00:00:00 IGIHE NETWORK KN KINYARWANDA EN ENGLISH FR FRANCAIS

Kuvugurura utujagari, kwagura Imbuga City Walk, imihanda mishya…. Imishinga igiye guhindura isura ya Kigali

Yanditswe na Akayezu Jean de Dieu
Kuya 10 July 2022 saa 07:56
Yasuwe :

Ku bazi Umurwa Mukuru w’u Rwanda, Kigali, mu myaka 28 ishize, isura yawo yarahindutse cyane ndetse n’iterambere ryawo ryihuta mu buryo budasanzwe n’ubwo ahanini usanga bijyana n’ibindi bice by’igihugu.

Inzu z’imiturirwa zarubatswe, izindi zizamurwa buri munsi, imihanda myiza iriyongera ubutitsa, umuriro n’amazi bigenda byegerezwa abaturage hafi ya bose. Ibi bituma Umujyi wa Kigali uza mu yiyubatse kandi ikomeje gutera imbere ku ruhando mpuzamahanga.

Mu biranga iterambere ry’umujyi harimo ibikorwa n’imirimo idashingiye ku buhinzi n’ubworozi ahubwo bishingiye kuri serivisi no kuba haboneka ibikorwaremezo byinshi.

Iyi ni yo mpamvu Umujyi wa Kigali ukomeje gushyira imbaraga mu guteza imbere ibikorwaremezo ariko binajyana no guhindura imibereho y’abawutuye.

Inama Njyanama y’Umujyi wa Kigali iherutse gutora ingengo y’imari izakoreshwa kuva tariki 1 Nyakanga 2022 kugeza ku wa 30 Kamena 2023, ingana na miliyari 137,5 Frw. Yiyongereyeho 7,7% ugereranyije n’iy’umwaka ushize yari miliyari 127,6Frw.

Ni amafaranga azakoreshwa mu guhindura isura y’Umujyi wa Kigali n’imibereho y’abawutuye binyuze mu kububakira ibikorwaremezo bibafasha kwiteza imbere, kuvugurura imiturire, kubakira abatishoboye n’ibindi.

Perezida w’Inama Njyanama y’Umujyi wa Kigali, Dr Muganga Kayihura Didas, yabwiye IGIHE ko muri uyu mwaka hazibandwa ku bikorwa by’iterambere kuko ubu byihariye 40%.

Ati “Iyi ngengo y’imari ubwayo ni ubuzima bw’Umunyamujyi. Umuturage w’Umujyi wa Kigali agomba kurangwa n’ibikorwa by’iterambere. Ibikorwaremezo, inyubako ariko kandi tutirengagije n’ibikorwa byo guhindura imibereho y’abaturage.”

Muri rusange izi miriyari 137,5 Frw zizakoreshwa hibandwa ku nkingi eshatu za guverinoma zirimo ‘Ubukungu, Imibereho Myiza n’Imiyoborere’.

  Ibilometero 69.8 by’imihanda bigiye kubakwa

Ibikorwaremezo ni kimwe mu bishyirwamo imbaraga mu guhindura isura ya Kigali.

Guverinoma y’u Rwanda ifite intego y’uko mu 2024, buri Munyarwanda azaba agerwaho n’amazi meza n’amashanyarazi. Ibi biri mu byo Umujyi wa Kigali uzibandaho wubaka ibikorwaremezo by’amashanyarazi n’amazi aho bitaragera.

Mu bindi bikorwaremezo bizubakwa harimo imihanda ahazubakwa ibilometero 69.8 bigashyirwamo kaburimbo. Ni imihanda izatwara ingengo y’imari ingana na miliyari 17,2 Frw.

Hari kandi n’imihanda izubakwa n’abaturage ubwabo ariko Umujyi wa Kigali ukabunganira ahateganyijwe kubakwa ibilometero 20. Iyi mihanda izubakwa n’abaturage bafatanyije n’ubuyobozi yo izatwara miliyari 1,5 Frw.

Kubaka imihanda kandi bizajyana no kuvugurura ibijyanye no gutwara abantu mu buryo bwa rusange ahateganywa kongera umubare w’imodoka no kubaka utuzu abagenzi bicaramo bazitegereje.

Mu mwaka w'ingengo y'imari hateganyijwe kubakwa imihanda mishya mu bice bitandukanye by'Umujyi wa Kigali

Uretse imihanda kandi hari ibyanya bine by’imyidagaduro bizatunganywa, ibiraro bine byo mu kirere bizubakwa mu bice by’icyaro ndetse na Kanyinya Hiking Site izatunganywa.

Ni ibikorwa byose bigamije guhindura imibereho myiza y’abaturage nk’uko bisobanurwa na Perezida w’Inama Njyanama y’Umujyi wa Kigali, Dr Muganga Kayihura Didas.

Ati “Hari n’ibindi bikorwa birimo ibyo guteza imbere impano z’abakiri bato bubakirwa ibibuga by’imikino, dushyiraho ahantu hahiriye urubyiruko ruhurira rukaganirizwa, rugakina, rukidagadura n’ibindi.”

Uduce two gukorerwamo siporo yo kuzamuka imisozi tuzatunganywa muri Kigali

  Miliyari 11,5 Frw zo kuvugurura utujagari

Muri uyu mwaka w’ingengo y’imari, hazibandwa ku kurwanya imiturire y’utujagari ahazavugururwa imiturire y’Umujyi kugira ngo ijyane n’ibihe bigezweho. Ni ibikorwa bizatwara miliyari 11,5 Frw.

Umuyobozi Mukuru w’Ibikorwa by’Umujyi wa Kigali, Rugaza Julian, avuga ko uduce tuzavugururwa ari utwa Nyabisindu na Nyagatovu mu Karere ka Gasabo; Gitega mu Karere ka Nyarugenge na Gatenga muri Kicukiro.

Ibikorwa bizashyirwa muri utu duce birimo imihanda, amashanyarazi, amatara yo ku mihanda, amazi, imiyoboro y’amazi n’ibindi bikorwa bifasha abaturage mu buryo bwo kwiteza imbere.

Umujyi wa Kigali unafite gahunda yo kuvugurura imiturire mu duce twa Muhima na Gatsata ahazakoreshwa miliyari 2Frw mu kubaka inzu zigezweho ahazwi nko kuri Mpazi, zizatuzwamo bamwe mu baturage batuye ahantu hashyira ubuzima bwabo mu kaga muri ibyo bice.

Abatuye mu tujagari bagiye kubakirwa inzu zigezweho, izi ni izubatswe ahazwi nko kuri Mpazi mu Karere ka Nyarugenge

  Miliyoni 600 Frw zo kuvugurura Imbuga City Walk

Mu 2015, ni bwo umuhanda wa KN 4 Avenue, wahinduwe uw’abanyamaguru aho Umujyi wa Kigali wari ufite intego y’uko abantu bazajya bawukoresha batabisikana n’ibinyabiziga.

Hari no mu rwego rwo kugira ngo umujyi wisanzure ndetse aka gace kahise gahabwa izina rya ‘Car Free Zone’ abantu bakagakoresha basabana kakaba rusange aho abantu b’ingeri zitandukanye bashobora guhurira.

Nyuma yo kubona ko abantu bakomeje kwishimira ishyirwaho rya ‘Car Free Zone, Umujyi wa Kigali wahise ushyiraho gahunda yo kuvugurura aka gace kakitwa ‘Imbuga City Walk’. Ni ibikorwa byarangiranye n’umwaka ushize wa 2021.

‘Imbuga City Walk’ igizwe n’inzira z’abanyamaguru n’abatwara amagare, ubusitani, kiosks (zizaba zicururizwamo ibirimo amafunguro n’ibinyobwa), ahagenewe kumurika ibikorwa, intebe rusange z’abashaka kuhaganirira, aho wabona WiFi (internet), ubwiherero rusange n’ibindi.

Kuri ubu, ubuyobozi bw’Umujyi wa Kigali bwatangaje ko Imbuga City Walk igiye kwagurwa ikagera ku Bitaro bya Kaminuza bya Kigali, CHUK. Ni ibikorwa bizatwara miliyoni 600 Frw.

Imbuga City Walk iri mu Mujyi wa Kigali rwagati mu gace kahariwe abanyamaguru

  Miliyoni 727,4 Frw zo kubakira abazunguzayi

Mu myaka yashize Umujyi wa Kigali washyize imbaraga mu gufasha abakora ubucuruzi butemewe bazwi nk’abazunguzayi, kugira ngo babashe guhabwa ahantu ho gukorera ubucuruzi bwemewe kandi bubafasha kwiteza imbere.

Rugaza avuga ko mu guteza imbere imibereho y’abatuye Umujyi wa Kigali by’umwihariko abakora ubu bucuruzi butemewe, hazakoreshwa miliyoni 727,4 Frw azakoreshwa mu kububakira amasoko no kubaha igishoro.

Avuga ko abazafashwa ari abacuruzi 3,941 bo mu turere dutatu tugize Umujyi wa Kigali. Barimo 18.000 bo muri Gasabo, 952 bo muri Kicukiro na 1080 b’i Nyarugenge.

Hazubakwa amasoko mato icyenda ndetse n’abacuruzi bazayashyirwamo bahabwe amafaranga y’igishoro.

Abazunguzayi bazubakirwa amasoko icyenda banahabwe igishoro
Imbuga City Walk igiye kwagurwa igere kuri CHUK
Dr Kayihura Muganga Didas asanzwe ari Perezida w'Inama Njyanama y'Umujyi wa Kigali
Umujyi wa Kigali uherutse kwemeza ingengo y'imari ya miliyari 137 Frw azakoreshwa hagati ya tariki 1 Nyakanga 2022 n'iya 30 Kamena 2023
Ibikorwa bifasha abana kwidagadura bizibandwaho mu ngengo y'imari y'uyu mwaka mu Mujyi wa Kigali
Hagiye kubakwa ibiraro byo mu kirere mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .