaso G wakuriye ku muhanda ari mu banyempano bato bigaragaje imbere ya Madamu Jeannette Kagame
Isimbi Teta Pamella na Gaso G baherutse gusohora indirimbo ya Noheli bahuriyemo
Minisitiri wa Siporo, Munyangaju Aurore Mimosa, afata amashusho ubwo Gaso G yaririmbaga
Ibi birori byabereye mu busitani bwa Village Urugwiro, Ibiro by’Umukuru w’Igihugu, biherereye ku Kacyiru
Madamu Jeannette Kagame asuhuza Gaso G nyuma yo kuririmba indirimbo zitandukanye
Madamu Jeannette Kagame yashimiye Gaso G nyuma yo kugaragaza impano ye yo kuririmba. Uyu muraperi w'imyaka 11 yari afite akanyamuneza ku maso
Musoni Rugwiro Brillant wegukanye umwanya wa kabiri mu marushanwa y'Icyongereza yabereye muri Leta Zunze Ubumwe z'Abarabu, yasabye Leta gushyiraho amasomero menshi afasha n'abakiri bato kumenya neza gusoma no kwandika
Mahirwe Pacifique yaciriye abana umugani mu kurushaho kubakundisha gusoma
Madamu Jeannette Kagame yafatanyije n'abana bato gukata umutsima yabateguriye
Mu mpera za buri mwaka, Madamu Jeannette Kagame, yakira abana bahagarariye abandi mu gihugu akabifuriza Noheli nziza n’Umwaka mushya muhire
Madamu Jeannette Kagame yambika Gaso G igikapu kirimo ibikoresho by'ishuri nk'impano yageneye abana
Abana batumiwe muri iri sangira bahawe impano zitandukanye
Banahawe impano z'ibitabo bizabafasha gukuza umuco wo gukura bakunda gusoma

Amafoto: Muhizi Serge

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .