Kuva muri siporo akaba Meya, kwirekura, gutungurwa n’umubyeyi we: Ikiganiro na Mutabazi uyobora Bugesera

Yanditswe na Ferdinand Maniraguha
Kuya 6 Gashyantare 2020 saa 12:21
Yasuwe :
0 0

Aho isi igeze, abayobozi wasanga batagira imbuga nkoranyambaga ni mbarwa ariko abazikoresha nabo barabaze. Si kenshi wasanga umuyobozi ku rwego rwa Meya agira amarangamutima ngo ayasangize abo ayobora n’abamubona.

Byashoboka ko biterwa na za nyigisho z’umunyapolitiki w’Umutaliyani Niccolo Machiavelli, wavuze ko “umuyobozi agomba gutinywa n’abo ayobora aho gukundwa nabo, mu gihe byombi bitamushobokera kubikorera rimwe.”

Iyo mvugo siko iri kuri Meya Richard Mutabazi, umaze imyaka ibiri n’igice ayobora Akarere ka Bugesera, nyuma y’imyaka myinshi yari amaze mu bijyanye na siporo.

Ni umwe muri bayobozi bakoresha cyane urubuga nkoranyambaga rwa Twitter, haba mu kazi kabo no mu buzima busanzwe. Mu gihe abenshi banga gushyira ku mbuga nkoranyambaga ubuzima buberekeyeho, we siko ateye. Uzamubona yashyizeho ifoto ye ari muri siporo amaguru hejuru umutwe ushinze ku butaka, uzamubona ateruye abana ahuriye na bo mu nzira, ari kumwe n’umuryango we bagiye cyangwa bavuye gusenga n’ibindi.

Mutabazi avuga ko kuba umuyobozi “Umuntu akomeza kuba ari umuntu. Niba mfite umubyeyi mba nkimufite, niba mfite abo tuva inda imwe ngomba gusangira na bo ku mbuga nkoranyambaga, ntabwo byahagarara ngo ni uko umuntu yabaye Meya.”

Mutabazi ni meya utangaje mu bijyanye no kwisanzura haba ku baturage be n’ab’ahandi, ntahisha amarangamutima aho biri ngombwa haba imbonankubone no ku mbuga nkoranyambaga.

Si ibyo yize amaze kuba Meya, kuko ni nako yari ameze akiri Umunyamabanga Mukuru w’Ishyirahamwe ry’Umukino wa Basketball mu Rwanda (Ferwaba) na mbere y’aho ubwo yari ayoboye Ikigo cy’Umukino w’Amagare kiri mu Karere ka Musanze ‘Africa Rising Cycling Center-ARCC’.

Yabaye Meya amaze igihe ari umujyanama mu nama njyanama y’Akarere ka Bugesera ari na ko avukamo. Yavuze ko nta kidasanzwe cyamutonze mu kuyobora akarere, atahuraga nacyo mu mirimo yari arimo mbere uretse ubwinshi bw’abo ayobora n’ubw’ibibazo aba agomba gukurikirana.

Ati “Iyo uri muri siporo, umuntu wa mbere wubakiraho ni umukinnyi iyo uje mu nzego z’ibanze, umuturage niwe wubakiraho. Umuturage adahari, inzego zose ntacyo zaba zije kumara. Numva bifite aho bihuriye wenda aho bitaniye ni ubugari bw’igikorwa. Muri siporo uba ufite abakinnyi 500 cyangwa 1000, mu karere ufite abaturage ibihumbi 400, bitanira ku mubare n’ubwinshi bw’ibibazo.”

Nubwo hari ababona kwisanzura cyane no gukoresha kenshi imbuga nkoranyambaga nk’uburyo bwo kwigaragaza neza muri rubanda cyangwa kwiyemera, Mutabazi siko abifata, ahubwo ngo “Hari ibibazo twakira muri izo nzira kandi tukabikemura cyangwa ibitekerezo bitwubaka bakabitubwira.”

Meya Mutabazi mu ifoto y'urwibutso n'abakinnyi ba Bugesera FC

Nubwo afatwa nk’uwisanzura ku mbuga nkoranyambaga, Meya Mutabazi avuga ko ahubwo yigengesera kuko hari icyo ashobora gushyiraho kikagira ingaruka ku bantu benshi, bitandukanye na mbere.

Ati “Ubu ahubwo navuga ngo umuntu arizirika, ubanza gushishoza ibyo ugiye kwandika n’icyo bishobora kukugezaho, n’ingaruka byagira igihe byaba bitameze neza. Niba mbere kuri Twitter narashyiragaho urwenya gusa, uyu munsi ntabwo nkeneye gushyiraho urwenya gusa kuko umuturage wanjye si cyo akeneye ahubwo nkeneye akantu gashobora gutuma mbona ibitekerezo, nti ko mfite abaturage batanu baburara, ni gute natuma bava muri ubwo bukene?”.

Gutungurwa n’umubyeyi we mu biro, guhuza urugwiro n’umwana w’impunzi

Imwe mu mafoto yakwirakwije mu Ugushyingo umwaka ushize mu Rwanda, ni iya Meya Mutabazi n’umubyeyi we, ubwo yamusangaga mu biro saa cyenda z’amanywa zibura iminota icumi, akamubaza ati “Ubu se mwana wa, urarya ryari?"..

Bamwe bagize amarangamutima, abandi baramukwena ko atari akwiriye kubishyira ku mbuga nkoranyambaga.

Meya Mutabazi, yavuze ko mama we yari aje kwaka serivisi mu karere, ibyo yari ajemo birangiye yifuza kujya gusuhuza umuhungu we ari na we uyobora ako karere.

Ati “Umubyeyi wanjye atuye hano muri Nyamata, ni hafi y’akarere. Ikindi mama yari umurezi muri aka karere, ariko yatangiye pansiyo […] Kuhanyura rero ni ibintu bisanzwe kuri we, ni ahantu yari asanzwe aza mu nama kandi kubera ko ari umuturage wa hano muri Nyamata ahakenera serivisi. Yari aje mu yindi serivisi, aravuga ati reka ndebe Meya, reka ndebe umwana wanjye.”

Kumubaza impamvu atararya kandi amasaha ageze kure, Meya Mutabazi abifata nk’ibisanzwe ku buryo kubishyira ku mbuga nkoranyambaga nta kibazo kirimo.

Nubwo yagombaga kubanza gukemura ibibazo by’abaturage, avuga ko biri mu nshingano z’umubyeyi we kumugira inama ko agomba gukora ariko akanafata amafunguro.

Ati “Ngira ngo we aba yumva ko iyo amasaha ageze uhagarika akazi, ukabanza ukajya kurya ukagaruka kandi ni nabyo birakwiriye. Ntabwo ushobora gukora utubaka umubiri. Iyo watangiye kubura isukari mu mubiri utekereza nabi , ukagira umushiha. Ibyo mama yambwiraga ni inshingano z’umubyeyi. Nifuje gusangira n’isi ubwo buzima nagize.”

Muri Nzeri umwaka ushize, nibwo u Rwanda rwakiriye icyiciro cya mbere cy’impunzi zari zaraheze muri Libya, mu nzira zari zirimo zijya i Burayi.

Izo mpunzi zagiye gutuzwa i Gashora muri Bugesera. Zikihagera, hakwirakwijwe amafoto ya Meya Mutabazi ari gukina n’umwana muto w’imwe mu mpunzi.

Mu gusakaza ayo mafoto, Meya ngo yumvaga atewe ishema no kuba igihugu cyatabaye ubuzima bw’izo mpunzi , abana bakongera kubona ibyishimo.

Ati “Numvaga mfite uko meze muri njyewe. Kuba hari abaturage igihugu cyagiriye impuhwe kugira ngo bave mu ntambara, mu masasu, nkagira amahirwe bakaza mu karere mbamo. Umwana ntabwo aba azi ko avuye mu ntambara, we abona yakoze urugendo ntamenye ibyari bimwugarije, ariko ukabona afite urugwiro, aragukunze, ukabona usa nk’uhagaze mu cyimbo cy’umubyeyi we udahari.”

Yavuze ko atisanzuye kuri uwo mwana wenyine icyo gihe, ahubwo ari uko ari yo foto yakoreshejwe.

Meya Mutabazi avuga ko kuba umuyobozi bidakuraho gusabana n’abandi, baba abaturage, inshuti n’umuryango, kandi ko kubisangiza abandi na byo nta kosa abibonamo.

Ati “ Uko byagenda kose n’iyo waba uri umuyobozi w’akarere, uguma uri wa wundi, uguma ufite umuryango wawe, inshuti mwakuranye, izo mwiganye , uguma ufite umuryango washatsemo. Uburyo rero usanzwe uhana na bo amakuru burakomeza.”

Akarere ka Bugesera kari mu turere turi gutera imbere cyane, ndetse igishushanyo mbonera gishya cy’ubutaka kiri gusozwa kigaragaza ko umujyi wa Nyamata uherereye muri ako karere, ufite amahirwe yo kuba umujyi wunganira Kigali mu myaka iri imbere.

Bugesera iri kubakwamo ikibuga mpuzamahanga cy’indege, cyitezweho kuba icya mbere cyakira abantu benshi mu gihugu, ibikorwa remezo nka stade y’umupira w’amaguru n’ibindi.

Ni ibikorwa Meya Mutabazi avuga ko biha amahirwe abaturage batuye ako karere, haba mu kubona akazi no gukora ubucuruzi.

Nk’akarere kazengurutswe n’ibiyaga icyenda kandi gafite ubutaka bwera, Mutabazi avuga ko intego ari ugukoresha ibyo biyaga mu buhinzi buteye imbere bwifashisha kuhira, ku buryo akarere ayoboye kaba ikigega cy’igihugu mu bijyanye n’ubuhinzi.

Reba ikiganiro twagiranye na Meya Mutabazi

Meya Mutabazi avuga ko gusabana n'abantu ku mbuga nkoranyambaga ari bumwe mu buryo bumufasha kubona ibitekerezo ku bibazo bitandukanye
Meya Mutabazi yavuze ko yatunguwe n'umubyeyi we ubwo yamusangaga mu biro
Meya Bugesera hamwe n'umwarimu wamwigishije mu mwaka wa mbere w'amashuri abanza
Muri Nzeri umwaka ushize ubwo Meya Mutabazi yakinaga n'umwana w'impunzi u Rwanda rwakiriye zivuye muri Libya
Meya Mutabazi ubwo yakiraga abaturage bagana Akarere ka Bugesera baje gushaka serivisi zitandukanye
Akunze gushyira kuri Twitter amafoto ari kumwe n'abana bato
Iyi foto yaciye ibintu ku mbuga nkoranyambaga benshi batangarira uyu mugabo
Aha Meya Mutabazi yari kumwe n'umufana w'ikipe ya Bugesera FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .