Madamu Jeannette Kagame yasabye abanyamuryango ba Unity Club kutareberera ibitekerezo bisenya Ubunyarwanda

Yanditswe na Uwimana Abraham
Kuya 6 Ugushyingo 2020 saa 04:09
Yasuwe :
0 0

Madamu Jeannette Kagame yabwiye abanyamuryango ba Unity Club Intwararumuri ko badakwiye kwihanganira na rimwe ibitekerezo bigamije gusenya Ubunyarwanda n’ibyo u Rwanda rumaze kugeraho, ahubwo ko bakwiye gushyira Umunyarwanda imbere, bagakora neza inshingano zimakaza iterambere muri rusange.

Ibi Madamu Jeannette Kagame yabitangaje kuri uyu wa 6 Ugushyingo 2020, ubwo yatangizaga ku mugaragaro umwiherero w’Umuryango Unity Club Intwararumuri abereye umuyobozi, wabereye mu Ngoro y’Inteko Ishinga Amategeko ku Kimihurura.

Madamu Jeannette Kagame yikije cyane ku kwibutsa abanyamuryango ba Unity Club inshingano biyemeje zo kwimakaza gushyira imbere Ubunyarwanda nk’isano isumba izindi.

Yagize ati “Mu nshingano zacu nk’Intwararumuri, nk’abayobozi by’umwihariko, twiyemeje gushyira imbere Ubunyarwanda, Abanyarwanda n’u Rwanda, nk’isano iruta izindi zose. Twiyemeje kuba Intwararumuri, urumuri rudukura mu mwijima kuko aho umwijima uri hangirika byinshi.”

“Twemeye kugendana uru rugendo rutoroshye turi umwe kandi tumaze kubona ko twunguka cyane iyo dushyize hamwe. Ntidukwiye rero kwihanganira na rimwe, ibitekerezo bigamije gusenya Ubunyarwanda, n’ibyo tumaze kugeraho.”

Umuyobozi Mukuru wa Unity Club yanagarutse ku byagaragajwe mu ihuriro ry’uyu muryango ryabaye ku wa 31 Ukwakira 2019, aho byagaragajwe ko hari abakoresha ikoranabuhanga kugira ngo bagoreke amateka bagamije gusenya ubumwe n’Ubunyarwanda, asaba abanyamuryango kutabarebera.

Ati “Nk’abanyamuryango rero iryo koranabuhanga tuririho turarikoresha, tuzi ukuri kandi twabonye umusaruro wo kuvugisha ukuri, kubana neza no kwimakaza Ubunyarwanda. Hakenewe ko urwo rumuri twabonye turujyana muri iryo koranabuhanga, tukamurikira abarikoresha kugira ngo bamenye ukuri.”

Madamu Jeannette Kagame kandi yanagarutse kuri raporo iherutse gusohorwa na Komisiyo y’Ubumwe n’Ubwiyunge igaragaza ko hakiri imbogamizi zirimo kutemera Ubunyarwanda, gushyira imbere ivangura, guhohotera abarokotse Jenoside, kugoreka amateka, guhisha no kwangiza ibimenyetso.

Yasabye ko hakomeza gushyirwa imbaraga muri gahunda zo kwigisha Ubunyarwanda n’iz’isanamitima, hitawe cyane cyane ku bato kuko ari yo soko ivomwamo isano dusangiye.

Yagize ati “Ubunyarwanda ni isoko tuvomamo isano muzi yacu, ni urumuri rudususurutsa si ikibatsi kidutwika, ni urumuri rutumurikira maze abarwose rukabarinda gutsikira no kuyoba mu rugendo rwiza twiyemeje; ni urukingo ruhora ruzamura ubudahangarwa bwacu, kugira ngo tudatatira igihango cya ndi Umunyarwanda.”

Mu zindi mpanuro kandi yagejeje ku banyamuryango ba Unity Club biganjemo abayobozi mu nzego nkuru z’igihugu, yabasabye kurushaho gushyira imbere gukora neza inshingano zabo no gushyira imbere Umunyarwanda.

Ati “Umunyamuryango wa Unity Club akwiye gushyira Umunyarwanda imbere, agakora neza inshingano zigamije kumuteza imbere ku giti cye, umuryango n’igihugu muri rusange, kugira ngo hatagira uburenganzira bw’uwo ari we wese buhutazwa, kuko bishobora gutuma Umunyarwanda tumurikiye yumva ahejwe.”

Mu ijambo risoza uyu mwiherero, Perezida wa Sena, Dr Iyamuremye Augustin, yavuze ko umusingi w’iterambere ry’u Rwanda ari ubumwe bwa bene Kanyarwanda.

Yasabye abayobozi bahuriye muri Unity Club kuba Intwararumuri koko, bakamurikira abaturage bashinzwe kugira ngo bagere ku cyerekezo u Rwanda rufite.

Yagize ati “Uyu mwiherero ni ishuri kuri twe, umuyobozi mwiza ni uhora yiga, yiyibutsa ibyo yize nk’indagagaciro zirimo umurimo unoze, gukorera kuri gahunda, gukorera ku gihe, kurwanya ruswa n’ibindi.”

Yongeyeho ati “Icyerekezo 2050 Abanyarwanda binjiyemo, birasaba abayobozi bashoboye guherekeza abaturage muri iyo nzira ngari nshya bagomba gucamo no gukurikiza ngo badahusha intego igihugu cyihaye. Umuyobozi si uwerekana inzira ni n’uherekeza uwo ayobora kugira ngo atazayoba.”

Umuryango Unity Club watangiwe n’itsinda ry’abagore bari bahujwe n’uko abo bashakanye bari mu nzego z’ubuyobozi zitandukanye, bakaba barawutangiye bifuza gufatanya na Leta y’Ubumwe yari ivutse mu ishavu itorohewe n’ingaruka zikomeye za Jenoside, urwikekwe no kutizerana.

Umuryango wagiye waguka hongerwamo n’ibindi byiciro, kugeza ubu ugizwe n’abagize Guverinoma n’abafasha babo ndetse n’abahoze muri Guverinoma n’abafasha babo.

Muri uyu mwiherero hakiriwe abanyamuryango bashya 23, uyu muryango wungutse muri uyu mwaka, bagizwe n’abinjiye muri Guverinoma bashya ndetse n’abafasha babo.

Madamu Jeannette Kagame yasabye abanyamuryango ba Unity Club Intwararumuri kutareberera ibitekerezo bisenya Ubunyarwanda
Uyu mwiherero wabereye mu Nteko Ishinga Amategeko y'u Rwanda iherereye ku Kimihurura
Umwiherero w’Umuryango Unity Club Intwararumuri wabereye mu Ngoro y’Inteko Ishinga Amategeko ku Kimihurura
Umunyamabanga wa Leta muri Minisiteri y'Ubuhinzi n'Ubworozi, Ngabitsinze Jean Chrysostome, mu bayobozi bitabiriye umwiherero wa Unity Club
Umunyamabanga wa Leta muri Mineduc ushinzwe amashuri abanza n'ayisumbuye, Twagirayezu Gaspard
Perezida w'Urukiko rw'Ikirenga, Dr. Faustin Nteziryayo
Minisitiri w’Intebe, Dr Ngirente Edouard
Umunyamabanga Nshingwabikorwa w’Ikigega cya Leta cyo gushyigikira no gutera inkunga abatishoboye barokotse Jenoside yakorewe Abatutsi, FARG, Uwacu Julienne
Umuyobozi Mukuru w'Ikigo gishinzwe Mine, Peteroli na Gaz, Francis Gatare na we yitabiriye uyu mwiherero
Umujyanama wa Perezida Kagame mu by'Umutekano, Gen James Kabarebe
Visi Perezida wa Sena ushinzwe iby’Amategeko no kugenzura ibikorwa bya Guverinoma, Nyirasafari Espérance
Minisitiri w'Ubutegetsi bw'Igihugu, Prof Shyaka Anastase
Bernard Makuza wabaye Perezida wa Sena na Minisitiri w'Intebe mu bitabiriye uyu mwiherero
Minisitiri w’Urubyiruko n’Umuco, Mbabazi Rosemary n'Umunyamabanga wa Leta muri Minisiteri y'Ubuhinzi n'Ubworozi, Ngabitsinze Jean Chrysostome, batanga ikiganiro
Visi Guverineri wa Banki Nkuru y’u Rwanda (BNR), Dr Monique Nsanzabaganwa, ni Umuyobozi wungirije wa Unity Club
Dr Charles Murigande wabaye Minisitiri w'Ububanyi n'Amahanga n'Ubutwererane (2002-2008) na we yitabiriye umwiherero

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .