00:00:00 IGIHE NETWORK KN KINYARWANDA EN ENGLISH FR FRANCAIS

M23 yanyomoje Monusco yasohoye umubare w’abiciwe Kishishe itahageze

Yanditswe na Umwali Zhuri
Kuya 9 Ukuboza 2022 saa 03:04
Yasuwe :

Umutwe wa M23 wamaganye ubuyobozi bw’Ubutumwa bwa Loni bugamije kugarura amahoro mu Burasirazuba bwa Congo (MONUSCO) bwasohoye itangazo bushinja uwo mutwe kwica abaturage mu gace ka Kishishe gaherereye i Rutshuru muri Kivu y’Amajyaruguru.

Kuwa Gatatu tariki 7 Ukuboza nibwo Monusco yashyize hanze itangazo, ivuga ko iperereza ry’ibanze yakoze ryagaragaje ko abaturage 131 aribo biciwe i Kishishe, bikozwe n’umutwe wa M23 ubwo yari mu mirwano n’imitwe yitwaje intwaro irimo FDLR, Nyatura, Mai-Mai n’indi.

Monusco yatangaje ko byabaye mu mirwano yahuje izo mpande zombi mu duce twa Kishishe na Bambo tariki 29 na 30 Ugushyingo 2022. Icyakora mu itangazo, Monusco ivuga ko itabashije kugera aho byabereye ahubwo yabivanye mu buhamya yahawe n’abahunze iyo mirwano baherereye ahitwa Rwindi, mu birometero 20 uvuye Kishishe.

Kuri uyu wa Gatanu M23 yasohoye itangazo yamagana iryo perereza rya Monusco, ivuga ko bitumvikana uburyo babashije kumenya umubare w’abapfuye bose kandi batarahageze.

Uyu mutwe wagize uti “Twatunguwe no kubona umuryango nka Monusco ukora ibintu biciriritse nk’ibi. Mu itangazo Monusco yivugiye ko byabereye Kishishe na Bambo, nyamara muri Bambo nta mirwano irahabera guhera tariki 21 Ugushyingo.”

M23 kandi ivuga ko itumva uburyo Monusco yananiwe kuza kwirebera ibyabaye ngo itange amakuru y’ibyo yabonye, kandi uwo mutwe waratanze ikaze ku miryango n’izindi nzobere mpuzamahanga zishaka gukora iperereza ku bwicanyi ushinjwa.

M23 yavuze ko nta cyizere igifitiye Monusco kuko yamaze gufata uruhande muri ibi bibazo, ikemera gufatanya na Guverinoma ya Congo hamwe n’imitwe nka FDLR, Nyatura, Mai Mai n’indi.

Mu mpera z’icyumweru gishize Leta ya Congo yashyizeho icyunamo cy’iminsi itatu mu gihugu hose, bunamira abaturage biciwe Kishishe. Icyo gihe Leta yavugaga ko abapfuye bagera ku 121, mu gihe M23 yaje gushyira hanze irindi tangazo, ivuga ko iperereza ryayo ryagaragaje ko hapfuye abantu 28 barimo abaturage umunani n’inyeshyamba 20.

RDC iherutse gushyiraho icyunamo cyo gusabira ubutabera abaturage baguye Kishishe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .