00:00:00 IGIHE NETWORK KN KINYARWANDA EN ENGLISH FR FRANCAIS

Uko Abanyarwanda binjiye mu Mwaka Mushya wa 2023 (Amafoto na Video)

Yanditswe na Ntabareshya Jean de Dieu, Akayezu Jean de Dieu, Israel Ishimwe, Mahoro Vainqueur
Kuya 31 Ukuboza 2022 saa 10:15
Yasuwe :

Abanyarwanda bo mu Mujyi wa Kigali n’abo mu bice bitandukanye by’igihugu binjiye mu mwaka mushya wa 2023 mu byishimo by’ikirenga. Benshi bawukandagiyemo bari imbere y’Imana bayishima ko yabarinze mu mezi 12.

Kuva ku bana bato kugera ku basaza n’abakecuru b’imvi z’uruyenzi basoje umwaka bafite ibyishimo bihambaye.

Bamwe bahisemo gusoreza umwaka no gutangirira umushya mu nsengero ariko abandi basohokanye n’imiryango yabo mu bitaramo bibafasha kwidagadura no kurushaho kwishimira ko bageze iki gihe cy’umwaka bakiri bazima.

Abanyamakuru ba IGIHE basuye insengero, muri za gare n’ahandi hahurira abantu benshi mu kureba uko Abanyarwanda bishimiye gusoza umwaka wa 2022 no kwinjira mu mushya wa 2023.

UKO BYARI BYIFASHE MU MASAHA ABIRI MBERE YO KWINJIRA MU MWAKA MUSHYA WA 2023:

  Ubuhanuzi bwa Apôtre Dr Paul Gitwaza ku mwaka mushya

  Benshi barakesha mu bitaramo byo gushima Imana

Mu nsengero zitandukanye, abakirisitu barasoza ibitaramo mu gitondo cyo kuri iki Cyumweru, tariki ya 1 Mutarama 2023.

Muri BK Arena, ahateraniye abakirisitu bo muri Zion Temple; muri Camp Kigali ahakoraniye abo muri River of Joy and Hope Ministries no muri Kigali Convention Centre ahahuriye abo muri Women Foundation Ministries barakesha.

Mukomeza mugire Umwaka Mwiza wa 2023. Muzahirwe muri byose!!

  Ben na Chance bahawe umwanya banyeganyeza inkuta za KCC

Umuryango w’Abaramyi mu ndirimbo zo kuramya no guhimbaza Imana Ben na Chance bahawe umwanya wo gutaramira abitabiriye iki gitaramo cyabereye muri Kigali Convention center.

Ubwo bahabwaga umwanya saa 1:46 baserukanye indirimbo ziganjemo iz’ishimwe. Bazamukiye mu ndirimbo "Turavuga ishimwe", "Yafashe Imigisha yose", "Uwiteka ni we Mana" n’izindi.

  Hakaswe Cake mu kwinjiza abakirisitu ba Women Foundation Ministries mu Bunani

Saa Saba n’Igice, Apôtre Kabera Mignonne yakase umutsima nk’ubuhanuzi bwinjiza abakirisitu mu mwaka mushya wa 2023 n’ubwo gusabira abantu ibiryo no kutazicwa n’inzara mu bihe bikomeye.

Nyuma yo gukata Cake umugabo we Kabera Eric yahise afata umwanya ashimira Imana yabarinze mu mwaka ushize. Yashimiye umugore we uyobora itorero ririmo abagabo kandi akabayobora neza.

Ati “Icyo nshimiye Imana ni uko Apôtre ashumbye aba bagabo bose kandi nanjye ndimo. Ndagushimira ko ubayobora neza nanjye ukanyobora neza.”

Yashimye abanyetorero umuhate n’umurava bagaragaje mu mwaka ushize binyuze mu gusengera itorero n’umuryango we.

Yasabiye abagabo muri iri torero rya Women Foundation Ministries gukomeza kurindwa n’Imana no kwagurwa nayo.

Apôtre Mignonne yafashe igihe kigera ku isaha n’igice abwiriza ijambo ry’Imana ndetse atangaza n’ubuhanuzi butandukanye yahawe n’Imana muri uyu mwaka mushya wa 2023.

Uyu muvugabutumwa wasizwe yifatanyije n’abitabiriye iki gitaramo mu magambo yavugaga na bo bagasubiramo, yari yujemo ayo gusaba imbaraga z’Imana.

  No mu Ntara haturikirijwe ibishashi by’umwaka mushya

Kuri Nyirangarama mu Karere ka Rulindo na bo binjiye mu mwaka mushya haraswa ibishashi.

Indirimbo y’Umunsi

Mu ndirimbo nyinshi zo kwishimira Umwaka mushya zasohotse, imwe mu ziri gucurangwa cyane uyu munsi ni iyo Deejay Pius yafatanyije na AlynSano hamwe na Bushali bise “Bonane cyangwa se Turawusoza”.

  Muri ADEPR bateranye mu gihugu hose

Mu matorero yose 3140 y’Itorero rya Pantekote mu Rwanda, ADEPR, hakozwe ibitaramo byo gushima Imana no gusengera umwaka wa 2023.

Umushumba Mukuru wa ADEPR, Pasiteri Ndayizeye Isaïe, yateraniye i Ntora ku Gisozi, ahasanzwe hateranira abakoresha indimi z’amahanga.

Muri iki gitaramo, abacyitabiriye bafatanyije n’abahanzi Papi Clever na Dorcas n’umuramyi Chryso Ndasingwa.

Pasiteri Ndayizeye yashimiye abanyetorero n’abafatanyabikorwa uruhare bagize mu gushyigikira icyerekezo cya ADEPR, abasaba gukomeza ubwo bufatanye mu 2023.

Ntora Worship Team yifatanyije n'abateraniye muri Dove Hotel gusoza umwaka neza
Umuyobozi ushinzwe Abakozi n'Ubutegetsi muri ADEPR, Gatesi Vestine
Umushumba Mukuru wa ADEPR, Pasiteri Ndayizeye Isaïe, yashimye uko abanyetorero bitwaye

  Abo kwa Prophet Sultan binjiye mu mwaka mushya mu byishimo

Igitaramo gisoza umwaka cyateguwe na River of Joy and Hope Ministries, Itorero riyoborwa na Prophet Sultan Eric cyinjije abakirisitu mu mwaka wa 2023.

Mbere y’uko atangira inyigisho cy’umunsi yasabye abaririmbyi kumufasha kuririmba barindiriye ko saa Sita zigera.

Yigishije asaba abantu gukizwa bagatangira umwaka bari mu yindi shusho, ati "Gukizwa ni ukuba icyaremwe gishya, ntabwo ari uguhindura ingeso gusa."

"Uyu mwaka ni umwaka ubwiza bw’Imana buzagaragara kuri twe, tugiye kurabagirana kuruta uko byahoze."

Prophet Sultan yinjije abayoboke be mu mwaka mushya abasaba kurushaho kwegerana n'Imana
Prophet Eric Sultan ni we ushumbye Itorero River of Joy and Hope Ministries

  2023, umwaka w’ibitangaza byivugira

Apôtre Kabera Mignonne yavuze ko umwaka wa 2023 uzaba umwihariko wo kurangwa n’ibitangaza byivugira.

Ati “Ni umwaka w’ibitangaza bisakuza, tugiye kuva muri nyiramubande twinjire mu ijwi rirangurura. Iyo wumvira umuntu muri nyiramubande ntabwo umwumva ariko iyo uhindutse ijwi riravuga.”

Yagaragaje ko muri iri joro ibitangaza bitangira gukoreka.

Yashimangiye ko buri muntu agiye kubona ibitangaza bimukorerwa aho kumva ibyakorewe abandi.

Muri iri jambo ry’ubuhanuzi, Apôtre Mignnone yavuze ko abantu bari mu mana bagiye kubaho mu buzima burenze ibimenyerewe.

Ati “Uyu mwaka wa 2023, ugiye kubona igitangaza ugaruke uvuge ikindi kandi bizaba umusubirizo. Ijambo igitangaza habamo n’ibimenyetso. Hari abamaze igihe badafite akazi ariko Imana igiye kubaremera. Iki ni igihe gishya.”

Abanyabwenge badafite imana bagiye kuruha, mu gihe abandi Imana igiye kubarokoza ibitangaza.

Mu ijambo riboneka mu Gitabo cya Yobu 5:9, hagira hati “Ni yo ikora ibikomeye bitarondoreka n’ibitangaza bitabarika.”

Abari muri Kigali Convention Centre binjiye muri uyu mwaka mushya mu byishimo by’ikirenga, mu isengesho rikomeye ryo gushimira Imana no kuyisaba inkomezi mu gihe kiri imbere. Bashimye Imana mu mbyino ziri mu mujyo wo guhimbaza Imana.

Apôtre Mignonne Kabera yavuze ko umwaka wa 2023 ari uwo kubona ibitangaza byivugira
Apôtre Mignonne Kabera uyobora Women Foundation Ministries yakoreye igitaramo gisoza umwaka muri Kigali Convention Centre

  Ikaze mu mwaka mushya wa 2023

Apôtre Dr Paul Gitwaza yavuze ko 2023 ari umwaka wo Gusimbura, wo kubona ibishya mu buzima bw’abizera.

Yagize ati “Hari igishya kigiye kuba mu buzima bwanjye. Ese uriteguye gusimbuza igishya igishaje mu buzima bwawe? Uzishima, uzatera imbere kandi iri jambo ry’ubuhanuzi rizasohora ku buzima bwawe. Ni amagambo aboneka mu Gitabo cya Yeremiya 1.10.”

Yakomeje ati “Ndabifuriza umwaka mwiza. Kwinjira muri uyu mwaka utakiri kunywa inzoga cyangwa mu kabyiniro, uri mu bwiza bw’Imana. Ni ibintu bidasanzwe.’’

Apôtre Dr Paul Gitwaza yifurije abayoboke be Umwaka Mushya wa 2023
Apôtre Dr Paul Gitwaza yavuze ko 2023 ari umwaka wo kubona ibishya

  Amahirwe adasanzwe yo gutangira umwaka wa 2023

00:23: Apôtre Dr Paul Gitwaza yatanze amahirwe ku batarihana ngo batangire umwaka atari abagawa imbere y’Imana.

Yabasengeye ku Mana, abasabira gukurwaho ibyaha, bakandikwa mu gitabo cy’ubugingo.

Mu magambo basubiragamo, bavugaga ko bahisemo gutangira umwaka bategekwa na Yesu Kirisitu mu buzima bwabo.

IBISHASHI BIHA IKAZE 2023 BYATURIKIJWE I KIGALI

Ibishashi by’ibyishimo byaturikirijwe mu bice bitandukanye by’Umujyi wa Kigali mu guhe ikaze abaturarwanda mu mwaka mushya wa 2023.

Kuri Kigali Convention Centre ni uku byari byifashe!

Kuri KCC haturikirijwe ibishashi mu kwinjira mu mwaka mushya
Kuri Kigali Convention Centre ni hamwe mu harasiwe ibishashi by'ibyishimo by'umwaka mushya

Bye bye 2022: Ibyishimo ni byose muri Kigali nyuma yo kwinjira mu 2023. Ibishashi byaturikijwe mu bice bitandukanye by’Umujyi wa Kigali aharimo i Nyamirambo, kuri KCC na Bumbogo.

Mu mfuruka zitandukanye z’umujyi kimwe n’ahandi mu gihugu humvikanye urusaku rw’abaturage bishimira gutangira umwaka neza.

  Imana irahambaye

Nyuma yo gusoza umwaka no kwinjira mu mushya wa 2023, abateraniye muri BK Arena bari mu mashimwe. Bamwe bagize ibyishimo byinshi bararira, abandi babura uko bifata mu kwishimira ko binjiye mu 2023.

Binjiye mu mwaka baririmba indirimbo ivuga ko “Imana yacu irahambaye mu Ijuru no mu Isi, mu mbaraga, mu rukundo. Irahambaye.””

Mu kwinjira mu mwaka kandi hahise hanatangwa ituro ry’ishimwe!

00:00: IGIHE IBIFURIJE UMWAKA MUSHYA MUHIRE WA 2023. UZABABERE UWO GUHIRWA MURI BYOSE.

  Muri BK Arena binjiye mu mwaka mushya mu byishimo by’ikirenga

Apôtre Dr Paul Gitwaza ayoboye ibihumbi by’abari muri BK Arena binjiye mu mwaka mushya wa 2023.

Yavuze ko Ijambo ry’Umwaka riri muri Zaburi 90.15 hagira hati “Utwishimishe ibyishimo bingana n’iminsi watubabarijemo n’imyaka twabonyemo ibyago.”

Yasabiye buri wese kuzagira umwaka mwiza, utarimo ibibi.

  Rond-Point yo mu Mujyi rwagati yakiriye benshi

Ababyeyi n’abana babo benshi bakereye kwinjira mu mwaka mushya bari kumwe. Benshi bari muri Rond-Point yo mu Mujyi wa Kigali rwagati aho bari gukina imikino itandukanye mu kwitegura umwaka mushya.

  Amafoto y’uburyo abari muri KCC bameze

Apôtre Mignonne Kabera uyobora Women Foundation Ministries
Kabera Eric, umugabo wa Apôtre Mignonne Kabera na we yitabiriye iki gitaramo

  Gitwaza yifurije abayoboke ba Zion Temple umwaka mushya

Apôtre Dr Paul Gitwaza yashimye Imana ko nyuma y’imyaka ibiri abantu badaterana, Imana yongeye kugira ubuntu, bagahurira hamwe.

Ati “Ni umunezero udasanzwe ku bwanjye, umuryango n’itorero kuba ryateguye iki giterane ngo Abanyarwanda duterane.’’

Yakomeje avuga ko uyu mwaka ari umwaka wo “GUSIMBURA”.

Nyabugogo urujya n’uruza ni rwose!

Nyabugogo hafatwa nko mu izingiro ry’igihugu kubera gare ya Nyabugogo, umwaka usanze urujya n’uruza ari rwose. Abagenzi, abashaka gusoreza umwaka muri ako gace n’abahatuye bari kunyuranyanyuranamo mu gihe iminota ibarirwa ku ntoki ngo umwaka wa 2022 tuwutere umugongo.

Ishusho ya Nyabugogo mu masaha abanziriza isozwa ry'umwaka wa 2022

Incamake za 2022

Waba wibuka aho wari uri igihe nk’iki mu 2021? Mu rugo!

Izi saha ntiwasohokaga, byari ibindi bindi kubona umunwa n’amazuru byawe bidapfutse!

Twinjira mu 2022 twashishikarijwe ikintu kimwe cy’ingenzi, kwirinda ya ngwagasi yitwa Covid-19. Ni mu gihe kuko burya ngo amagara arasesekara ntayorwa.

AMASHUSHO: Twibukiranye ibihe by’ingenzi byaranze Umwaka wa 2022 mu minota 4:34

  I Rubavu “Bonane” yaririmbwe

Muri Stade Umuganda mu Karere ka Rubavu, Orchestre Impala yasusurukije abitabiriye Erica’s Gisenyi Festival, bishimiye gusoza umwaka wa 2022 binjira mu 2023.

Muri iki gitaramo kandi abahanzi barimo Senderi International Hit bafashije abacyitabiriye gukomeza kuryoherwa n’impera z’umwaka no kwinjira mu mushya.

  Amashimwe KCC! Ntagwabira Seraphin yarapfuye arazuka

Umwaka w’amashimwe ku banyetorero ba Women Foundation Ministries, bashimiye Imana yabanye nabo muri uyu mwaka kuva watangira binyuze mu mirimo n’ibitangaza bagiye babona.

Binyuze mu bikorwa bitandukanye itorero ryagiye rikora bigendanye n’ivugabutumwa ndetse n’ibikorwa abantu bagezeho ku giti cyabo.

Umuryango wa Ntagwabira Seraphin washimye Imana ko basozanyije umwaka bari kumwe nyuma y’uburwayi bukomeye yagize muri uyu mwaka akagira ubuzima bugoye ariko akaba awusoje ari gukira.

Ntagwabira Nubwo asengera muri Kiliziya Gatorika yemeza ko we n’umugore babanye neza kandi bitamubuza kwiyumva nk’umunyamuryango wa Women Foundation Ministries.

Bashimiye Imana yabarinze ikamutiza amagara mazima ndetse batanga n’ituro ry’ishimwe.

Iri shimwe ryo gukiza barisangiye n’abandi benshi barimo abari bateraniye muri Kigali Convention Centre n’abandi bari mu bice bitandukanye by’igihugu basoje umwaka bakiri bazima kabone n’ubwo banyuze mu bihe bikomeye.

  Isengesho ku gihugu

Aimé Uwimana ni umwe mu bahanzi baririmbye mu ijoro risoza umwaka. Uyu muramyi ufatwa n’abandi nka mukuru wabo yatangiriye ku ndirimbo ye yatumye anamenyekana cyane, yise “Muririmbire Uwiteka”.

Ubwo yayiririmbaga, benshi mu bari muri BK Arena bacanye amatoroshi ya telefoni, bafatanya na we kuririmba.

Ayisoje yasabye buri wese kuyiherekesha isengesho ryo gushima Imana yarinze igihugu n’abagituye mu bihe bitambutse.

Ati “Uwiteka yakuyeho amarira, atanga ihumure. Wabaye umwizerwa mu miryango n’igihugu cyacu. Warakoze.”

Aimé Uwimana ni umwe mu bahanzi baririmbye mu ijoro risoza umwaka muri BK Arena

I Rulindo babukereye!

Ibyiza ntibiri mu mijyi gusa. Abaturage bo mu turere twa Rulindo na Gakenke batuye hafi yo kuri Nyirangarama, babukereye aho baje kwihera amaso isozwa ry’umwaka haraswa ibishashi.

  Prosper Nkomezi yahagurukije abari muri BK Arena

Prosper Nkomezi yishimiwe bihebuje n’abateraniye muri BK Arena. Yaririmbye ibihangano bye byakunzwe cyane birimo “Yanyujuje indirimbo”, “Ibasha gukora”, “Nzayivuga”, “Amamara”, “Ntacyo uzaba” n’izindi.

Nkomezi Prosper yishimiwe cyane mu ndirimbo ze zikunzwe

- Cardinal Kambanda yasabye abakiristu gushima Imana by’akarusho

Antoine Cardinal Kambanda, Umushumba wa Arkidiyosezi ya Kigali mu gitambo cya misa isoza umwaka, yasabye abakiristu gushima Imana kubwo gusoza umwaka amahoro.

Ati “Buri munsi na buri saha tuba tugomba gushimira Imana ariko noneho iyo umwaka urangiye tugiye gutangira undi tuba tugomba gushimira Imana by’Akarusho”

- I Nyamirambo urujya n’uruza ni rwose!

Nyamirambo ntijya yiburira, buri gihe ihorana umwihariko. Abahatuye ntibaryama, bazi neza igisobanuro cy’umujyi. Ni nako bimeze aka kanya habura amasaha make ngo umwaka urangire.

Umufotozi wa IGIHE, Derrick Rwema, yahageze, afata amafoto agaragaza uburyo abaho biteguye gusoza umwaka mu duce nka Biryogo ahazwi nko mu Marangi n’ahandi.

Kubona umumotari udafite umugenzi biragoye, bose ibiciro babyurije muri iri joro
Uyu mubyeyi ajyanye n'umwana we gusoza umwaka batangira undi i Nyamirambo
Muri car free zone mu Biryogo, abakunzi b'ikawa, icyayi na capati babukereye

  Iyerekwa ryahawe Apôtre Mignonne Kabera ryashibutseho itorero

Mu gusobanura neza inkomoko yo gushinga idini Apôtre Mignonne Kabera asobanura ko yagize iyerekwa rikomeye ryo gushyigikira umugore, ku muhugura mu buryo butandukanye ariko binyuze mu ijambo ry’Imana.

Yabwiwe ko gufasha umugore bizatuma abagabo baza gushyigikira mu muhamagaro we. Saa Yine zuzuye ni bwo muri Women Foundation Ministries bari batangiye igitaramo, umurishyo w’Ingoma utangira itsinda ry’abaramyi batangira gususurutsa abitabiriye uyu mugoroba wo gusoza umwaka wa 2022.

  Alleluia 12 z’ishimwe zatewe muri BK Arena

22:31: Pasiteri Emmanuel Gberekpee yasabye ibihumbi by’abakirisitu bateraniye muri BK Arena gutera Alleluia 12 zihwanye n’amezi 12 basoje bakirinzwe n’Imana.

 Perezida Kagame yashimye Abanyarwanda uko bitwaye mu 2022

Mu ijambo risoza umwaka wa 2022, Perezida Kagame yashimiye Abanyarwanda kwihangana no kudatezuka bagaragaje, abasaba gukomerezaho mu mwaka mushya wa 2023.

Yagize ati “Twashoboye gukemura ibibazo biremereye harimo n’icyorezo cya Covid-19, twatangije icyiciro cya kabiri cy’Ikigega Nzahurabukungu cyashyizweho mu rwego rwo guhangana n’ingaruka za Covid-19 none ubukungu bw’igihugu cyacu bwarazamutse cyane cyane mu gihembwe cya gatatu cy’uyu mwaka.”

Umukuru w’Igihugu yashimiye Abanyarwanda ku ruhare rwabo mu itegurwa ry’Inama y’Abakuru b’Ibihugu na za Guverinoma zikoresha Ururimi rw’Icyongereza, CHOGM, u Rwanda rwakiriye muri Kamena 2022 hamwe n’ibindi bikorwa byagenze neza.

Yavuze ko mu 2023, hazaba hasigaye umwaka umwe ngo gahunda ya guverinoma y’imyaka irindwi irangire.

Yakomeje ati “Biradusaba kudatezuka n’imbaraga kugira ngo tugere ku ntego twigaye. Umubano hagati y’igihugu cyacu n’ibindi byo mu karere ni mwiza kandi tumaze kugera ku bindi byinshi byiza ariko havutse n’ibindi bibazo bisaba ko tubikurikirana cyane cyane ibijyanye n;umutekano mu baturanyi bacu muri Repubulika Iharanira Demokarasi ya Congo.”

Yavuze ko yizeye ko umwaka wa 2023 uzaba uw’amahoro mu Karere u Rwanda ruherereyemo kugira ngo iterambere rigerweho.

Perezida Kagame yashimiye Abanyarwanda uko bitwaye mu mwaka wa 2022

  Muri KCC na ho turahari

Ikaze muri Kigali Convention Centre ahateraniye ibihumbi by’abantu biteguye gusoza umwaka bifatanya na Women Foundation Ministries.

Women Foundation Ministries ni umuryango mpuzamahanga udaharanira inyungu, washinzwe kandi uyobowe n’Intumwa y’Imana Alice Mignonne Kabera, kuva mu mwaka wa 2006. Ufite intego yo kubaka umuryango bigizwemo uruhare rukomeye n’umugore.

Uyu muryango ubusanzwe ufite intego ikomeye yo kubaka umuryango binyuze mu butumwa buganisha ku gukiranuka no kugira umuryango utekanye binyuze mu nyigisho zitandukanye.

Iki gitaramo kibereye muri Kigali Convention Centre cyitabiriwe ku bwinshi cyane cyane n’abakiri bato n’abakuze mu byiciro bitandukanye.

Abakirisitu bahuriye mu bitaramo bitandukanye byo guhimbaza Imana

Abemera Imana bakereye ibihe byo kurangiza umwaka bategurirwa ibirori byo kurangiza umwaka baramya bakanahimbaza Imana.

Mu kurushaho kwegerana n’Imana hateguwe ibitaramo by’amakesha byatangiye ku mugoroba wo ku wa Gatandatu, tariki ya 31 Ukuboza 2022, ushyira mu gitondo cyo ku Cyumweru cya mbere cya 2023, tariki ya 1 Mutarama.

Mu gihe abakirisitu bo muri Zion Temple iyoborwa na Apôtre Dr Paul Gitwaza bateraniye muri BK Arena, abandi bari mu nsengero, hoteli n’izindi nyubako zitandukanye aho bateraniye ngo bashime Imana ku bw’uburinzi bwayo mu minsi 365 ishize.

Ku rundi ruhande, Apôtre Mignone Kabera ari kumwe n’abayoboke b’Itorero rye Women Foundation Ministries muri Kigali Convention Centre.

Prophet Sultan Eric washinze River of Joy and Hope Ministries ari gukorera igitaramo muri Kigali Conference and Exhibition Village, ahahoze hazwi nka Camp Kigali.

21:30: Ibihumbi by’abakirisitu basengera muri Zion Temple bageze muri BK Arena ari benshi cyane. Muri uyu mwanya bari guhimbaza Imana, bayishimira ko yabanye na bo mu bihe byose bitambutse.

  Kuva ku mugoroba ahagana saa Kumi n’Ebyiri, imihanda yose ya Kigali n’ahandi mu gihugu yerekezaga ahiganjemo mu nsengero aho bagiye kwizihiza isozwa ry’umwaka wa 2022 no kwinjira mu wa 2023.

Ab’i Rubavu na bo bagiye gutaramana n’abahanzi bakomeye

Umujyi wa Rubavu wizihira abakunzi b’ibirori wongeye kubatekerezaho mu bihe byo gusoza umwaka, aho bagiye gutaramana n’abahanzi barenga 10 mu gitaramo cy’imbaturamugabo.

Iki gitaramo cyiswe ‘Erica’s Gisenyi Festival’, kigiye guhuriza hamwe abahanzi barimo Kenny Sol, Bull Dogg, Ariel Wayz, Orchestre Impala, Senderi Hit, Itsinda rya The Same, Calvin Mbanda, Shizzo na Young Grace.

Muri Stade Umuganda ahagiye kubera iki gitaramo abantu batangiye kuhagera kare, abahanzi bamaze kwitegura no kugerageza ibyuma ngo bumve ko bivuga neza nta makaraza.

Abasore, inkumi, abagabo n’abagore bari mu mihanda yerekeza kuri Stade Umuganda biteguye gusoza umwaka wa 2022, binjira muri 2023 bari kumwe n’abahanzi bakunda.

Abafatanyabikorwa ba Erica’s Gisenyi Festival barimo Bralirwa, Ndore Safaris, Erica’s Business Group, Akarere ka Rubavu n’abandi bafatanyije mu itegurwa ry’iki gitaramo.

Amafoto: Shumbusho Djasiri, Igirubuntu Darcy, Nezerwa Salomon, Rwema Derrick na Habyarimana Raoul


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .