LIVE: Kurikira umuhango wo gushyingura Senateri Bishagara Kagoyire Thérèse (Amafoto)

Yanditswe na Cyprien Niyomwungeri
Kuya 19 Nyakanga 2019 saa 09:57
Yasuwe :
0 0

Mama Tereza Nyagasani amwiyereke iteka maze aruhukire mu mahoro. Umuryango wa Senateri Bishagara Kagoyire Thérèse, inshuti ze, abo bakoranye, abo bakoranaga n’abandi bamuzi, kuri uyu wa Gatanu baramukiye mu muhango wo guherekeza mu cyubahiro uyu mubyeyi wari imfura kuri bose.

16:30 Umurambo wa Senateri Bishagara urimo gushyingurwa mu irimbi rya Rusororo mu Karere ka Gasabo.

15:05 Imihango yo guherekeza Senateri Bishagara yaberaga muri Regina Pacis, irahumuje, hakurikiyeho kujya gushyingura mu irimbi rya Rusororo.

Umugabo wa Senateri Bishagara yavuze ko icyo yishimira ari uko apfuye azi Imana

Yarwaye iminsi mike kuva mu kwa Gatatu mu kwa Gatandatu birarangira. Ushobora kuba ugenda uyu munsi ariko ejo bigahinduka duhore twiteguye.

Ndashimira Imana ko agiye yiteguye nubwo tubuze umuntu wari ufite ibyiza byinshi, ubunyangamugayo, ukuri, indangagaciro, akunda akazi, yangaga gukererwa, akorera ku gihe ubona ko ari ibidasanzwe. Hari ubwo twamubwiraga ngo urakabije ugiye kare ati “Mfite ibyo ngiye gusoma mu biro”.

Tereza yitabye Imana yiteguye, twarabiganiraga tukavuga ko apfuye azi Imana. Ndabashishikariza kumenya Imana kuko umunsi umwe twabyemera tutabyemera tuzahura nayo ari ko se tuzahura tumeze gute. Buriya umuntu akwiye gufata umwanya agatekereza ku iherezo rye.

Kumenya Imana ni ibintu bikomeye cyane. Yabyukaga kare yari afite Bibiliya akansomera ijambo tukaganira tukareba icyo ijambo ry’Imana rishatse kuvuga.

Baradufashije cyane dushaka gutaha yaba ibisabwa hano no muri Amerika. Byarashobotse turaza ariko mu minsi ya nyuma yakundaga gusenga indirimbo z’Imana tukaganira, ubukristu bwe bwaramufashije cyane.

Yahoraga afite akabaraga avuga ibyo akazi ariko byongeye gusubira inyuma kugeza ubwo yitabye Imana. Turashimira abo bakoranaga Perezida wa Sena yaraduhamagaraga n’abo bafatanyije bajyaga baduhamagara, batwoherereza ubutumwa.

Yarambwiye ngo ndabona ubuzima butameze neza tujya muri Amerika numva tuzagarukana ubwo niteguraga kugaruka yongeye asubira inyuma dusubira mu bitaro twamazemo ibyumweru bitatu.

Turashimira Perezida wa Repubuliaka mu nshingano yamuhaye ari ibirebana n’amashuri kugeza ubu yari mu Nteko Ishinga Amategeko, umutwe wa Sena

Murumuna wa Senateri Bishagara yavuze ko yamufataga nka Mama we kuko batangiye kubana afite imyaka 15
Dr Jeremie wakoranye na Senateri Bishagara yavuze ko bazahora bamwibukira kuri byinshi
Umwe mu bana ba Senateri Bishagara yavuze ko indangagaciro yabatoje bazazikurikiza
Abana ba Senateri Bishagara ubwo bavugaga ku mubyeyi wabo witabye Imana

14:50 Umugabo wa Bishagara yatangiye avuga ko bitoroshye kuvuga kuri Tereza, bashakanye babanye.

“Yakundaga igihugu, yadushishikarije gusenga kuko ndibuka ko isengesho rya mbere nsenga ari iryo yanyigishije”.

“Yadutoje kubaho mu muryango kandi yarabidushishikarizaga. Ntiyigeze avuga ngo aba ni ab’iwacu aba ni abo kwa Papa, yadutoje gukunda bose no kubasura nta kuvangura kandi agafasha bose”.

14:40 Umwe mu bana ba Senateri Bishagara yagize ati “Yatwigishije indangagaciro. Yari umuntu ugukosora mu kinyabupfura akakubwira icyo atekereza ataguhutaje cyangwa ngo akwereke ko wakoze amahano”.

Ntabwo yakoreye ku jisho ni nabyo dukwiye kuraga abana bacu. Yari intangarugero, agashishoza ntahubuke. Yari ifite indangagaciro zihebuje byose abikesha kwemera Imana. Isengesho rye yarishyiraga mu bikorwa niwo murage asigiye abana be natwe niwo adusigiye.

Yari afite ubwitange butagira urugero. Yarumvaga cyane aho kuvuga yakugiraga inama. Yaraguhamagaraga wowe ukigaya. Abakozi bose baziraga igihe kuko yabaga yahageze wakererwa ukumva ufite isoni.

14:32 Ababanye na Senateri Bishagara muri KHI bagize bati “Ntabwo adusigiye umugani adusigiye umurage. Adusigiye indangagaciro, yarashishozaga, ntiyahubukaga, yakoreraga ku cyerekezo. Mu 1996 niwe watangije KHI ntabwo ryari ryarigeze kubaho.

Mama Tereza yari umubyeyi wa bose, namwitaga mama kubera urukundo yampaye nk’umwana we, ubuntu n’ineza yagiraga byari iby’umubyeyi n’abana be. Yakiraga buri wese. Yari umugore w’agaciro, uvugira buri wese.

Uwo bakoranye witwa Dr Jeremie Zungurana, ari umwe mu bagize inama y’ubutegetsi ya White Ribbon Alliance igamije kurengera ubuzima bw’abagore n’abana.

Ndashimira ubuyobozi bw’igihugu cyacu kuba baradufashije. Perezida wa Sena na ba Visi Perezida bakurikiranaga umunsi ku wundi uko ubuzima bwe bumeze. Yashimiye ambasade y’u Rwanda muri Amerika

“Nagiriwe umugisha wo kubana nawe arwaye twabanye ukwezi n’ibyumweru bitatu. Yari agikora no mu bitaro baramubonaga bakabona hari ikinyuranye. Yitaba Imana yagiye neza ari ahantu heza hihariye”.

Umuvandimwe we babanye afite imyaka 15, yavuze ko amufata nka mama n’abana yabyaye akabafata nka barumuna be.

14:08 Igitambo cya Misa cyo gusabira Senateri Bishagara kirahumuje, hakurikiyeho amagambo y’abo umuryango wahisemo ngo bavuge ku buzima bw’uyu mubyeyi.

Mu nyigisho ye, Padiri yagendeye ku isomo rya mbere aho bavuga ngo ‘Ninde washinja intore y’Imana’. Agira ati “Tereza ni intore y’Imana yaba mu bigaragara n’ibitagaragara”.

Mu 2000 hari ibisigisigi bya Jenoside, namushinze umwana aramwakira aramufasha ubu ni umugabo ufite umugore n’abana. Nabuze icyo namuha kuko inka arazifite, amafaranga arayafite. Kuko agiye ntaramushimira, mwampaye uburyo bwo kumushimira nkamutura Imana muri iki gitambo cy’Ukaristiya.

13:20 Padiri avuze ko mu 2000 Tereza yamugiriye ikintu cyiza kibyara imbuto nyinshi nyuma baza gusangira ariko uko bahuye akumva afite inkomanga y’ineza yamugiriye.

Perezida w'Umutwe wa Sena Bernard Makuza
Perezida w'Umutwe w'Abadepite Mukabalisa Donatille
Senateri Ntawukuriryayo Jean Damascene mu misa yo gusabira mugenzi we Senateri Bishagara
Umunyamabanga Mukuru wa FPR, Ngarambe (ubanza), Perezida w'Umutwe w'Abadepite Mukabarisa na Perezida w'Umutwe wa Sena Bernard Makuza
Umunyamabanga Mukuru wa FPR Inkotanyi Ngarambe mu gitambo cya Misa cyo gusabira Senateri Bishagara
Padiri Mukuru wa Paruwasi Regina Pacis yavuze ibigwi Senateri Bishagara

13:00 Padiri Mukuru w Paruwasi ya Regina Pacis atangiye yihanganisha abo mu muryango wa Senateri Bishagara n’abo bakoranaga, abasaba kumutura Nyagasani mu kwemera kuruta agahinda kuko asanze Imana.

12:52 Igitambo cya Misa cyo gusabira Senateri Bishagara kigiye gutangira hano muri Paruwasi ya Regina Pacis. Umurambo we urimo kwinjizwa mu Kiliziya ahakoraniye imbaga y’abo mu muryango, inshuti, abo bakoranye n’abamumenye bose. Ni Misa igiye kuririmbwa na Chorale Christus Regnat yo kuri iyi paruwasi.

Umuhango wo gusezera mu cyubahiro Senateri Bishagara ukomereje muri Paruwasi Gatolika ya Remera yitiriwe umwamikazi w’amahoro ’Regina Pacis’.

Umurambo wa Senateri Bishagara ubwo wagezwaga kuri Paruwasi Regina Pacis
Chorale Christus Regnat niyo yaririmbye misa yo gusabira Senateri Bishagara

Ubwo yabaga aramutsa cyangwa asezera umuntu yaravugaga ngo ‘God Bless You’. Mama tereza tubuze uwadukundaga kandi twakundaga. Uretse imirimo dushinzwe twakoranye kandi ukayitangira ntituzibagirwa urukundo, ituze n’ubupufra byakuranze muri twe, nk’uko wabidutoje tugusezeye mu cyubahiro tukunamira nk’uko wabidutoje tugira tuti ‘God bless you’, uruhukire mu mahoro tuzahora tukwibuka.

Turamushimira umutima wa kibyeyi wamuranze kandi dusaba Imana yizeraga ngo ikomeze umuryango we.

Ntigiyeze akererwa cyangwa ngo asibe muri gahunda za sena n’ibindi nk’umunyepolitiki ufite umutima kereka muri Mata atangiye kwivuza. Icyo gihe abamuvugishaga n’abamusuraga yabiseguraho ko ataza mu kazi akababazwa no kumva ko yaba ari kuvunisha abandi mu nshingano basangiye akabakomeza ngo ‘Courage’

Indangagaciro twamubonyeho muri sena sinshidikanya ko tuzihuriyeho n’abandi, ubushishozi, ubwitange, gukoresha ukuri, kuvuga make ya ngombwa, gutega amatwi abandi, kugaragariza urukundo buri wese, gufatanya n’abandi kugira umurava mu byo ashinzwe, ni inyangamugayo.

Abakoranye nawe tumuziho cyane gushyira imbere ubufatanye. Kamere ye n’imirimo itandukanye yakoze byamwubatsemo inararibonye ryamufashije kuzuza imirimo yahawe ya sena. Yaranzwe no gushyira imbere inyungu z’igihugu n’abanyarwanda, agashyira imbere ubuvuzi, uburezi, ubumenyi, iterambere ry’umwana w’umukobwa n’umugore agashyira imbere ibyateza imbere umuryango.

Mu mikorere ye nk’umusenateri yarangwaga no kwakira no kwitangira inshingano ahawe akazikorana umurava n’ubushishozi kandi agashyira imbere gufatanya n’abandi.

Mama Tereza yari imfura cyane twese abakoranye nawe, abamumenye tuzi urukundo rwamuranze, uburyo yicishaga bugufi agashyira mu gaciro muri byose, agasabana n’ab’ingeri zose, yaranzwe n’urukundo muri we no ku bandi. Yari ‘Peacemaker’.

Yakomeje agira ati “Ni igihombo ku muryango we, kuri sena no ku gihugu. Tubuze umuyobozi w’umuhanga, wacishaga make, wagiraga ubuhanga n’ubushishozi mu mirimo ye, akubahirwa umutima wa kibyeyi wamurangaga”.

Abagize Sena tuzakomeza kubanira abo asize nk’uko yabikoze nubwo kubishyikira bitoroshye kuko yari indashyikirwa. Uyu mwanya dusezera Mama Tereza, turamushimira ibyamuranze asize nk’umurage.

Ati “Tubuze ingirakamaro, twakundaga buri wese yisangagamo buri muntu abura amagambo akwiye yo kubivuga”.

11:25 Perezida wa Sena Bernard Makuza yavuze ko Senateri Bishagara yari umugore warangwaga n’ubwuzu n’ubwitonzi bityo kumubura ntawe bitashengura.

Mu muryango FPR Inkotanyi, Senateri Bishagara yari muri komisiyo ishinzwe iterambere ry’umugore akaba mu itsinda ry’abakurikirana Akarere ka Rubavu.

Ngarambe ati “Intore y’umuryango wa FPR, atabarutse tukimukeneye, tuzahora tumwibukira ku bikorwa bye asize umurage mwiza.

11:12 Umunyamabanga Mukuru w’Umuryango FPR Inkotanyi, Senateri Bishagara yari abereye umunyamuryango, Ngarambe François, ati “Senateri Bishagara Umuryango FPR Inkotanyi, yawubereye intore yizewe, yafatanyije n’abandi mu mirimo yo gushyigikira urugamba rwo kubohora igihugu, ageze mu Rwanda yashinzwe imirimo itoroshye ariko yaranzwe no gukunda umurimo, kuzuza inshingano ze, akarangwa n’ubushishozi agakorana n’abandi, atabarutse ataragawa.

Perezida wa Sena Bernard Makuza yavuze ko batazibagirwa ingero nziza bigiye kuri Mama Tereza
Minisitiri muri Perezidansi Judith Uwizeye yagejeje ku muryango wa Bishagara ubutumwa bwa Perezida wa Repubulika
Minisitiri muri Perezidansi, Judith Uwizeye ari kumwe na Perezida wa Sena, Makuza Bernard n'Umunyamabanga Mukuru wa FPR Inkotanyi, Ngarambe François mu muhango wo guherekeza nyakwigendera
Kagoyire yanasezeweho bwa nyuma n'abo bakoranye mu Nteko Ishinga Amategeko y'u Rwanda by'umwihariko mu Mutwe wa Sena
Senateri Makuza aheruka gutangariza IGIHE ko Sena y’u Rwanda yabuze umuntu wakundaga umurimo akaba n'inyangamugayo

11:05 Minisitiri muri Perezidansi ya Repubulika Judith Uwizeye, atangiye yihanganisha abo mu muryango wa Senateri Bishagara. Asomeye abateraniye mu cyumba cya Sena ubutumwa bwa Perezida Kagame yageneye umuryango wa Senateri Bishagara

Ati “Nyakubahwa Perezida Kagame n’umuryango we bababajwe no kumenya inkuru y’akababaro y’urupfu rwa Senateri Kagoyire. Yagiye akorera igihugu mu nzego zitandukanye, yaranzwe n’ukuri, umurava n’ubwitange.”

Yakomeje agira ati “Tubuze umuyobozi wakundaga igihugu n’abanyarwanda. Imana imuhe iruhuko ridashira”.

Ba Visi Perezida ba Sena, Gakuba Jeanne d'Arc na Fatou Harelimana mu muhango wo kunamira mugenzi wabo muri Sena
Umunyamabanga wa Leta ushinzwe Itegeko Nshinga n'andi Mategeko Evode Uwizeyimana na Minisitiri ushinzwe Imirimo y'Inama y'Abaminisitiri, Solange Kayisire
Perezida w'Umutwe w'Abadepite Mukabalisa Donatille yifatanyije n'abasenateri mu kunamira mugenzi wabo Bishagara
Depite Dr Frank Habineza akaba n'Umuyobozi w'Ishyaka Riharanira Demokarasi n'Ibidukikije mu Rwanda (Democratic Green Party of Rwanda) yifatanyije na bagenzi be kunamira Senateri Kagoyire
Umunyamabanga Mukuru wa FPR Inkotanyi Ngarambe yavuze ko Senateri Bishagara yari intore nyayo

10:55 Umurambo wa Senateri winjijwe mu cyumba cya Sena cyakoraniyemo bagenzi be b’abasenateri, abadepite, bamwe mu bagize Guverinoma, abahagarariye ingabo na polisi, abo mu muryango we, inshuti n’abavandimwe.

10:05 Umubiri wa Senateri Bishagara ujyanywe mu Nteko Ishinga Amategeko aho agiye gusezerwaho mu cyubahiro nk’umwe mu bari bagize Sena y’u Rwanda

Ubwo umurambo wa Senateri Bishagara wari ugiye kujyanwa ku Nteko Ishinga Amategeko
Umurambo wa Senateri Bishagara ujyanywe mu modoka ngo werekeze ku Nteko Ishinga Amategeko
Senateri Bishagara Kagoyire Thérèse yasezeweho mu cyubahiro
Kagoyire yasezeweho bwa nyuma aratwa ibigwi byo kwitangira umurimo no gukunda bose atarobanuye

Senateri Bishagara yitabye Imana kuwa Mbere, tariki ya 8 Nyakanga 2019, aguye mu bitaro bya John Hopkins biri muri Baltimore mu Mujyi wa Maryland muri Leta zunze Ubumwe za Amerika aho yivurizaga.

Mu ijoro ryo kuwa Kabiri w’iki cyumweru nibwo umubiri we wagejejwe mu Rwanda uvanywe muri Leta Zunze Ubumwe za Amerika aho yaguye. Inshuti n’abavandimwe hamwe n’abandi bo mu muryango wa nyakwigendera nibo bari ku kibuga cy’indege i Kanombe ahagana saa mbili z’ijoro ubwo wagezwaga i Kigali.

Senateri Bishagara yavutse kuwa 25 Ukuboza 1952, akaba yari umusenateri uhagarariye Intara y’Uburengerazuba. Yari afite impamyabumenyi y’icyiciro cya kabiri cya Kaminuza mu bijyanye n’ibinyabuzima (Molecular Biology Sciences).

Yakoze imirimo myinshi itandukanye, akaba yitabye Imana ari umwe mu basenateri bagize Inteko Ishinga Amategeko, Umutwe wa Sena, aho yari umwe mu bagize Komisiyo y’Ububanyi n’Amahanga, Ubutwererane n’Umutekano.

Abo bakoranaga bamuvuga ibigwi

Urupfu rwa Senateri Bishagara Kagoyire Thérèse rwababaje benshi cyane abo mu muryango we n’abasenateri bagenzi be babanaga umunsi ku wundi, aho bamufataga nk’umuntu ugira umutima mwiza n’urukundo ku buryo bamwitaga ‘Mama Tereza’.

Mu kiganiro yagiranye na IGIHE, Senateri Makuza yavuze ko Sena y’u Rwanda ibuze umuntu wakundaga umurimo, ufite ubwitonzi n’ubushishozi ndetse akaba yari n’umubyeyi wabaye mu mirimo itandukanye y’igihugu.

Ati “Twamwemeraga bijyanye n’ubuhanga bwamurangaga cyane ubwitonzi n’ubushishozi. Twakundaga kumwita Mama Tereza, bifite icyo bisobanuye. Yari afite umutima w’umubyeyi, umutima wuzuye urukundo ku buryo n’urupfu rubaye yari amaze iminsi arwaye ariko ntitwabonaga ko byagera aho yatabaruka cyane ko yari yagiye kwivuza hanze, na hano yari yivuje ariko ashaka no kujya kugerageza ahandi.”

Senateri Makuza yihanganishije umuryango we, avuga ko ubuze umugore n’umubyeyi; asaba abasigaye muri rusange kumufatiraho urugero rwo kumenya kwitangira akazi no kwicisha bugufi.

Ati “Mu kazi yari nk’umubyeyi cyane kubera umutima n’ubwitonzi ndetse bikazamo n’ubwitange ubona birenze n’imyaka yari afite nubwo atari mukuru cyane ariko yari umwe mu bakuru muri twe.”

Senateri Rugema Michel uyobora Komisiyo y’Ububanyi n’Amahanga , Ubutwererane n’Umutekano ari nayo Kagoyire yabarizwagamo, we yagize ati “Urwibutso ni rurerure kandi ni rwiza. Ni umurage mwiza, inama nziza, gukunda abantu, gukunda akazi, indangagaciro zose za Kinyarwanda yari azuzuje.”

Senateri Uyisenga Charles babanaga muri Komisiyo y’Ububanyi n’Amahanga, Ubutwererane n’Umutekano we yavuze ko yabatoje byinshi.

Ati “Kumwita Mama Tereza, urumva icyo bivuga. Twamufataga nka Mama wacu, nubwo hari benshi twamurutaga. Yari umuntu ukunda amasengesho, ukunda Imana kandi witangira umurimo. ”

"Ntabwo nabona uko mugereranya […] turahombye gusa nta kundi niko ubuzima bumeze. Yadukundishaga amasengesho, ya masengesho yakundaga kuba y’abayobozi urebye muri sena niwe wabidukanguriraga avuga ati muzitabire n’imiryango yanyu. Yari umukirisitu w’intangarugero.”

Ubwo abo mu muryango wa Senateri Bishagara bamusezeragaho mu rugo iwe mu Murenge wa Nyarugenge munsi y'ahazwi nka Camp Kigali
Byari amarira n'ishavu ku bo mu muryango wa Senateri Bishagara
Birababaza cyane kubura uwo wakundaga mu buzima bwawe
Senateri Bishagara yaguye muri Leta Zunze Ubumwe za Amerika aho yari yaragiye kwivuza

Senateri Bishagara yayoboye itsinda ry’ubushakashatsi muri PNLS/CNLS HIV/AIDS Center mu 1995-1996, yabaye umuyobozi wa KHI (Kigali Health Institute muri 1996-2004); umwarimu udahoraho mu yahoze ari Kaminuza Nkuru y’u Rwanda (NUR) mu 1999-2003.

Hagati ya 2008-2011 yabaye umuyobozi ku rwego rw’igihugu w’umuryango JHPIEGO /MCHIP ushamikiye kuri Johns Hopkins University (USAID), umujyanama mu bya tekiniki muri gahunda ya PSI mu 2005-2006.

Mu 2006 kandi yabaye umujyanama mu bya tekiniki muri Save the Children-UK, aba Perezida wa Profemmes Twese -Hamwe na COCAFEM /Great Lakes (2007-2011).

Yabaye mu nama y’ubutegetsi y’icyari ikigega gishinzwe gutera inkunga ibikorwa by’iterambere mu nzego z’ibanze cyaje guhinduka Ikigo gishinzwe iterambere mu nzego z’ibanze (LODA) mu 2007-2011. Yari umwe kandi mu bagize inama y’ubugetsi ya ASSETIF (Association d’Execution des travaux d’interet public) mu 2008-2011.

Mu 2007-2011 yabaye umwe mu bagize inama y’ubutegetsi ya Kaminuza yigenga ya Kigali (ULK), yari umwe mu bashinze akaba no mu nama y’ubutegetsi ya FAWE Rwanda, kuva mu 1997. Kuva mu 2008-2011 kandi yabaye umwe mu bagize inama y’ubutegetsi ya White Ribbon Alliance igamije kurengera ubuzima bw’abagore n’abana.

Inshuti n'abavandimwe bafashe mu mugongo umuryango wa Kagoyire
Abitabiriye umuhango wo guherekeza Kagoyire bashimye ubugwaneza bwamuranze mu buzima bwe

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza

Article (120709) visits: 8; popularity: 10 Re-process this page