00:00:00 IGIHE NETWORK KN KINYARWANDA EN ENGLISH FR FRANCAIS

Les faits sont têtus!– Imbwirwaruhame zikomeye za Perezida Kagame mu #Kwibuka Jenoside

Yanditswe na Akayezu Jean de Dieu
Kuya 17 April 2022 saa 03:31
Yasuwe :

Imyaka ishize 28 Jenoside yakorewe Abatutsi ariko ababibayemo baracyabyibuka nk’ibyabaye ejo. Iyo ni nayo myaka ishize hatangwa impanuro zitandukanye zigamije ko ibyabaye bitazongera.

Perezida Paul Kagame ni umwe mu bayobozi batahwemye gutanga impanuro zuje ubuhanga kuva ku munsi wa mbere, agamije ko amateka mabi u Rwanda rwanyuzemo atongera kubaho.

Ubwo yatangizaga Icyumweru cy’Icyunamo n’ibikorwa byo kwibuka ku nshuro ya 25 Jenoside yakorewe Abatutsi, Perezida Kagame yagarutse ku nkuru y’umwana w’umukobwa wamubajije ahantu Imana yari ubwo Abatutsi basaga miliyoni bicwaga mu mezi atatu gusa.

Umukuru w’Igihugu yabivuze ku wa 7 Mata 2019, mu ijambo yagejeje ku Banyarwanda n’inshuti zabo bari bateraniye muri Kigali Convention Centre n’abandi bari bakurikiye uwo muhango binyuze mu bitangazamakuru n’irindi koranabuhanga.

Icyo gihe yagize ati “Ubwo twari mu muhango wo Kwibuka Jenoside mu myaka yashize, umwana w’umukobwa yatugejejeho umuvugo watumye abantu benshi barira. Yagize ati ‘Byaravugwaga ngo Imana yirirwa ahandi igataha i Rwanda.’ Hanyuma arabaza ati ‘Muri ariya majoro muri Jenoside, Imana yari hehe?’”

Perezida Kagame yahise abwira abakurikiye uwo muhango ko kugeza ubu Imana yagarutse, kandi isigaye yirirwa mu Rwanda ikanaharara.

Ati “Iyo turebye u Rwanda uko rumeze uyu munsi, biragaragara ko Imana yagarutse imuhira, kandi izahaguma. Ntizongera kuhava, nk’uko twumvise mu kanya.”

Ibikorwa byo kwibuka no guha icyubahiro Abatutsi barenga miliyoni bishwe muri Jenoside yabakorewe byatangiye mu 1995, icyo gihe Paul Kagame yari Visi Perezida akaba na Minisitiri w’Ingabo.

Muri uwo muhango wabaye ku wa 7 Mata 1995 ku i Rebero mu Mujyi wa Kigali, Perezida Kagame yavuze ko Jenoside yabaye mu Rwanda ari ibintu bihari aho kuba inkuru zivugwa gusa, kuko abantu bagera muri miliyoni bishwe.

Yakomeje ati "Kugeza ubu ibyobo rusange birimo gutahurwa ahantu hose mu gihugu. Miliyoni imwe ni igereranya nta muntu washyize hamwe imibare ngo amenye neza ngo ni abantu bangahe bapfuye. Uretse n’imibare, ibi bikorwa ni ibintu bitagenda gutyo gusa, ntibyakomeza hatabayeho ko ababigizemo uruhare babiryozwa."

"Bagomba kubiryozwa byanze bikunze kandi mu kubikora, tugomba gushishikariza abaturage bacu kumva ibibazo byababayeho, byabaye kuri iki gihugu."

Muri rusange, ubutumwa Umukuru w’Igihugu yagiye avuga bufite agaciro gakomeye ku mateka y’u Rwanda n’Abanyarwanda ari nayo mpamvu IGIHE yasubije amaso inyuma ihereye mu myaka ya 2012 [ni ukuvuga imyaka 10 ishize kugeza ubu], ikagaruka kuri bimwe mu byaranze ubutumwa Perezida Kagame yagiye atanga buri mwaka.

  Twibuka abo twabuze, bamwe mu bahekuye u Rwanda bakidegembya

Mu 2012, u Rwanda rwibukaga ku nshuro ya 18 Jenoside yakorewe Abatutsi. Icyo gihe nk’uko bimeze uyu munsi hari bamwe mu bayigizemo uruhare bakomeje kwidegembya hirya no hino mu bihugu by’amahanga batarashyikirizwa ubutabera ngo baryozwe ayo mahano bakoze.

Mu ijambo Perezida Kagame yavugiye muri Stade Amahoro, tariki 7 Mata 2012, mu muhango wo gutangiza Icyunamo yagarutse kuri iyo ngingo.

Yagize ati “Tuzahora tubibuka kandi kugira ngo n’abatarabaye muri icyo gihe bamenye amateka mabi ya Jenoside iki gihugu cyacu cyanyuzemo ndetse n’icyateye ayo mateka mabi ya Jenoside, bityo na bo bazahore bazirikana ayo mateka n’igihe tuzaba tutagihari. Bayavanemo amasomo kugira ngo ibyabaye bitazongera kubaho ikindi gihe.”

Yakomeje agira ati “Ariko nk’uko mubizi, muri iki gihe twibuka abo twabuze, bamwe mu bahekuye u Rwanda barakidegembya hirya no hino mu bihugu byitwa ko byateye imbere. Byaganje mu bijyanye n’ikiremwamuntu, mu bijyanye n’ubwigenge, mu bijyanye n’ibijyana n’agaciro ku buzima ako ariko kose.”

Icyo gihe Perezida Kagame yavuze ko rimwe na rimwe ibyo bihugu bitagaragaza ubushake bwo kugeza abahemukiye igihugu imbere y’ubutabera.

Ati “N’iyo batawe muri yombi biba ari ibya nyirarureshwa kugira ngo twibwire ko hari icyo babikoraho. Ndetse nibitinda bakaba barekuwe. Nyamara nk’uko tubizi ibyo bihugu bihuye n’ibibazo by’iterabwoba, guhungabanya umutekano wa banyir’ibyo bihugu, biyambaza Isi yose.”

“Bakayikangurira kubihagukira ngo bikemurwe, ndetse rimwe na rimwe bagakoresha n’ingufu kugira ngo abantu bose babyitabire, kugira ngo abo bagizi ba nabi babikurikiranweho, bashyirwe imbere y’ubutabera babibazwe. Ntabwo byakumvikana, impamvu ku Banyarwanda, cyangwa no mu bandi dufitanye isano nk’Abanyafurika, ibyo bitagenda bityo.”

Muri uwo mwaka Perezida Kagame yanavuze ko hari n’abakoze ayo marorerwa usanga bahabwa intebe n’umwanya wo kwidagadura bishimira ko Jenoside yabaye.

Ati “Bikavugwa ko ibyo ari ukubera ko bafite uburenganzira bwo guharanira politiki ngo ni mu burenganzira bwa politiki yabo. Muri ubwo burenganzira harimo no kwishimira ko bahekuye u Rwanda. Ntabwo nibwira ko ari ko bikwiye kumvikana.”

Yakomeje agira ati “Ariko na none biradusaba ko ubwo Abanyarwanda duhangana nabyo tukabishyira mu buryo. Ndetse hari n’imvugo nyinshi, zirimo ibirego byinshi byabo bashyigikira, abo bidagadura bishimira ko bahekuye u Rwanda. Ibirego bikaba ko mu Rwanda nta demokarasi, nta burenganzira bw’ikiremwamuntu, nta burenganzira ubwo ari bwo bwose, ntawe uvuga.”

Mu mwaka wakurikiyeho wa 2013, ni bwo Kwibuka byari bitangiye kubera ku rwego rw’igihugu kugeza ku mudugudu, uba umwanya wo gusubiza amaso inyuma mu myaka 20 yari ishize Jenoside ibaye, hakarebwa urwo rugendo, inzira yo kongera kubaka u Rwanda, gusubiza Abanyarwanda ubuzima n’agaciro no kubateza imbere muri rusange.

Perezida Kagame yagize ati“Ni yo mpamvu uyu mwaka, igikorwa cyo kwibuka kitabereye ku rwego rw’igihugu, nkuko bisanzwe, ahubwo kikajya ku mudugudu ngo Abanyarwanda bose bagire amahirwe yo kucyitabira, bakigire icyabo, kandi bagire uruhare rugaragara muri gahunda zose zo kwibuka.”

Umukuru w’Igihugu yavuze ko kwibuka Jenoside yakorewe Abatutsi ari inshingano ya buri Munyarwanda, igomba gutozwa abakiri bato na bo bakayitoza abazabakomokaho.

Ati “Tugomba gukora ibishoboka byose kugira ngo twandika amateka yacu. Tubungabunge ibimenyetso, harimo n’inzibutso, kugira ngo bitazasibangana, ahubwo bizabere abantu bose uburyo bwo kwibuka, gukumira no kurwanya Jenoside.”

  Erega n’ubundi ukuri ntiguhinduka

Mu 2014, Umukuru w’Igihugu yatanze ubutumwa bwibutsa ko abateguye Jenoside bakayishyira mu bikorwa bari Abanyarwanda. Yavuze ko amateka yayo, n’ibyayiteye birenze imipaka y’u Rwanda, ari nayo mpamvu Abanyarwanda bashatse kandi bazakomeza gushaka ibisobanuro byuzuye by’ibyabaye.

Ati “Ibi tubikora twiyoroheje nk’abantu bari basenye umuryango wacu, ariko kandi tukaba twariyemeje kwisubiza agaciro nk’igihugu.”

Yakomeje agira ati “Imyaka 20 ni igihe gito cyangwa kirekire bitewe n’aho uhagaze, ariko iyo si impamvu yo kugereranya ibidahuye. Uko ibihe bihita ntibikwiye gukoreshwa mu gusibanganya ukuri, kugabanya uruhare rwa bamwe, cyangwa guhindura inzirakarengane abicanyi.”

Perezida Kagame yibukije ko gushaka gusibanganya amateka ya Jenoside yakorewe Abatutsi bidashoboka kuko n’ukuri kudahinduka ndetse abivuga mu rurimi rw’Igifaransa [Les faits sont têtus].

Ati “Ntabwo abantu bagurirwa kugira ngo bahindure amateka yabo. Nta gihugu, nubwo cyaba kibwira ko ari igihangange, gifite ububasha bwo guhindura ukuri kw’amateka y’abantu. Erega n’ubundi ukuri ntiguhinduka, guca mu ziko ntabwo gushya.”

Yakomeje agira ati “Iyo rero tuvuga ku ruhare rw’abanyamahanga n’inzego z’amahanga muri Jenoside, ni uko kuyikumira bisaba ko habaho kumvikana neza kw’amateka. Ntabwo ari uko dushaka gushyira icyaha ku bandi.”

Muri uwo mwaka ni bwo Umukuru w’Igihugu yavuze ko Abanyarwanda bahisemo ibintu bitatu by’ingenzi bagenderaho kugeza n’uyu munsi birimo ubumwe, kwihitiramo ibibabereye no kureba kure.

Mu 2016, Perezida Kagame yagarutse ku kuba abantu barenga miliyoni imwe batakaje ubuzima bwabo, bazize ingengabitekerezo mbi.

Ati “Abo bose ntabwo ari umubare gusa, si umubare w’abantu bapfuye tukabara miliyoni bagahita. Ni imiryango, ni inshuti, ni abavandimwe, bakundwaga n’abasigaye, bubahana. Ni nako bikomeza nubwo batakiriho. Ariko rero, amateka y’u Rwanda n’Abanyarwanda ntabwo ari aha yarangirira. Ntabwo yarangirira ku kuntu twatakaje abacu.”

Yakomeje agira ati “Amateka y’igihugu yo azakomeza kubakwa. Tugomba gushaka uburyo bwose igihugu gikomeza kikabaho kitibagiwe abo cyabuze, ku buryo butari bwo. Ndetse, ako kababaro nkuko bikunze kuvugwa iteka, nako kaba muri bimwe twubakiraho nk’umusingi ukomeye w’ubuzima bushya bw’igihugu cyacu.”

  Ntawe utugenera ubuzima

Ubwo yagezaga ijambo ku bitabiriye umuhango wo kwibuka ku nshuro ya 21 Jenoside, Perezida Kagame, yavuze ko Abanyarwanda bafite uburenganzira ku buzima kandi ntawe ububagenera.

Ati “Ubuzima Abanyarwanda bambuwe bugatwarwa n’abandi, baba ari Abanyarwanda, baba ari abanyamahanga ubwo buzima tuzi kubuharanira. Tuzabuharanira, nta watugenera ubuzima. Ntawe uzatugenera ubuzima bwacu.”

“Turakubitwa imbere n’inyuma, hejuru no hasi ariko turacyariho; ntaho tuzajya. Abanyarwanda, uburenganzira bwabo. Abagiye baragiye, abo turabibuka. Impamvu tubibuka hano uyu munsi, ntabwo ari uko dufite ubwoba bw’uko bashobora kwibagirana, ntabwo bashobora kwibagirana, ahubwo kubibuka ni ukubaha agaciro n’ubundi bakwiye.”

Perezida Kagame yavuze kandi ko ari yo mpamvu Abanyarwanda bibuka buri mwaka Abatutsi barenga miliyoni bishwe muri Jenoside.

Ati “Nicyo gituma, tuza hano kwibuka. Ntituza kwibuka, nta n’ubwo twibutswa kwibuka, ni ngombwa kuko biri mu guha agaciro abantu bacu bapfuye, ariko noneho bivamo no kugaha abakiri bazima.”

“Ako karengane rero kagiye gakorwa ku Rwanda, ndagira ngo mbwire Abanyarwanda bose n’abandi b’inshuti z’u Rwanda; ntibyari bikwiriye kandi byatuviriyemo imbaraga zidasanzwe zo guhangana n’ibibazo byacu.”

Perezida Kagame yibukije ko gushaka gusibanganya amateka ya Jenoside yakorewe Abatutsi bidashoboka kuko n’ukuri kudahinduka

Ibi kandi yabishimangiye mu 2018, ubwo yagiraga ati “Kwibuka, ikindi cyabyo, ni uko ari uguhangana n’amateka yacu. Iteka iyo twibuka duhura n’amateka yacu atuma twibuka. Twongera guhangana nayo, duhura nayo tukarebana nayo bundi bushya.”

Yakomeje agira ati “Ni ibitwibutsa rero ko hari amateka mabi twagize tutagombaga kugira. Ni ibitwibutsa ko tutarebye neza amateka ashobora kwisubiramo, ashobora kongera kuba. Ni ukutwibutsa ko hari ibigomba gukorwa kugira ngo ayo mateka atazongera kuba.”

Mu 2020, nabwo yavuze ko Abanyarwanda bibuka amahano igihugu cyanyuzemo n’ibyo cyatakaje, kandi hazakomeza kubaho ibikorwa byo gukomeza kwigisha Abanyarwanda babyiruka ubu, n’abazakurikiraho, ibyabaye ku gihugu n’amasomo Abanyarwanda babikuyemo.

Ati “Ayo masomo turayashyira mu bikorwa kugira ngo azagirire akamaro abazadukomokaho. Ibyo byose twize mu mateka yacu ni ibikomeza ubumwe bwacu. Atwigisha agaciro k’ubuyobozi bwiza, bwita ku mibereho y’abenegihugu.”

“Twamenye akamaro ko gukorera hamwe, tukubaka ahazaza habereye Abanyarwanda bose. Ubudatezuka n’umutima w’impuhwe biranga Abanyarwanda bizakomeza kudufasha mu kunyura mu bibazo bishya duhura nabyo, harimo n’ibyo muri iyi minsi.”

Buri tariki ya 7 Mata, Perezida Kagame atangiza Icyumweru cy'Icyunamo n'Iminsi 100 yo Kwibuka Jenoside yakorewe Abatutsi mu 1994

  Nta na hamwe wabona abantu baturusha agaciro

Mu gutangiza Icyunamo ku wa 7 Mata 2022, Perezida Kagame yavuze ko muri iki gihe hari uburyo butatu byitwa ko buyobora Isi harimo demokarasi, igitugu n’uburyarya.

Yagize ati “Ubukomeye, bufite imbaraga kandi bucishije make, ni uburyarya. Kuri twe, tuzafata izina uwo ariwe wese ashaka kuduha. Nta kibazo mbifiteho ariko amasomo twize, ibintu tuzi, ni uko icy’ingenzi intambwe ndende uzagenda, ibilometero, ibihumbi; ntabwo uzabona abantu bafite agaciro cyangwa ubuzima bufite agaciro kurusha ubwacu.”

“Nta n’ubuzima bufite agaciro kurusha ubwacu n’ubwo ubuzima bwacu bwangijwe, bugapfushwa ubusa nk’uko ubuhamya bwatanzwe n’uriya musore bwabitweretse.’’

Perezida Kagame yavuze ko urubyiruko rwavutse mu myaka 28 ishize, mu gukura kwarwo rwigiyemo amateka y’igihugu usangamo abagabo n’abagore ushobora kwita intwari.

Gusa agaragaza ko hari ikibazo ajya agira ku ijambo intwari n’igisobanuro rihabwa agendeye ku mateka y’u Rwanda.

Ati “Iyo uri kuvuga intwari, uba ugaragaza ibihe byari bigoye bisaba ko habaho intwari kugira ngo zikore ibyo zakoze, ibintu bizima, byiza ari byo kwirokora ubwabo no kurokora abandi. Ariko rero ndibaza nti ahari ibyiza si ukugira intwari, ahubwo ni ukutagira bya bibazo bisaba ko habaho intwari.”

Umukuru w’Igihugu yavuze ko mu mateka y’u Rwanda, bigoye kwiyumvisha kuba umuntu yaba intwari kandi hari miliyoni y’abandi bapfuye kandi bari bakwiriye kurokorwa.

Ati “Iyo tuba tutaragize bya bibazo bituma bamwe baba intwari byari kuba byiza kurushaho.”

Perezida Kagame yashimye abarokotse Jenoside bakomeje gukomera bakabaho nk’abantu basanzwe, birengagije ibihe bikomeye banyuzemo

Perezida Kagame yashimye abarokotse Jenoside, bakomeje gukomera bakabaho nk’abantu basanzwe, birengagije ibihe bikomeye banyuzemo. Yavuze ko mu myaka 28 ishize, buri mwaka utuma Abanyarwanda baba abantu bakomeye, bazi neza abo bashaka kuba bo kandi babyihitiyemo.

Umukuru w’Igihugu yavuze ko atumva impamvu hari ibihugu bikigowe no guha Jenoside yakorewe Abatutsi inyito yayo iboneye ahubwo bikumvikanisha ko hari n’abandi bishwe.

Ati “Murabizi ko hari abantu bitaga inyenzi. Izina inyenzi ryari ryarashyiriweho abantu runaka, hanyuma mu gihe bicaga, bicaga inyenzi kandi babivugaga beruye. Kuvuga ko ari Jenoside yakorewe Abatutsi, ni gute byaba ikibazo cyangwa byagibwaho impaka? Keretse ahari ufite ikindi kibazo. Ibi ni byo biha rugari abajenosideri bagatangira kuvuga ko bimakaza demokarasi.”

Umukuru w’Igihugu yavuze ko mu bihe nk’ibi byo kwibuka, abantu bisanga ntacyo bafite cyo kuvuga atari uko badafite ubwisanzure bwo kuvuga nk’uko bamwe bajya babyitirira u Rwanda.

Perezida Kagame yavuze ko rimwe na rimwe hari ibihugu bitagaragaza ubushake bwo kugeza abahemukiye igihugu imbere y’ubutabera ngo baryozwe ibyo bakoze
Perezida Kagame mu muhango wo kwibuka ku nshuro ya 20

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .