Kurya imbuto y’ibirayi itubuwe rimwe: Umuzi fatizo w’ibura ryayo mu gihugu

Yanditswe na Prudence Kwizera
Kuya 25 Nzeri 2020 saa 07:13
Yasuwe :
0 0

Abazobereye mu butubuzi bw’imbuto y’ibirayi bavuga ko ikibazo cy’ibura ryaryo gishingiye ku kutagira uburyo buhamye bwo gukurikirana uruhererekane rwayo, bityo bagasaba inzego zibishinzwe kuba ari ho zishyira ingufu aho gushakira ikibazo aho kitari.

Muri iyi minsi hirya no hino mu gihugu hari kuvugwa ikibazo cy’ibura ry’imbuto y’ibirayi ndetse na nkeya iboneka ikaba ihenze.

Abahanga mu butubuzi bavuga ko ibura ry’imbuto y’ibirayi riterwa no kuba itubuwe ku rwego rwa mbere ihita igurishwa mu baturage bakayirya kandi yagombye guhabwa abandi batubuzi bayitubura ikaba nyinshi cyane.

Bagaragaza ko imbuto itubuwe ihita ijyanywa ku isoko ikagurishwa ikaribwa mu kwezi kumwe kandi byibura yagombye gukoreshwa mu myaka ibiri.

Muhongerwa Judith ukora ukora umurimo wo gutubura imbuto y’ibirayi mu Kigo Adenya mu Karere ka Nyaruguru asanga hakwiye kujyaho inzego zikurikirana uruhererekane rw’ituburwa ry’imbuto y’ibirayi ikavangurwa n’ibyagenewe kuribwa.

Ati “Minisiteri y’Ubuhinzi n’Ubworozi (Minagri) icyo yadufasha ni ugukora rwa ruhererekane, rwose bakadufasha hakagira inzego runaka niba twebwe dutubuye imbuto fatizo tukaba dufite abandi bantu turi buhereze bagatubura imbuto shingiro, noneho nabo bagahereza abari butubure imbuto y’ibanze. Bityo bikazagera kuri wa muhinzi uzahinga ibyo kurya nibura hari imbuto nyinshi yamaze kugera mu bahinzi.”

Muhongerwa yakomeje avuga ko ikibazo cy’ibura ry’imbuto hari abagishakira aho kitari ugasanga bacyitirira Ikigo cy’Igihugu gishinzwe guteza imbere Ubuhinzi n’Ubworozi, RAB, kandi mu by’ukuri atariho kiri.

Ati “Naho kuri RAB ho nta kibazo kirimo kuko ingemwe turazibona igihe cyose tuzishakiye, ariko aho bipfira twebwe tujya mu gutubura za mbuto fatizo tukajya no gutubura imbuto shingiro bityo noneho ba bakiriya bacu, ya makoperative na ba bahinzi na ba batubuzi bakaza bagura ariko bo bagahita bazijyana ku isoko bakazirya, ntibakomeze ya nzira y’ubutubuzi. Turifuza ko Minagri rwose yadufasha hakabaho uruhererekane (…) noneho abahinzi bakagura imbuto ya nyuma y’ibanze bahita bajya kugurisha ibyo kurya.”

Ntirisesa Ildephonse na we ukorera mu Kigo Adenya avuga ko bakora akazi gakomeye ko gutubura imbuto ku cyiciro cya mbere ariko bababazwa n’uko igurwa igahita iribwa.

Ati “Ikintu kitubabaza ni kimwe, imbogamizi dufite ni uko imbuto tuba twatakajeho imbaraga nyinshi abenshi barayijyana bagahinga bakeza bagahita bashora ku isoko ikagurwa n’abantu bagiye kuyirira kandi tuba tuzi ko ari imbuto yagombye gukoreshwa nk’indi myaka ibiri, ikaba yatuburwa ikagera ku bahinzi benshi kurushaho.”

Yifuza ko hashyirwaho amakoperative yunganira mu gutubura imbuto ku buryo imbuto igera ku baturage yamaze kugwira noneho ikagera ku bahinzi benshi bashoboka.

Umuyobozi Mukuru wa RAB, Dr. Karangwa Patrick, yavuze ko ikibazo cy’ibura ry’imbuto y’ibirayi bakizi kandi bari gukora ibishoboka byose ngo kibonerwe igisubizo kirambye, bashyiraho inzego zikora ubutubuzi ku buryo ibirayi by’imbuto bitandukanywa n’ibiribwa.

Dr Karangwa avuga ko ibyo bizajyana no guha agaciro kanini imbuto no kwigisha abaturage ibyiza by’imbuto yujuje ubuziranenge kugira ngo bumve ko igomba kuba ihenze kurusha ibirayi biribwa.

Ati “Turimo gukorana n’abikorera kugira ngo aho amakusanyirizo ari arusheho kwaguka kandi agere henshi, (…) Imbuto iba yaraciye mu nzira ndende kugira ngo ibe imbuto, iba yaraciye mu nzira ziruhije ugereranyije n’ibisanzwe, iyo udashyizeho igiciro giha agaciro za mvune z’umutubuzi icyo gihe acika intege akava mu butubuzi.”

“Icya kabiri ni uko iyo ibiciro by’imbuto binganye n’ibyo kurya usanga imbuto ziburira mu byo kurya, abantu bakazigurisha zari zihari ariko zikajya kuribwa aho guhingwa.”

Dr Karangwa avuga ko bari gukorana n’abikorera kugira ngo binjire mu butubuzi bw’imbuto y’ibirayi ku bwinshi noneho Leta ibashyirireho ibikorwa remezo by’ibanze n’uburyo babikora.

Avuga ko hari icyizere ko buzashoboka kuko no mu bihugu byateye imbere ari bwo buryo bakoresheje.

Umunyamabanga wa Leta muri Minagri, Dr Ngabitsinze Jean Chrysostome, aherutse gusura Akarere ka Nyaruguru ku wa 2 Nzeri 2020 agera mu Kigo Adenya, abahakorera ubutubuzi bw’imbuto y’ibirayi bamugezaho ibitekerezo ku cyaba igisubizo ku ibura ryayo.

Dr Ngabitsinze yashimye ibitekerezo byabo abizeza ko bigiye kwigwaho neza bigashyirwa mu bikorwa.

Imibare yerekana ko kuri hegitari imwe hashobora guterwa ibilo 2500 z’ibirayi, mu gihe nko ku bigori haterwa ibilo 25; bityo bikumvikanisha gutubura imbuto y’ibirayi bigomba gushyirwamo imbaraga nyinshi.

Bagaragaje ko ikibazo gikomeye gihari ari uko imbuto y'ibirayi itubuwe ku rwego rwa mbere ihita igurishwa mu baturage bakayirya kandi yagombye guhabwa abandi batubuzi bayitubura ikaba nyinshi cyane
Imibare yerekana ko kuri hegitari imwe hashobora guterwa ibilo 2500 z’ibirayi
Mu Karere ka Nyaruguru ni hamwe mu hari imirima ikorerwamo ubutubuzi bw'imbuto y'ibirayi
Mu Kigo Adenya mu Karere ka Nyaruguru hakorerwa ubutubuzi bw'ibirayi
Umunyamabanga wa Leta muri Minagri, Dr Ngabitsinze Jean Chrysostome, aherutse gusura Akarere ka Nyaruguru agera mu Kigo Adenya ahatuburirwa imbuto y'ibirayi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .