#Kwibuka26: Icyo amadini yabuze ngo arogoye umugambi wa Jenoside yakorewe Abatutsi

Yanditswe na Twarabanye Venuste
Kuya 10 Mata 2020 saa 10:11
Yasuwe :
0 0

Abanyamadini baravuga ko iyo amadini ahagarara ku murongo w’ibyo yigisha n’ibyo yemera yari kurogoya umugambi w’itegurwa n’ishyirwa mu bikorwa rya Jenoside yakorewe Abatutsi.

Amateka yerekana ko amadini atigeze agira icyo akora kandi yari afite izo mbaraga, nubwo ku rundi ruhande hari abihayimana bahagaze bakanga ko abo bari kumwe bicwa.

Mu kiganiro ku Ruhare rw’Amadini mu kubaka Ubunyarwanda cyanyuze kuri RBA, abanyamadini bemeranyije ko abari bayayoboye babangikanyije gahunda zayo na politiki kurusha gushingira ku byo yemera n’ibyo yigisha.

Umushumba mu Itorero ry’Abangilikani, Pasiteri Antoine Rutayisire, yavuze ko ikibazo amadini yagize ari uko atahagaze ku nyigisho z’iyobokamana, agakurikira umurongo wa Politiki.

Ati “Nta hantu twageze ngo twisuzume tuvuge ngo uyu murongo twafashe siwo reka tuwuhindure.”

Pasiteri Rutayisire yavuze ko amadini yakurikiraga umurongo Leta yafashe, atabanje kureba niba ibiri gukorwa bihuye n’imyemerere n’izindi nyigisho z’iyobokamana.

Ati “No mu 1994 iyo Leta y’u Rwanda idafata umurongo w’ubumwe bw’Abanyarwanda, wenda ikavuga iti bakoze nabi natwe tubiture ibyo badukoreye sinzi ko abanyamadini twari kugira imbaraga zo guhaguruka ngo tuvuge ngo oya turi abanyamadini twigisha gukundana ntabwo turi bubakurikire muri iyo nzira. Aho niho dufite ikibazo gikomeye, kumenya gufata umurongo w’abo turi bo n’ibyo twizera.”

Mu bihe bya Noheli mu 1993, Itorero ry’Abangilikani mu Rwanda ryateguye igiterane cy’ivugabutumwa mu Mujyi wa Kigali cyari gifite intego igira iti ‘Twihane inzangano dukundane twubake igihugu cyiza’.

Icyo gihe ngo Rutayisire yabwiye mugenzi we ko ari buvuge ku kwihana inzangano arabyanga avuga ko ari bwigishe ijambo ry’Imana gusa. Kuri we ngo habuze rya jwi ry’abahanuzi ba kera bazamuraga bakavuga bagakubitwa. Cyari igihe cyiza cyo kuba amadini yavuga ukuri ariko atinya kwiteranya.

Mufiti w’u Rwanda, Sheikh Hitimana Salim, yavuze ko ikibazo cyabaye igihe imbaraga za politiki zagize intege nke mu kwita ku baturage ziyongeraho n’igitinyiro amadini nayo arakurikira.

Ati “Nibaza ko ababwiriza butumwa barumye gihwa bakagenda bajyana n’umurongo wa politiki kandi bagira intege nke cyane.”

Umushumba wa Diyosezi Gatolika ya Butare akaba na Perezida w’Inama y’Abepiskopi mu Rwanda, Mgr Philippe Rukamba, yemeranya na bagenzi gusa akibutsa ko uko byagenda kose Jenoside itegurwa n’ubuyobozi.

Ati “Amadini yakurikiye amategeko ya leta kuva kera cyane […] ariko tujye twibuka ko Jenoside nubwo haza ibintu byinshi bigenda biyifasha ni ikintu gikomoka ku buyobozi, kuri leta ikoresha abantu.”

Pasiteri Rutayisire wigaga muri Seminari Nto y’i Zaza mu 1973 yavuze ko abiyayimana bakabaye baratinyutse mbere bagatangira kwereka Abanyarwanda ko ubwicanyi bakoze kuva muri za 1959 ari icyaha nta mpamvu yabwo bagatangira kwigisha ubumwe n’ubwiyunge nkuko babikoze nyuma ya Jenoside.

-  Uruhare rw’amadini mu kubaka u Rwanda nyuma ya Jenoside

Nyuma ya Jenoside amadini yagize uruhare rukomeye mu kongera kwiyubaka kw’igihugu cyane cyane mu bumwe n’ubwiyunge bw’Abanyarwanda no gufasha mu mibereho abarokotse Jenoside yakorewe Abatutsi.

Musenyeri Rukamba avuga ko icyagombaga gukorwa ari uguhuza abantu. Kubwira abantu ko uwagize nabi agomba gusaba imbabazi ku nabi yakoze ariko n’uwagiriwe nabi abakwirwa gusaba Imana imbaraga zo kubabarira kuko ubukirisitu bujyana no kubabarira.

Amadini n’imiryango iyashingiyeho yafatanyije kwigisha muri za gereza kugira ngo abakoze ibyaha bahinduke basabe imbabazi, urugendo n’ubu rukomeje.

Ati “Ibyo byasabaga umuntu kwemera ko yagize nabi ku Mana, no ku wo yakoreye icyaha akaba agomba kwigorora na we. Izo nyigisho ziracyakomeza kandi iyo umuntu afite amahoro mu mutima n’igihugu kigira amahoro.”

Amadini atandukanye akomeje gahunda z’isanamitima nk’aho muri Kiliziya Gatolika hari gahunda yo guhuza abishe n’abiciwe. U Rwanda rugeze ku gipimo cya 92.5% mu bumwe n’ubwiyunge, umubare wavuye kuri 82.3% mu 2010 amadini akaba afite uruhare rukomeye muri urwo rugendo.

Pasiteri Rutayisire yavuze ko amadini yakurikiraga umurongo Leta yafashe, atabanje kureba niba ibiri gukorwa bihuye n’imyemerere yayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .