Uko amatora y’Abadepite yagenze mu bice bitandukanye by’igihugu (Amafoto)

Yanditswe na IGIHE
Kuya 3 Nzeri 2018 saa 08:02
Yasuwe :
0 0

Abanyarwanda bujuje imyaka, baramukiye ku biro by’itora biri hirya no hino mu gihugu kugira ngo batore abazabahagararira mu Nteko Ishinga Amategeko.

Bitandukanye n’uko byari byifashe mu matora y’Umukuru w’Igihugu aho mu bice bitandukanye abatora bari bazindutse cyane, ku biro by’itora IGIHE yagezeho mbere gato ya saa kumi n’imwe, nta bwitabire buhambaye bwari buhari.

Abakozi ba Komiyo y’Amatora kuri site zitandukanye bari bageze aho bakorera mu masaha ya kare mbere ya saa kumi n’imwe n’igice.

Mu Mujyi wa Kigali ho ahagana saa kumi n’ebyiri nibwo abakomiseri bari batangiye kugera aho bakorera.

Abanyamakuru ba IGIHE bari mu bice byose by’igihugu abo baza gukurikirana uko iki gikorwa cy’amatora y’Abadepite kiza kugenda umunota ku wundi.

Twabibutsa ko kuri iki Cyumweru ababimburiye abandi gutora ari abanyarwanda bari muri Diaspora batoreye kuri za ambasade no ku bindi biro by’itora byari byateguwe.
Perezida Kagame na Madamu Jeannette Kagame bari i Beijing mu Bushinwa, niho batoreye.

Umukuru w’Igihugu ari i Beijing aho yitabiriye Inama y’Ihuriro ku bufatanye bwa Afurika n’u Bushinwa yiswe ‘FOCAC2018’.

Abafite ubumuga nabo batoye kuri iki Cyumweru aho amajwi y’agateganyo yerekana ko Musolini Eugène ariwe watowe nk’umudepite ubahagarariye.

Abanyarwanda bari ku ilisiti ntakuka y’abemerewe gutora Abadepite ni miliyoni 7.1, barimo abagera ku bihumbi 47 batorera muri diaspora, ubariyemo abasirikare n’abapolisi b’u Rwanda bari mu butumwa bw’amahoro hirya no hino.

UKO IKI GIKORWA CYAGENZE UMUNOTA KU WUNDI

- Mu matora y’abadepite yo mu 2013, FPR Inkotanyi yabonye intsizi yayihaye Abadepite 41 muri 53 bava mu mitwe ya politiki n’abakandida bigenga; PSD yagize barindwi naho PL igiramo batanu.

15:10: Mu bice bitandukanye by’igihugu, abakorerabushake ba Komisiyo y’Igihugu y’Amatora, batangiye kubarura amajwi aho biteganyijwe ko ku mugoroba wo kuri uyu wa Mbere hatangajwe ay’agateganyo.

15:00: AMATORA ARAHUMUJE MU GIHUGU HOSE. Ubu hakurikiyeho igikorwa cyo kubarura amajwi…

14:45: Ibikorwa by’itora mu gihugu hose biri kugana ku musozo...

14:20: Komisiyo y’Igihugu y’Amatora, imaze gutangaza ko kuri uyu mugoroba kuva saa mbili z’ijoro kugera saa tatu ku cyicaro cyayo giherereye ku Kimihurura iza gutangaza amajwi y’agateganyo y’ibyavuye mu matora y’abadepite.

-  Mu yandi makuru: Yabyaye impanga eshatu avuye gutora

Umugore witwa Maniraguha Claudine wo mu Kgari ka Nyagahinga mu Murenge wa Cyanika mu Karere ka Burera, yabyariye mu nzira abana batatu b’impanga avuye gutora Abadepite mu gitondo cy’uyu munsi.

Uyu mubyeyi yabyaye avuye gutorera kuri site iri muri aka kagari.

Bivugwa ko yafashwe n’ibise ari gutaha, agahita yitabaza urugo rw’abaturanyi ku buryo yamaze kubyara akajyanwa ku Kigo Nderabuzima cya Cyanika.

- Hagati aho: Komisiyo y’Igihugu y’Amatora (NEC) yaburiye abantu bafotora urupapuro rw’itora batoreyeho bakarukwirakwiza ku mbuga nkoranyambaga.

Umunyamabanga Nshingwabikorwa wa NEC, Charles Munyaneza, yagize ati “Biriya ntabwo ari byo ntibyemewe. Ubundi gutora ni ibanga. Iyo umaze gutora ukerekana urupapuro, ukerekana uko watoye itegeko ry’ibanga uba waryishe. Ubitangaje itora rigikorwa bishobora gutuma hari abandi babigenderaho.”

“Turasaba abanyarwanda babikoze kutongera kubikora kuko binyuranyije n’amategeko. Hagize ubikora akaba yamenyekana azahanwa nkuko amategeko abiteganya."

13:10: Abanyeshuri bujuje imyaka bari no ku ilisiti y’itora biga muri Lycee de Kigali nabo bahawe umwanya bajya gutora abadepite. Aba bari kuri site yo mu Rugunga…

13:00: Mu Karere ka Nyarugenge kuri site y’itora ya Rugunga aho Perezida Kagame asanzwe atorera, naho birasa n’aho igikorwa kiri kugana ku musozo. Hari kuza umuntu umwe ku wundi kuko abenshi bari bahari mu masaha y’igitondo.

- Mpayimana yasabye abakandida kwemera ibyavuye mu matora

Ati “ Hari ubwo abakandida bahakana ibyavuye mu matora bashaka amatiku. Icy’ingenzi ahubwo ni uko abakandida b’abanyarwanda tugumana ubupfura bwa Kinyarwanda, twubaha ibivuye mu matora.

Hari ijambo bakoresha mu mikino bita ‘fair play’, bisobanuye kunyurwa n’ibyo umuntu aba yakoze, ndumva ari ryo rikwiriye”.

Mpayimana yashimiye abamutoye nubwo atabonye amajwi amuhesha kuba umudepite

12:50: Guverineri w’Intara y’Amajyaruguru, Gatabazi JMV, yatoreye mu Karere ka Gicumbi kuri Site ya Mulindi

12:40: Mu bice bitandukanye by’igihugu, amatora arasa n’ayahumuje. Ku biro by’itora hari kuza abantu bake cyane kuko abenshi batoye mu gitondo hakiri kare

- Abafite ubumuga ntibacikanywe n’iki gikorwa…

12:15: Umukandida wigenga, Mpayimana Philippe, yatoreye mu Karere ka Nyarugenge kuri site ya nka Camp Kigali. Uyu mugabo wiyamamaje mu matora y’Umukuru w’Igihugu ntabashe gutsinda, ari gushaka amajwi atanu ku ijana yamubashisha kwinjira mu Nteko Ishinga Amategeko

- Aba babyeyi ni abo mu Murenge wa Nyarusange. Intero yabo ni imwe aho bagira bati "Twahisemo cyera”

11:30: Perezida w’Urukiko rw’Ikirenga, Prof. Sam Rugege, n’umugore we batoreye mu Mujyi wa Kigali i Nyarutarama ku mashuri ya Green Hills

11:20: Minisitiri w’Intebe, Dr Edouard Ngirente, yatoreye Abadepite ku mashuri ya Green Hills i Nyarutarama. Nyuma yo gutora, nta kiganiro Minisitiri w’Intebe yigeze agirana n’itangazamakuru

- Convention Centre y’i Kayonza! Ku Rwunge rw’Amashuri rwa Rwinkwavu bubatse icyumba cy’itora kiri mu ishusho nk’iya Kigali Convention Centre

11:00: Abakinnyi b’Ikipe y’Igihugu Amavubi bitegura umukino wa Côte d’Ivoire mu gushaka itike y’igikombe cya Afurika cya 2019, batoreye Abadepite i Nyamata aho bari mu mwiherero.

- Philomène Mukangango w’imyaka isaga 90 yatoreye kuri SOS Kagugu. Yavuze ko ashimishijwe no kwitorera abazavugira abaturage

10:45: Umushinjacyaha Mukuru, Mutangana Jean Bosco, na we yatoreye kuri SOS Kinyinya.

Amaze gutora yabwiye IGIHE ati “Nshimishije no gukoresha uburenganzira bwanjye nk’umuturage kugira ngo nitorere abazaduhagararira mu Nteko Ishinga Amategeko.”

“Ni uburenganzira duhabwa n’amategeko, abaturage bose bakumva ko bahitamo neza abantu bazatora amategeko azafasha igihugu gutera imbere, azadufasha kugira ubutabera.”

Umushinjacyaha Mukuru, Mutangana Jean Bosco, yavuze ko yishimiye gutora abadepite bazafasha igihugu gutera imbere
Umushinjacyaha Mukuru, Mutangana Jean Bosco, yatoreye kuri SOS Kinyinya

10:30: Perezida w’Ishyaka Riharanira Ukwishyira Ukizana kwa Muntu (PL), Mukabalisa Donatille, yatoreye kuri SOS Kinyinya ahagana saa yine n’iminota 20.

Yatangaje ko yishimiye uko amatora ari kugenda hirya no hino kandi ko bizeye kubona amajwi menshi.

Ati “Igikorwa cy’amatora kimeze neza, ni intambwe ishimishije tugezeho ya demokarasi abanyarwanda twihitiyemo, igikorwa kiri kugenda neza mu mudendezo, umutekano urahari ni ibyo kwishimira. Dufite icyizere ko (nka PL) turi bubone amajwi menshi.”

Ubwo Mukabalisa yari ageze kuri site ya SOS Kinyinya aho yatoreye
Ubwo abakorerabushake ba Komisiyo y'Amatora barebaga Mukabalisa ko ari kuri lisiti y'itora
Mukabalisa amaze gutora yavuze ko yizeye intsinzi ya PL

10:15: Ibyishimo byari byose ku banyeshuri biga muri St Joseph batoye ku nshuro ya mbere.

10:00: Abanyamakuru bemerewe gutorera aho bari hose mu gihugu kuri buri wese ufite ikarita y’umwuga. Umunyamakuru wa IGIHE mu Karere ka Huye, Kwizera Prudence, yabashije gutorera aho yakurikiraniraga ibikorwa by’itora

- Perezida w’Ishyaka rya PSD, Vincent Biruta, yatoreye kuri site iri ku mashuri ya Kibagabaga hafi y’ibitaro.

Nyuma yo gutora, yabwiye IGIHE ati “Ibiva mu matora byose ndizera ko ari byiza, ibivamo byose tuzabikoresha neza kugira ngo tugeze ku banyarwanda neza ibyo twabemereye”

Dr Vincent Biruta aganira yatangaje ko ishyaka rye ryari risanganywe icyizere cyo kubona imyanya mu Nteko

09:45: Komiseri w’Umuryango FPR Inkotanyi, Gasamagera Wellars, yatoreye Murenge wa Kigarama mu Karere ka Kicukiro.

Gasamagera yavuze ko Umuryango wa FPR Inkotanyi wizeye intsinzi kandi ashimira abaturage uburyo bitabiriye ibikorwa byo kwiyamamaza n’uburyo bari kugaragaza ubwitabire mu matora.

Ati “Murabimenyereye iyo tuvuga kwiyamamaza no gutora hagarukwa kuri ya ndahiro ivuga ngo aya si amatora ni ubukwe.”

09:30: Umunyamabanga wa Leta muri Minisiteri y’Ububanyi n’Amahanga, Amb. Olivier Nduhungirehe, nawe yitabiriye itora ry’abadepite

-  Site ya Camp Kigali ikunze kugira abatorera ku mugereka benshi. Aba ni abo muri serivisi z’abikorera ku giti cyabo zishinzwe umutekano bari bamaze guhabwa amabwiriza yo gutora.

Iyi site muri rusange iri butorereho abagabo 2340 n’abagore 1885 bose hamwe ni 4225

-  Umukoro ku bihayimana

Musenyeri Mbonyintege amaze gutora yabwiye IGIHE ko amatora yateguwe neza, aho mu bikorwa byo kwiyamamaza nta kibazo cyagaragaye.

Yavuze ko Abadepite bakwiye kugira imyumvire ibashisha abanyarwanda kubona ibintu mu buryo bumwe ku ngingo runaka. Atanga urugero ku burezi aho ngo abayobozi, abarezi, ababyeyi n’abanyeshuri bakwiye kumva ibintu kimwe.

Yavuze ko Abihayimana nabo bafite inshingano zo kwitabira amatora. Ati “Iki ni igikorwa cy’itora kandi tugomba kugikora nk’abanyarwanda’.

Musenyeri Mbonyintege yavuze ko Kiliziya yo muri Repubulika Iharanira Demokarasi ya Congo ishyize imbere ko abaturage b’iki gihugu bagira amahoro, ikwiye kubera urugero abihayimana bakabikora mu buryo bwabo.

Ngo ibyo ikora bikwiye gukorwa hagamijwe ibyiza biteza imbere abanyagihugu ariko ‘twe mu rwanda tubikora mu buryo bwacu bufite intego yo kudatandukanya abaturage na leta kuko nta kibazo bigomba gutera’.

09:10: Dr Frank Habineza uyobora Green Party yatoreye ku Rwunge rw’Amashuri rwa Kimironko II mu Mudugudu w’Ingenzi. Nyuma yo gutora, yatangaje ko ibikorwa byo kwiyamamaza ku ishyaka rye byagenze neza kuri iyi nshuro.

Babashije kugera mu turere hafi ya twose tw’igihugu, abayobozi b’inzego z’ibanze bakaba baragerageje kubaba hafi mu bishoboka ‘n’aho twahuye n’ibibazo byahise bikemuka’.

Yakomeje agira ati “Nizeye ko ishyaka ryacu riza gutsindira nibura 20% by’amajwi y’uyu munsi. Nibura twizeye imyanya icumi”

Dr Frank Habineza uyobora Green Party yizeye ko 0.5% abura ngo ishyaka rye ribone imyanya mu Nteko Ishinga Amategeko, aza kuboneka uyu munsi

08:45: Abihayimana nabo ntibatanzwe: Musenyeri Smaragde Mbonyintege uyobora Diyosezi ya Kabgayi nawe amaze gutora

08:40: Abaganga, abaforomo, abarwayi n’abarwaza bo mu Bitaro bya Kaminuza bya Kigali (CHUK) bazindukiye mu matora y’Abadepite.

Ni ku nshuro ya mbere muri ibi bitaro hashyizwe icyumba cy’itora mu korohereza abahakorera n’abaharwariye kwivuza.

Imibare y’abatorera muri iki cyumba kiri mu byihariye iramenyekana nyuma y’amatora hatangiye kubarurwa amajwi.

Munyensanga Alexandra uhagarariye FPR Inkotanyi nk’indorerezi yavuze ko “ibikorwa by’amatora biri kugenda neza.”

Umuyobozi w'Icyumba cy'Itora cya CHUK, Bazatoha Pierre, yasobanuriye abatora uko amatora akorwa
Abakozi ba CHUK bazindukiye mu matora mbere yo gukomeza akazi
Bishimiye gutorera mu kazi
Yari afite akanyamuneza nyuma yo gutora
Yabaye uwa mbere mu batoreye mu Bitaro bya Kaminuza bya Kigali CHUK

- Ingabo z’igihugu nazo ntizatanzwe...

08:30: Abafite ubumuga nabo ntibibagiranye

Bungurubwenge Innocent ufite ubumuga bwo kutabona utuye mu Murenge wa Tumba amaze gutora. Yafashijwe n’umwana muto.
Yagize ati " Nizeye ko yamfashije neza nkitorera aho nshaka".

08:20: Uku niko urupapuro rw’itora rumeze…

Uku ni ko urupapuro rw'itora rw'abafite ubumuga rumeze...

-  Guverineri w’Intara y’Amajyepfo, Mureshyankwano Marie Rose, ari gukurikirana uko amatora ari kugenda mu Karere ka Huye

-  Nta mbogamizi ziragaragara…

Uhagarariye ibiro by’itora bya Ecole Primarire Kagugu, Yunussu Niyonsenga, yabwiye IGIHE ko aha hantu haratorera abantu 18570 bo mu kagali ka Kagugu kagizwe n’imidugudu icyenda, ibyumba by’itora 30.

Abakozi ba komisiyo y’amatora barakurikirana ayo matora ni 122.

Saa moya n’igice ubwo yaganiraga na IGIHE, yavuze ko nta kibazo barahura nacyo uretse abantu bake biburaga kuri lisiti y’itora.

Ati “Biri kugenda neza abantu bari kugenda bitabira kuko ku byumba by’amatora hariho abantu bakiri no ku mirongo. Imbogamizi ntazo uretse wenda abantu bari kwibura ariko ni bake kandi hari imigereka bari bujyeho.”

Umusaza Karahamuheto Emmanuel w’imyaka 84 atuye muri Kagugu, umudugudu wa Kagarama.

Saa moya zageze ahagaze ku biro by’itora i Kagugu. Yavuze ko aje gutora nk’inshingano ariko anifuza ko ubuzima bwe n’ubw’abana be buzagenda neza.

Ati “Icyatumye tuza gutora ni ugukurikiza amategeko, tukubahiriza umuco. Naje gutora abayobozi bacu bazaduhagararira, bakatumenya. Icyo badufasha ni ukuzatuyobora neza bakaduha ivitubeshaho dore nagenze amaringi, simpinga ariko nabashije kuza gutora kugira ngo ndebe ko nzabaho neza n’abuzukuru n’abazukuruza.”

Imbere ya buri cyumba i Kagugu hashyizwe bombo zo guha abaje gutora
Izi bombo ziri gutangwa i Kagugu zitwa Ndi Umunyarwanda...

- I Masaka muri Kicukiro naho hari imyiteguro ihambaye

08:00: AGASHYA mu Karere ka Rulindo

Kuri site y’Ishuri Ribanza rya Ntyaba mu Kagari ka Mvuzo mu Murenge wa Murambi. Uyu muturage yitwa Nzamugurinka Venantie yaje gutora intumwa za rubanda yambaye agatimba k’abageni kandi ari kumwe n’abakobwa bamugaragiye

Aho abayobozi bamwe bari butorere

-  Perezida w’Ishyaka rya PSD, Dr Biruta Vincent aratorera i Kibagabaga hafi y’ibitaro saa 9:00
-  Perezida wa PL, Mukabarisa Donatille aratorera kuri SOS hafi y’Umurenge wa Kinyinya saa 10:00
-  Frank Habineza wa Green Party aratorera kuri Ecole Primaire Kimironko II saa 9:00
- Mpayimana Philippe, umukandida wigenga aratora saa tatu kuri Camp Kigali

-  Umunyamabanga Mukuru wa FPR Inkotanyi, François Ngarambe we yarangije gutora

07:40: Umuyobozi w’Akarere ka Rubavu, Habyarimana Gilbert, amaze gutora yabwiye itangazamakuru ati "Dukurikije uko abaturage bazindutse, twizeye neza ko baza kwitabira ari benshi kandi bakabikora kare."

- Hari abibuze kuri lisiti y’itora

Site y’itora ya Nyamugari mu Murenge wa Gatsata iratoreraho abaturage 8032.

IGIHE yahasanze abagera kuri 20 bavuga ko bibuze kuri lisiti y’itora basaba ko bashyirwa ku mugereka.

Imaniriho Vedaste ni umwe muri bo wagize ati "Dutora Perezida nari ndi kuri lisiti nanatoreye hano none bambuze. Nasabaga ko banyemerera nkajya ku mugereka.”

Bazigaga Marie Odette uyoboye iyi site, yasobanuriye abaturage ko umugereka uri gushyirwaho abantu bari mu kazi.

Ati "Abapolisi, abasirikare, indorerezi, abanyamakuru bafite ibyangombwa bibaranga kandi bari mu kazi nibo bemerewe kujya ku mugereka.”

-  Mu bitaro hashyizwe ibiro by’itora

Nyiraneza Agnes wagiye ku bitaro bya Muhima kugira ngo ace muri Ecography yavuze ko ashimishijwe no kuba mu bitaro hashyizwe icyumba cy’itora.

Ati " Nari namaze gufata umwanzuro ko ntari butore kuko buri gihe iyo nje kwisuzumisha mpava bwije, urumva rero nari kujya gutaha amatora yarangiye."

Pacifique Gashirabake ushinzwe ibikorwa by’uburere mboneragihigu mu Murenge wa Muhima yagize ati " Umurwayi wese wumva yifuza gutora, niyo yaba arembye turi bumusindagize ku buryo abasha gutora."

Umuhuzabikorwa wa NEC mu Karere ka Rubavu, Musekeweya Gloriose, yavuze ko site yihariye yo ku bitaro bya gisenyi hatorera abarwayi, abarwaza barenga 410.

Ati "Impamvu ni uko nyuma y’amatora yabanje twagiye tugaragarizwa ko abari mu bitaro nabo bagomba gutora kandi koko nibyo hari igihe usanga umuntu yariyandikishije ariko amatora akagera arwaye cyangwa arwaje cyangwa yakoze. Abo bantu nabo baba bagomba gutora kandi barabushaka. "

07:30: Mugemana Rachid afite imyaka 75, amaze gutorera ku Rwunge rw’Amashuri rwa Kimironko II.

Avuze ko ibyinshi byakozwe ariko abadepite bakwiye gukomeza kuvugira umuturage iterambere rigakomeza.

Ku bageze mu zabukuru ngo bakitabwaho by’umwihariko, bagahabwa ubuvuzi bwiza aho bari hose.

Avuze ko yari atuye mu Karere ka Nyagatare ariko yimukiye i Kigali kugira ngo abashe kujya abonera ubuvuzi hafi ye.

Umuyobozi w’iyi site, Nduwimana Aline avuze ko itoreraho abantu 11,742. Ni naho hatorera Dr Frank Habineza, Perezida w’Ishyaka rya Democratic Green Party of Rwanda. Uyu ari arajya gutora saa tatu.

Mugemana Rachid afite imyaka 75, amaze gutorera ku Rwunge rw’Amashuri rwa Kimironko II

07:20: Mu bice byose by’igihugu, amatora yamaze gutangira. Aba mbere bamaze kugera mu ngo zabo bavuye gutora

-  Ibyatangajwe ku matora:

Niyonteze Suzanne w’imyaka 66 wo mu Kagari ka Gitwa mu Murenge wa Tumba mu Karere ka Huye yazindutse saa kumi n’imwe.

Ati " Mba numva ngomba kuba uwa mbere mu byiza byose kuko ndi umubyeyi. Ngiye mu yindi mirimo nkore ntashikagurika ndetse mbere n’abandi urugero.”

- Guverineri w’Intara y’Iburasirazuba, Mufulukye Fred, ubwo yari ku murongo nk’abandi baturage aho nawe yazindutse ajya gutora

-  Mu Murenge wa Tumba mu mu Karere ka Huye hari site iteguye muri ubu buryo

07:00: Aba mbere batangiye gutora...

Uyu yari ari kwireba niba ari kuri lisiti y'itora...

06:50: Abakorera bushake kuri site ya Kabusunzu mu Murenge wa Nyarugenge mu Mujyi wa Kigali bamaze kugera aho bari bukorere. Ubu bamaze kurahirira inshingano zabo. Abagera kuri 48 ni bo bari bukorere kuri iyi site

Abakomiseri bereka abaturage ko mu sanduku ijyamo impapuro z'itora nta kintu kirimo

- I Huye naho ibikorwa birarimbanyije...

-  Abakorerabushake b’i Rusizi ubwo bari bari kurahira…

06:55: Kuri Site ya Ruyenzi mu Karere ka Kamonyi byageze hafi saa moya z’igitondo ubwitabire bukiri hasi cyane…

06:45: Mu Murenge wa Tumba mu Karere ka Huye ku Ishuri ribanza rya Tumba nabo bazindukiye gutora

-  Ibyavuzwe n’abitabiriye amatora

Nyiraburikobwa w’imyaka 73: “Buri gihe ntora ndi uwa mbere kuva ku bwa Habyarimana kugeza n’ubu. "

- I Muhanga Indorerezi za mbere zahageze zivuye muri Ambasade ya Leta Zunze Ubumwe za Amerika mu Rwanda

- Abakorera bushake ba Komisiyo y’Amatora batangiye kugeza ibikoresho mu byumba by’itora

06:40: Mu karere ka Rusizi hari site zigera kuri 96 n’ibyumba by’itora 598. Nko kuri site ya Buranga mu Karere ka Rusizi, batangiye kujya ku murongo ngo isaha nigera batorere abadepite

- Mu Murenge wa Gihundwe ho mu Karere ka Rusizi hari site eshanu, naho kuri Site ya Burunga hari ibyumba 11, haratorera abaturage 7542

06:32: Kuri site y’Urwunge rw’Amashuri ya Gisenyi Stella Maris mu Kagari ka Nengo mu Murenge wa Gisenyi mu Karere ka Rubavu, hari ibyumba by’itora umunani. Icya Cyenda kiri ku Bitaro.

Haratorera abantu 4500 ariko ngo bashobora kuza kwiyongera. Saa 6:30 hari hamaze kugera abantu baringaniye n’abakozi ba NEC

06:30: Kuri Site y’Itora ya Giporoso abaje gutora batangiye gukora imirongo uko bagenda bakurikirana mu kuhagera. Tubibutse ko itora nyir’izina riratangira saa moya

-  Indorerezi zatangiye kugenzura uko ibikorwa by’amatora biri kugenda

Mu Mujyi wa Kigali, ahagana saa kumi n’ebyiri mu Murenge wa Gatenga, Indorerezi z’Inama Mpuzamahanga y’Akarere k’Ibiyaga Bigari (ICGLR) zari zimaze kuhagera zigenzura uburyo ibiro by’itora biteguye.

Aba ni bamwe mu barenga igihumbi bitabiriye ibikorwa byo kugenzura uko aya matora ari bukorwe. Nyuma bazatanga raporo yabo mu nyandiko mu gihe kitarenze iminsi 60.

06:15: Ntiyamira Mohamed Ntare yageze kuri Site ya Camp Kigali ari imbere y’abandi bose. Yagize ati “Igituma mba nyambere mu matora iteka, mba nanga ko bantanga ibyiza.”

06:10: Mu Mujyi wa Kigali ku Rwunge rw’Amashuri rwa Gatenga ya Mbere, haratorera abarenga 7000 mu byumba by’itora 12. Kugeza ubu abaturage bake bahageze, abatoresha nabo barahari. Ibiro by’itora byafunguwe saa kumi n’ebyiri z’igotondo.

05:50: Rwamagana mu Murenge wa Kigabiro mu Kagari Ka Cyanya, kuri Site y’Itora ya Islamique abaturage batangiye kuhagera ahagana saa kumi n’imwe z’igitondo. Harimo abasabye ko amatora yajya atangira saa kumi n’ebyiri kugira ngo bahite bajya mu yindi mirimo

I Rwamagana batangiye kugera ku biro by'itora saa kumi n'imwe z'igitondo

05:45: I Rubavu kuri Site ya Gacuba II C , Mu Murenge wa Gisenyi akagari ka Amahoro, nta baturage benshi baramukiye ku biro by’itora. Biragaragara ko baza kugenda bahagera buhoro buhoro.

Kuri iyi site, haratorera abantu 4646.

Imyiteguro byageze saa kumi n'imwe n'igice hari aho igikorwa neza, imitako iterekwa mu buryo buboneye

05:40: Sebanani Bosco ni we wa mbere wageze ku biro by’itora kuri Site y’Itora ya Giporoso iherereye mu Murenge wa Kanombe, Akarere ka Kicukiro mu Mujyi wa Kigali. Uyu mugabo yageze kuri site saa kumi n’imwe n’iminota 40

Mushumba Alex ukuriye Site ya Giporoso yabwiye IGIHE ko imyiteguro bayirangije neza bategereje ko isaha igera bagatangira.

Iyi site iteganyijwe kwakira abaturage 5293 bo mu tugari twa Kabeza no hafi yaho.

Sebanani Bosco ni we wa mbere wageze ku biro by’itora kuri Site y'Itora ya Giporoso iherereye mu Murenge wa Kanombe
Abakorerabushake ba Komisiyo y'Igihugu y'Amatora kuri Site ya Giporoso bari guhabwa amabwiriza ya nyuma

-  I Rubavu kandi kuri site ya Bugoyi, saa kumi n’imwe z’igitondo nta muntu n’umwe wari uhari usibye abashinzwe umutekano.

Ibiro by’itora byateguwe

Ahagana saa 17:30 ku mugoroba wo kuri iki Cyumweru, ubwo umunyamakuru wa IGIHE yagera kuri Site z’Itora mu Karere ka Rubavu, yasanze imyiteguro irimbanije.

Yiganjemo gutaka ibyumba by’itora n’amarembo agaragaza aho bazatorera mu mabara atandukanye, yiganjemo ay’ibendera ry’Igihugu.

Kuri Site y’Itora y’Akagari ka Nengo, iri ku Rwunge rw’Amashuri rwa Gisenyi Stella Maris, yasanze imbere mu byumba by’amatora bari batangiye kuhategura neza mu mabara y’Ibendera ry’igihugu.

Saa 18:oo, Umunyamakuru yakomereje kuri Site y’itora y’Akagari ka Bugoyi, asanga imyiteguro irarimbanije.

Ku marembo yinjira bari bamaze gushyiraho ibiranga ko hazabera amatora, imbere hari imitako itandukanye.

Mukarugero Marie Claire wari uri gutegura imitako, yabwiye IGIHE ati “Ni ukugira ngo bazasange biteguye neza. Ni nk’umunsi mukuru, iyo umuntu aje gukora igikorwa nk’iki, akagikorera ahantu hameze neza nawe agikora yishimye, yumva ko yahawe agaciro.”

Mukarugero Marie Claire w’i Bugoyi, yabwiye IGIHE ko gutaka ari “ukugira ngo bazasange biteguye neza. Ni nk’umunsi mukuru, iyo umuntu aje gukora igikorwa nk’iki, akagikorera ahantu hameze neza”
Hejuru ku miryango y'ibyumba by'itora kuri GS Gisenyi Stella Maris bari bamaze kuhataka
Ku marembo ya Site ya Bugoyi
Site ya Bugoyi yateguye indabo z'amoko menshi
Ku mugoroba wo kuri iki Cyumweru, isuku yari irimbanije ahagana saa kumi n'ebyiri kuri site ya Bugoyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza