Madamu Jeannette Kagame yaganuje abana barenga 200 iminsi mikuru ya Noheli n’Ubunani (Amafoto)

Yanditswe na Ishimwe Israel
Kuya 9 Ukuboza 2018 saa 06:16
Yasuwe :
0 0

Mu mpera za buri mwaka, Madamu Jeannette Kagame, yakira abana bahagarariye abandi mu gihugu mu musangiro wo kubifuriza noheli nziza n’umwaka mushya muhire.

Icyumweru cyo ku wa 9 Ukuboza 2018, cyabaye icy’ibyishimo ku bana barenga 200 baturutse mu turere 30 tw’u Rwanda bakiriwe na Madamu Jeannette Kagame.

Aba bana bari hagati y’imyaka irindwi na 12, bidagaduye binyuze mu mikino, bavuga imivugo n’amazina y’inka, bararirimba n’ibindi.

Madamu Jeannette Kagame yabakiriye, anabaha impanuro za kibyeyi z’imyitwarire ikwiye kubaranga.

Yagize ati “Mugomba kubaho mufite intego. Niba ushushanya ugomba kwiha umubare w’ibyo uzakora. Uwandika imivugo nawe akagira umubare yiha. Mugomba gutegura gahunda zanyu, mukazubahiriza, mukagira n’umwanya wo gusoma no gukora ibindi bibafasha kwiyungura ubumenyi”

Yabwiye abana ko ibyo biyemeje bazabigeraho bafatanyije n’abandi cyane cyane ababyeyi babo.

Ati “Nitugera mu rugo dushake aho twandika intego tuzaharanira kugeraho nibura buri kwezi. Iki ni igihe cyo gufata ingamba z’umwaka. Twumvise ibyo mwifuza, abo dufatanya babateze amatwi, tuzakurikirana turebe uko twabigeraho. Ababyeyi n’ababarera mujye mubasangiza ibyo mwanyuzemo ku ishuri, ntimuzatinye kubabwira ibibari ku mutima, ntimukajye gushaka inama ahandi, mutavuganye n’ababyeyi.”

Yanabibukije ko bakwiye kurangwa n’isuku ku mubiri, bakanafasha ababyeyi babo ndetse bakagira uruhare aho batuye.

Abana bashimye gahunda zegerejwe abaturage zikabafasha kwiga ndetse abinangiraga kwiga bakarigarukamo bikabafasha kubaho neza.

Niyonkuru Fabrice wo mu Murenge wa Kagano mu Karere ka Nyamasheke yavuze umuvugo ushima ubutwari bw’abitangiye gukura abaturage muri Nyakatsi, bakanabafasha kugerwaho n’uturima tw’igikoni.

Yagize ati “Ndashimira Perezida Kagame n’Umubyeyi Jeannette Kagame badutangiye mituweli, ntawe ukirwara ngo arembere mu nzu. Ubu turiga, tukanatsinda. Batuzaniye Girinka Munyarwanda natwe tunywa amata yera. Ndashima ko yaduteje imbere mu turere twose.”

Cyuzuzo Kellya w’imyaka 12 wiga Camp Kigali yashimishijwe no gutumirwa mu birori ndetse ku mukoro bahawe avuga ko yiteguye “gukangurira abandi bana kurangwa n’isuku no gufasha ababyeyi”.

Abana bitabiririye ibi birori ni abatoranyijwe kubera ubuhanga bagaragaje mu ishuri, hakanazirikanwa abava mu miryango itishoboye n’abafite ubumuga bwihariye. Basangiye, banasabana n’ab’abakozi bo mu Biro by’Umukuru w’Igihugu, Imbuto Foundation n’Umuryango Unity Club Intwararumuri uhuza ababarizwa n’abahoze muri guverinoma.

Bahawe impano z’iminsi mikuru ya Noheli n’Ubunani. Banasusurukijwe na Uwiringiyimana Patience ufite ubuhanga mu gukora ubugeni bwo kuvugisha agapupe yise ‘Golizo the Crazy’, abana bagize itsinda rya Rwanda Rocks Music School n’indi mikino itandukanye yari yateganyijwe.

Madamu Jeannette Kagame mu ifoto y’urwibutso n’abana bari bitabiriye uyu munsi
Madamu Jeannette Kagame ashimira umwe mu bana bari bitabiriye uyu musangiro watsinze neza amasomo ye
Madamu Jeannette Kagame ari kumwe na korali y’abana bo mu ishuri rya muzika rya Rwanda Rocks music baririmbye muri ibi birori
Abana babonye umwanya wo kugaragaza impano zabo mu mivugo
Ibi birori byabereye mu busitani bwa Village Urugwiro, Ibiro by’Umukuru w’Igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza