00:00:00 IGIHE NETWORK KN KINYARWANDA EN ENGLISH FR FRANCAIS

Kutizerwa n’amabanki; imbogamizi mu kongera umusaruro w’ubworozi mu Burasirazuba

Yanditswe na Hakizimana Jean Paul
Kuya 10 Mutarama 2023 saa 03:06
Yasuwe :

Aborozi bo mu Ntara y’Iburasirazuba barasaba Leta kubafasha kubegereza bimwe mu bikorwaremezo bakeneye no kubahuza n’amabanki akemera kubaha inguzanyo kugira ngo bongere umusaruro mu bwinshi no mu bwiza.

Ibi barabisaba nyuma y’aho muri iki gihe Intara y’Iburasirazuba iri mu myiteguro yo kwakira uruganda rw’amata y’ifu rugiye kuzura mu Karere ka Nyagatare. Ni uruganda ruzajya rwakira litiro ibihumbi 500 z’amata buri munsi nyamara muri iki gihe iyi ntara ikaba iri kubona litiro ibihumbi 150 ku munsi.

Ibi byatumye inzego zose zihagurukira rimwe zitangira gushaka icyatuma umukamo wiyongera mu bwinshi no mu bwiza, mu biri gukorwa harimo kuba uruganda Inyange rwarahaye amasezerano aborozi b’intangarugero yo kugemura amata yabo n’ibindi byinshi biri gukorwa muri iki gihe, hagamijwe kongera umukamo.

Bamwe mu borozi baganiriye na IGIHE bagaragaje bimwe mu bibazo bagifite bakeneye ko Leta yabafasha gukemura kugira ngo umukamo wiyongere mu bwinshi no mu bwiza.

Babangamiwe no kutizerwa na Banki

Twahirwa Peter ukuriye koperative y’aborozi muri Rwabiharamba mu Murenge wa Karangazi, yavuze kimwe mu bintu bibangamiye aborozi muri iki gihe ari ukutizerwa n’amabanki yo mu Rwanda, amenshi ngo ntiyizera ko yaha umworozi inguzanyo y’amafaranga menshi ngo abashe kuyishyura.

Ati “ Banki ntabwo zirizera 100% aborozi, ubona mu kubaha inguzanyo z’ubworozi agenda biguruntege kandi aborozi bamaze gutera imbere, kera wasangaga ubworozi bwacu nta cyizere butanga ariko ubu buragitanga, niba umuntu ashyira ubworozi bwe mu bwishingizi, agakingira inka ze zose ni gute batamuha amafaranga?”

Twahirwa yakomeje avuga ko korora kijyambere kuri ubu bikenera amafaranga menshi umworozi atapfa kubonera rimwe ari nayo mpamvu bahitamo kugana banki ngo zibagurize, yavuze ko guhinga ubwatsi bikenera amafaranga, gufata amazi no kugura imashini zigezweho ngo byose bikenera amafaranga.

Ati “Ibigo by’imari rero nibitugirire icyizere kuko turi korora bigendanye n’igihe biduha amafaranga, turasaba na Leta ko yaduhuza n’amabanki akatwizera akizera ubworozi turimo kuko umworozi buri munsi arara yinjije amafaranga menshi aturuka ku mata, ubu aragurisha amata akanagurisha ifumbire byose bimuha amafaranga.”

Gukizwa isazi y’inkurikizi

Mirenge Desire wororera mu Kagari ka Ndama mu Mudugudu w’Akayange, yavuze ko hari byinshi Leta yabakoreye birimo amahugurwa yo kongera umusaruro ku nka zitanga umukamo, gufata neza amazi, guhinga ubwatsi n’ibindi byinshi.

Ati “Ikintu gisigaye kitubangamiye muri iyi minsi ni isazi y’inkurikizi niyo itubangamiye kandi itumereye nabi pe, ikindi ni amazi, aracyari ikibazo aborozi bayabonye byafasha cyane, ikindi Leta twayisaba umuti wica uburondwe kuko aborozi benshi usanga bakoresha imiti itari iy’uburondwe.”

Nkusi Felecien we yagize ati “Dukeneye ko badushakira imfizi z’inzungu ziduha inka nziza ziduha umukamo mwinshi, abenshi urasanga dukoresha imfizi z’imvange ntiziduhe inka nziza, Leta rero nitwegereze intanga hafi.”

Barasaba amazi y’inka hafi y’inzuri

Kavandi Living yasabye Leta kubagezaho amazi hafi ngo kuko bikigorana muri iki gihe, aho nibura ngo hari aborozi barongora inka bagakora ibirometero bitatu cyangwa bine bagiye gushaka amazi y’inka.

Ati “ Iyo umuntu afite amazi mu rwuri inka zikanywa nta cyatuma umukamo utaboneka ndetse n’iterambere rikagerwaho ariko inka kurongorwa zijya gusha amazi, bituma ya mata abura umusaruro ntuboneke, Leta nidushyirire hafi amazi twe gukora ibirometero birenga bitatu tujya gushaka amazi.”

Guverineri w’Intara y’Iburasirazuba, Gasana Emmanuel avuga ko kuba aborozi batizerwa n’ibigo by’imari ari uko baba batakoze umushinga neza ku buryo banki ziwusobanukirwa, yavuze ko bagiye kujya babafasha mu gutegura imishinga neza ku buryo banki zibasha kubizera.

Ku bijyanye n’ibibazo by’amazi atagera mu nzuri n’imbuto z’ubwatsi zitari zaboneka neza, yasabye aborozi gukoresha neza bike bafite bakabibyaza umusaruro.

Ati “Birasaba imyumvire yo hejuru kugira ngo aborozi bamenye ibikenewe babyubahirize naho ubwatsi burahari ahubwo nibabutegure neza, ibijyanye n’amazi nibafate amazi yo kubiraro, ayo ku nzu, aho babika ubwatsi mu gihe batarabona ya mazi menshi bike bafite nibabibyaze umusaruro.”

Kuri ubu Intara y’Iburasirazuba irabarizwamo inzuri zirenga ibihumbi 10 zirimo inka zirenga ibihumbi 500 kuri ubu zikaba zitanga umukamo wa litiro ibihumbi 150 z’amata buri munsi.

Aborozi basabye Leta kubafasha bakabona amazi hafi y’inzuri
Twahirwa Peter yagaragaje ko kuba amabanki atizera cyane aborozi ari imbogamizi ikomeye
Mirenge yasabye Leta kubafasha guhangana n'isazi y’inkurikizi
Guverineri Gasana yasabye aborozi gukoresha neza bike bafite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .