Madamu Jeannette Kagame yahishuye ibanga ryo kugira umuryango mwiza

Yanditswe na Ferdinand Maniraguha
Kuya 9 Ugushyingo 2018 saa 11:56
Yasuwe :
0 0

Umuyobozi Mukuru w’Umuryango Unity Club Intwararumuri, Madamu Jeannette Kagame, yasabye abagore bari mu nzego z’ubuyobozi guharanira kugira imiryango myiza kugira ngo abo bayobora babigireho.

Yabitangaje kuri uyu wa Gatanu tariki 9 Ugushyingo ubwo yagezaga ijambo mu mwiherero w’abagore bagize umuryango Unity Club Intwararumuri, uhuriza hamwe abagize Guverinoma, abigeze kuyibamo ndetse n’abo bashakanye.

Madamu Jeannette Kagame yavuze ko igihe cyose imiryango igize umurengwe hakagira indangaciro yibagirwa, birangira habaye ibintu bibi mu gihugu.

Mu kiganiro yagejeje ku bitabiriye umwiherero wa gatatu wa Unity Club, yabasangije ibanga rimufasha kuzuza inshingano nyabutatu z’umugore ari zo: kuba umugore, kuba umubyeyi no kuba umuyobozi.

Yagize ati “Nta rindi banga usibye kwibuka ko ubuzima, inshingano, ari urugendo. Ntawe ukwiye kwibeshya ko ari igitangaza kuko bishobora kukubuza guhora ushakisha uko wakwivugurura.”

Yifashishije inyandiko umuhanga Dr Garry Olivier yise ‘Keys to Building Strong Families’, yavuze ko umubyeyi mwiza ari uwirinda kwereka ingeso mbi umwana we.

Yavuze ko umwana uko yaba angana kose abona ibyo ababyeyi be bakora, ku buryo amaze gukura abyigana bikamugiraho ingaruka no ku muryango azubaka.

Ati “Ibyo abana bacu babyiruka babona ni nabyo bashobora gukora iyo bamaze gukura. Uwiba ahetse aba abwiriza uwo mu mugongo.Wirinde ko umwana yazakunenga ko hari ibyo wamutoje bibi.Ntitugasuzugure uko bangana kose, nta na rimwe baba bato ku buryo batabona.”

Yavuze ko kandi kugira umuryango mwiza bisaba kuwuha umwanya no kumenya kugwa neza no mu gihe umwe mu bashakanye agize umujinya.

Madamu Jeannette Kagame yavuze ko ubusanzwe uburakari atari ikintu kibi igihe abo mubana bagufashije kuwugenzura neza.

Ati “Abantu benshi babona uburakari nk’ikintu kibi nyamara ni kimwe mu marangamutima ashobora kubaho. Mu muryango wubatse neza, abantu baba bafitanye icyizere bityo bakaba bafasha ugize umujinya akabasha kuwivanamo neza. Uburakari bwiza butuma ubasha no guhindura byinshi. Iyo ibintu ntacyo bigutwara nta n’icyo ubasha guhindura.”

Yavuze ko ingo nyinshi zidasenywa no kuba bafite ibyo batumvikanaho, ahubwo zisenywa no kutabasha gushakira ibisubizo nyabyo ibibazo bafitanye.

Yibukije abagore by’umwihariko abagize Unity Club gukomera ku miryango yabo kandi bakibuka ko no gufasha abo bayoboye kugira imiryango myiza.

Abandi batanze ibiganiro barimo Minisitiri w’ubutegetsi bw’igihugu, Prof Shyaka Anastase wavuze ko abanyarwanda bakwiriye kongera guha agaciro inyigisho ziri mu muco nyarwanda.

Shyaka yavuze ko mu muco nyarwanda harimo ibintu byinshi byakubakirwaho ariko bifatwa na bamwe nk’ibyashaje bakabisuzugura.

Ati “Guteshuka ku njishi z’umuco tukaba twaranateshutse no kuzubakiraho cyane ku rwego rw’umuryango, bishobora kuba imbogamizi izaduhenda niba tutayigaruye vuba inzira zikigendwa. Haraza ibintu bishya bigezweho tugatyara, ugasanga abantu bashyushye ibyacu tukabita, hakaza n’ikintu kibi kitwangiriza urubyiruko kivuga ko ibya kera ari bibi.”

Shyaka yavuze ko umuco w’urukundo no kwihangana mu muryango bikwiye kongerwamo ingufu, kugira ngo imiryango irindwe gusenyuka ikiri mito.

Umuyobozi Mukuru w’Ikigo gishinzwe kugenzura iyubahirizwa ry’uburinganire n’ubwuzuzanye mu iterambere (GMO) Rose Rwabuhihi yasabye abagore kwirinda gupfa ubusa n’abagabo babo bitwaje uburinganire, ahubwo bagaharanira kubona ibikomeye abagabo babo bakora.

By’umwihariko yasabye abagore b’abayobozi kutiyumva nk’abanu bakomeye, kugeza aho banga kugisha inama kandi bahuye n’ibibazo.

Muri uyu mwiherero hanatorewemo abayobozi bashya ba Unity Club Intwararumuri, aho visi perezida wa mbere yabaye Dr Monique Nsanzabaganwa, visi perezida wa kabiri aba Solange Kayisire naho umubitsi aba Sylvie Ngirente.

Hanatowe abayobozi ba komisiyo zitandukanye.

Kuri uyu munsi, Abagize umuryango Unity Club banasuye Inzu ndangamateka y’ urugamba rwo guhagarika Jenoside.

Perezida w'Umutwe w'Abadepite Donatille Mukabarisa ageza ijambo ku bitabiriye umwiherero wa Unity Club
Madamu Jeannette Kagame ageza ijambo ku bitabiriye umwiherero wa gatatu w'abanyamuryango ba Unity Club kuri uyu wa Gatanu
Madamu Jeannette Kagame yavuze ko ubusanzwe uburakari atari ikintu kibi igihe abo mubana bagufashije kuwugenzura neza
Minisitiri w’ubutegetsi bw’igihugu, Prof Shyaka Anastase yavuze ko abanyarwanda bakwiriye kongera guha agaciro inyigisho ziri mu muco nyarwanda
Madamu Jeannette Kagame hamwe na Mukabalisa uyobora Umutwe w'Abadepite, mu mwiherero wa gatatu wa Unity Club
Madamu Jeannette Kagame mu ifoto y'urwibutso n'abanyamuryango ba Unity Club, bitabiriye umwiherero wo kuri uyu wa 9 Ugushyingo 2018
Aha Madamu Jeannette Kagame yari mu ifoto y'urwibutso hamwe n'abagore bagize Inteko Ishinga amategeko, mu mwiherero wa gatatu wa Unity Club
Ubwo abagize Unity Club basuraga Ingoro y'amateka yo guhagarika Jenoside
Abanyamuryango ba Unity Club babanje gusura Ingoro y'Amateka yo guhagarika Jenoside yakorewe Abatutsi, iri mu Ngoro y'Inteko Ishinga amategeko
Abagize Unity Club bagize umwanya wo kuzirikana ku mateka y'urugamba rwahagaritse Jenoside yakorewe Abatutsi

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza