Mushikiwabo na Charles Michel bakurikiranye uko ibikorwa byo gukingira COVID-19 byagenze mu Bugesera

Yanditswe na IGIHE
Kuya 7 Werurwe 2021 saa 12:56
Yasuwe :
0 0

Umunyamabanga Mukuru w’Umuryango w’Ibihugu bivuga Igifaransa, OIF, Louise Mushikiwabo na Perezida w’Akanama k’Umuryango w’Ubumwe bw’u Burayi, Charles Michel bari mu ruzinduko mu Rwanda aho basuye Ikigo Nderabuzima cya Mayange mu Karere ka Bugesera bareba uko ibikorwa byo gukingira Coronavirus biri kugenda.

Uretse Louise Mushikiwabo na Charles Michel, uru ruzinduko rwitabiriwe kandi n’Umudepite mu Nteko y’Ubumwe bw’u Burayi, Chrysoula Zacharopoulou. Baherekejwe na Minisitiri w’Ubuzima, Dr Daniel Ngamije n’uw’Ububanyi n’amahanga, Dr Vincent Biruta.

Chrysoula Zacharopoulou usanzwe ari inzobere mu buvuzi bw’abagore yagaragaye atanga urukingo rwa COVID-19 kuri bamwe mu bantu batoranyijwe bagomba kuruhererwa kuri iki kigo nderabuzima cya Mayange.

Kuri iki kigo nderabuzima hakingiriwe abakora mu nzego z’ubuzima, abarimu ndetse n’abakuze.

Amakuru dukesha RBA avuga ko Mushikiwabo wanabaye Minisitiri w’Ububanyi n’Amahanga w’u Rwanda yashimye uburyo rwitwaye mu rugamba rwo guhashya COVID-19 by’umwihariko uburyo rwihutishije ibikorwa by’ikingira, avuga ko OIF izakomeza gukora ubuvugizi kugira ngo ibihugu binyamuryango bibone inkingo binyuze muri gahunda ya COVAX ndetse no mu butwererane.

Perezida w’Akanama k’Umuryango w’Ubumwe bw’u Burayi, Charles Michel we yashimye ko u Rwanda rwihutiye kugeza inkingo ku bazikeneye kandi hose mu gihugu n’imitangire yazo inoze kubera gukoresha ikoranabuhanga.

Yavuze ko ibi bishimangira uburyo u Rwanda rukomeje kwitwara neza mu rugamba rwo guhangana n’iki cyorezo, yizeza ko Umuryango w’Ubumwe bw’u Burayi ukomeje gukora ibishoboka byose ngo hakorwe inkingo zihagije kandi zigere hose.

Ambasaderi w’Ubumwe bw’u Burayi mu Rwanda, Nicola Bellomo yashimye umuhate w’u Rwanda mu kwita ku buzima bw’abaturage barwo, hashakishwa inkingo za Covid-19.

Yagize ati “Twishimiye kwifatanya n’u Rwanda rwakira inkingo za mbere za Covid-19 zatanzwe binyuze muri Covax. Umuryango w’Ubumwe bw’u Burayi urajwe ishinga no kugeza inkingo kuri bose, bijyanye na gahunda yayo y’uburinganire n’ubufatanye. U Burayi ni umwe mu baterankunga b’Imena ba Covax, aho umaze gutanga miliyari 2.2 z’amayero. Turashima imyiteguro ya Guverinoma y’u Rwanda yatumye kiba kimwe mu bihugu bya mbere byabonye inkungo za Covid-19. “

Aba bayobozi bari mu Rwanda mu rwego rwo gushyigikira no kugira uruhare muri gahunda yo gutanga urukingo rwa COVID-19, u Rwanda rwakiriye binyuze muri COVAX.

Kugeza ku wa 6 Werurwe mu Rwanda hose urukingo rwa COVID-19 rumaze guhabwa abagera ku bihumbi 160 barimo 83 942 bakingiwe ku wa Gatandatu.

Louise Mushikiwabo na Charles Michel basuye Ikigo nderabuzima cya Mayange
Bagize umwanya wo kuganira n'abayobozi b'iki kigo nderabuzima
Chrysoula Zacharopoulou yakingiye umwe mu baturage kuri iki kigo nderabuzima
Chrysoula Zacharopoulou ni Umudepite mu Nteko y'ibihugu by'Ubumwe bw'u Burayi ariko akaba n'umuganga
Mushikiwabo na Michel baganira na Minisitiri w'Ubuzima,Dr Daniel Ngamije
Minisitiri w'Ububanyi n'Amahanga, Dr Vincent Biruta nawe yari yitabiriye iki gikorwa

Amafoto: Minisante


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .