Lacina Koné yagizwe Umuyobozi Mukuru wa gahunda ya Smart Africa

Yanditswe na Cyprien Niyomwungeri
Kuya 11 Gashyantare 2019 saa 12:03
Yasuwe :
0 0

Inama y’akanama k’ubuyobozi bwa gahunda ya Smart Africa, yateranye kuri uyu wa Mbere, yameje ko Lacina Koné, ukomoka muri Côte d’Ivoire, asimbura Dr. Hamadoun Touré, ku buyobozi bw’iyi gahunda.

Iyi nama yayobowe na Perezida Kagame akaba n’umuyobozi w’akanama k’ubuyobozi ka Smart Africa, yabereye i Addis Ababa, ahaberaga inama isanzwe y’Abakuru b’Ibihugu bya Afurika yunze Ubumwe (AU).

Lacina Koné ni umwe mu bajyanama ba Perezida Alassane Ouattara, mu bijyanye n’ikoranabuhanga.

Afite imyaka 52 n’uburambe bukomeye mu bijyanye n’ikoranabuhanga dore ko yamaze imyaka myinshi akora mu bigo bikomeye byo muri Leta zunze Ubumwe za Amerika, birimo igitanga serivisi zo gukoresha icyogajuru mu itumanaho, Intelsat n’ikitwa Booz Allen Hamilton.

Mu 2011 nibwo yageze i Abidjan agiye kuba umujyanama wa Alassane Ouattara, wari umaze kujya ku butegetsi. Avuga indimi eshatu arizo; Igifaransa, Icyongereza n’Icyarabu.

Afite impamyabumenyi yakuye muri Kaminuza zitandukanye zirimo; Kaminuza y’Ubumenyi n’Ikoranabuhanga ya Ajman, Brunel University yo mu Bwongereza na George Washington University yo muri Leta zunze Ubumwe za Amerika.

Asimbuye Dr Hamadoun Touré ukomoka muri Mali wagizwe umuyobozi mukuru wa gahunda ya Smart Africa mu, nyuma y’uko yabaye Umunyamabanga Mukuru w’Umuryango Mpuzamahanga wita ku ikoranabuhanga (ITU) kugeza mu 2014. Ni umuhanga mu bijyanye n’ibyogajuru.

Yabaye umuyobozi mukuru wa gahunda ya Smart Africa mu gihe cy’imyaka itatu uhereye kuwa 1 Mutarama 2016. Icyicaro cy’Umuyobozi Mukuru wa gahunda ya Smart Africa kib mu bunyamabanga bw’iyi gahunda i Kigali.

Smart Africa ni gahunda igamije ko ikoranabuhanga riba umusingi w’ibindi bikorwa by’iterambere rya Afurika binyuze mu gukoresha umuyoboro mugari wa internet ihendutse.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza