00:00:00 IGIHE NETWORK KN KINYARWANDA EN ENGLISH FR FRANCAIS

Leta imaze gutanga miliyari zirenga 347Frw muri gahunda ya VUP mu myaka 14

Yanditswe na Igizeneza Jean Désiré
Kuya 29 Ukuboza 2022 saa 03:58
Yasuwe :

Mu minsi ishize ubwo abadepite bazengurukaga mu bice bitandukanye by’igihugu mu kugenzura imibereho y’abaturage no kureba uko gahunda za leta zishyirwa mu bikorwa, basanze hari abaturage bahabwa amafaranga y’ingoboka y’uko batishoboye ariko ntibashake kuva muri iki cyiciro bagahora bashaka gufashwa.

Kuva mu 2008 kugera muri Kamena 2022, muri gahunda ya VUP hamaze gutangwa amafaranga angana na 347,430,475,290Frw, gusa hari aho usanga hari abahora bashaka kuhabwa aya mafaranga aho kuyifashisha bahanga imirimo yabateza imbere bakava mu byiciro bifashwa.

Ni ikibazo abadepite bavuze ko kigomba gukurikiranwa abahabwa aya mafaranga yaba aya VUP ndetse n’andi agamije kubunganira, bakamenya ko ari ayo kubatera ingabo mu bitugu kugira ngo babe bakwikura mu bukene aho guhora bayatezeho amaboko.

Gahunda ya VUP yatangijwe mu 2008 ifite intego yo kurandura ubukene bukabije ndetse no kugabanya igipimo cy’ubukene.

Ifasha imiryango ikennye mu buryo bunyuranye binyuze mu gutanga imirimo ku bashoboye gukora bahabwaga imirimo ihemberwa, gutanga inguzanyo ziciriritse zo gutangiza imishinga mito mu rwego rwo kwiteza imbere.

AbagenerWabikorwa b’inkunga y’ingoboka ya VUP batoranywa binyuze mu Nteko z’Abaturage, urutonde rwabo rukemezwa n’Inama Njyanama y’Umurenge.

Iyi nkunga yatangiye itangwa ku baturage bagera kuri 6850 mu mirenge 30 yari yatoranyijwe mu 2009, ariko kuri ubu yari igeze ku bantu barenga ibihumbi 99 mu mirenge yose y’Igihugu.

Inkunga y’ingoboka ibarwa hagendewe ku mubare w’abagize urugo, aho urugo rugizwe n’umuntu umwe rugenerwa 7,500 Frw urugizwe n’abantu babiri rukagenerwa 12,000 Frw, urugizwe na batatu ruhabwa 15,000 Frw, urugo rugizwe n’abantu bane ruhabwa 18,000 Frw, mu gihe urugizwe n’abantu batanu cyangwa barenzeho ruhabwa 21,000 Frw buri kwezi.

Ingengo y’imari ishyirwa muri VUP yavuye kuri miliyari 8 Frw mu 2008 VUP igitangira, ubu igeze kuri miliyari 67 Frw mu mwaka w’ingengo y’imari wa 2021/2022 mu rwego rwo kugera ku bagenerwa bikorwa benshi mu kurandura burundu ubukene mu Rwanda.

Harakorwa iki ngo abantu bareke guhora bahanze amaso iyi nkunga?

Umuyobozi Mukuru ushinzwe Imibereho y’Abaturage muri Minisiteri y’Ubutegetsi bw’Igihugu, MINALOC, Huss Moniques yabwiye IGIHE ko abahabwa iyi nkunga bigishwa kuyikoresha neza binyuze mu nama zitandukanye bagirana n’ubuyobozi bw’inzego z’ibanze, bakanasobanurirwa ko inkunga itazahoraho.

Ati “Basinya imihigo yo kwivana mu bukene, aho mbere yo guhabwa amafaranga bafashwa gukora imishinga ibyara inyungu, yamara kwemererwa bagahabwa ubumenyi bw’ibanze mu mikoreshereze y’imari (Financial literacy) bakabona guhabwa inguzanyo.”

Umuryango w’Abibumbye ubinyujije mu ntego zawo zigamije iterambere rirambye ugaragaza ko nibura mu 2030 ubukene bukabije bwaba bararanduwe.

U Rwanda rwo rwiyemeje ko mu mwaka wa 2024 nk’uko byateganyijwe muri gahunda ya Guverinoma y’Imyaka irindwi, NST1 nibura ubukene buzagabanuka kugera kuri 17% naho ubukene bukabije bukagera nibura munsi ya 1%.

Huss Moniques akavuga ko nubwo hari abazava mu bukene ariko hatakwirengagizwa ko hari ibyiciro byihariye bizakomeza gufashwa birimo abakuze, abafite ubumuga bukabije, abana bibana cyangwa abashobora kugirwaho ingaruka z’imihindagurikire idasanzwe y’ibihe, iy’ubukungu, badashora gukora batanafite imiryango yo kubitaho.

Icyakora yemeza ko hashingiwe ku ngamba zashyizweho ziri mu bizafasha abaturage kwivana mu bukene ntibahore bateze amaboko kuri Leta, hashyizweho uburyo bwo gusinya amasezerano yo kwivana mu bukene ku bagenerwabikorwa mu gihe cy’imyaka ibiri.

Ati “Hashyizweho urwego rufasha abagenerwabikorwa gukoresha neza inkunga bahabwa no kubaherekeza mu ishyirwa mu bikorwa ry’imishinga ibyara inyungu bahereye ku nkunga bahabwa.”

Asobanura ko ubu abagenerwa bikorwa bafashwa hashingiwe ku byo bakeneye bagahurizwaho ubufasha bukomatanyije, bagashishikarizwa kugira umuco wo kwizigamira, kwibumbira mu mashyirahamwe no gukorana n’ibigo by’imari.

Ibi ngo bijyana no gukomeza gushyira imbaraga mu guhanga imirimo mishya itanga akazi kuri benshi cyane cyane urubyiruko.

Ati “Ibi byose ntabwo byakoroha kugerwaho bidahujwe na gahunda zindi cyane cyane gushishikarizwa kuboneza urubyaro binyuze mu bukangurambaga bukorwa na Leta ndetse n’abafatanyabikorwa batandukanye.”

Mu 2000/2001 ubukene bwavuye kuri 58.9% bugera kuri 38.2% mu 2016/20217 mu gihe ubukene bukabije bwavuye kuri 40% muri 2000/2001 bugera kuri 16 % muri 2016/2017.

Mu minsi ishize Inama y’aba Mininistiri yemeje inyandiko ngenderwaho (Sustainable Graduation Strategy) izifashishwa mu gukurikirana uko abagenerwabikorwa bivana mu bukene, Huss akavuga ko bizajyana n’ubukangurambaga bugamije guhindura imyumvire ku bufatanye n’abandi bafatanyabikorwa.

Gufatanya n’izindi nzego ubukangurambaga bwo kwihangira imirimo, gushyira imbaraga mu burezi cyane mu kwigisha imyuga gahunda ya Ejo Heza, gufashwa kubona imbuto z’indobanure ndetse n’inyongeramusaruro ngo nabyo biri gushyirwamo imbaraga kugira ngo abaturage bakurwe mu bukene.

Leta imaze gutanga miliyari zirenga 347Frw muri gahunda ya VUP kuva mu 2008

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .