00:00:00 IGIHE NETWORK KN KINYARWANDA EN ENGLISH FR FRANCAIS

Kuki u Rwanda ruhora rushinjwa kubangamira abaryamana bahuje ibitsina?

Yanditswe na Ndahayo Emmanuel
Kuya 19 July 2022 saa 02:09
Yasuwe :

U Rwanda ni kimwe mu bihugu bike cyane bya Afurika bitanga uburenganzira bwisanzuye ku banyamuryango ba LGBTQ (bazwi nk’abaryamana bahuje ibitsina). Icyakora nanone u Rwanda ni kimwe mu bihugu bikunze gushinjwa ibirego bitandukanye, birimo no kuba rubangamira uburenganzira bw’abanyamuryango ba LGBTQ batuye mu gihugu.

Ntabwo ari ibanga ko uburenganzira bw’iki cyiciro cy’abantu bukibangamirwa mu bihugu byinshi bya Afurika, kuko nko mu bigize Umuryango wa Afurika y’Iburasirazuba, u Rwanda ari rwo rwonyine rudafite amategeko ahana abaryamana bahuje ibitsina, ibyumvikanisha uburemere bw’ubuzima banyuramo mu bihugu byinshi by’uyu mugabane.

Iyi sura iri henshi muri Afurika, niyo isigwa n’u Rwanda, nka wa mukobwa uba umwe agatukisha bose. Mu mwaka ushize, Raporo y’Umuryango urengera Uburenganzira bwa Muntu (HRW) yashinje u Rwanda kutubahiriza uburenganzira bw’abanyamuryango ba LGBTQ, ukavuga ko bahohoterwa ndetse bagafatwa nabi, bityo ko u Rwanda rudakwiriye kubarwa nk’ahantu hizewe abanyamuryango ba LGBTQ bakwiriye kubarizwa.

Ku rundi ruhande, nyuma y’uko u Rwanda n’u Bwongereza bisinye amasezerano yo kohereza abimukira batemewe n’amategeko, ba bayobozi bakomeye b’imiryango iharanira uburenganzira bw’abanyamuryango ba LGBTQ bongeye kuzamura amajwi, bavuga ko mu gihe abimukira bari mu muryango wa LGBTQ bakoherezwa mu Rwanda, bishobora kubagiraho ingaruka zikomeye “kuko atari igihugu gitekanye ku bagize LGBTQ.”

Mu minsi ishize, ikinyamakuru The Mirror kiri mu bikomeye mu Bwongereza cyanditse ko gifite amakuru y’umugabo wavuze ko “Leta y’u Rwanda yifuza guhatira Abanyamuryango ba LGBTQ guhaguruka bakavuga ko tumeze neza – barabizi [Leta y’u Rwanda] ko abimukira bagize umuryango wa LGBTQ bari kwanga kuza [mu Rwanda].”

Uyu mugabo yakomeje avuga ko hari umuntu wigeze kumwegera akamusaba “kwandika inyandiko ivuga ku bijyanye n’abanyamuryango ba LGBTQ [mu Rwanda],” abwirwa ko iyo nyandiko izohererezwa abimukira mu Bwongereza.

Uyu mugabo kandi yavuze ko yahakanye icyifuzo yagejejweho cyo kuvuga ku burenganzira bwabo mu Rwanda, ndetse ati ‘Ndabizi neza bazabeshya, bakoreshe abantu [batari abanyamuryango ba LGBTQ] kugira ngo babeshye [ko uburenganzira bwabo bwubahirizwa mu Rwanda]. Bari kubikora mu buryo bw’ibanga.”

Bamwe mu basanzwe baharanira uburenganzira bw’abanyamuryango ba LGBTQ, buririye kuri iyi ngingo batangira kuvuga ko u Rwanda rutagomba kwakira aba bimukira kuko n’ubundi rudasanganywe ubushobozi bwo kurinda abagize LGBTQ.

Nka Daniel Sohege ukuriye Umuryango Stand For All, yavuze ko afite ubwoba ko abimukira b’abanyamuryango ba LGBTQ bazazimirira mu Rwanda, ati “Abanyamuryango ba LGBTQ bagiye bakusanywa na Guverinoma dushingiye ku makuru yizewe [dufite] kandi hakoreshejwe amategeko mu guheza abanyamuryango ba LGBTQ.”

Uburyo u Rwanda rurengana

U Rwanda nta mategeko rugira abuza uburenganzira ubwo ari bwo bwose abanyamuryango ba LGBTQ, ahubwo ifite uburyo ikoresha mu kwita ku bibazo by’umwihariko bagira.

Nk’urugero, ubusanzwe aba bantu bakenera ibintu bitandukanye mu gihe bari mu mibonano mpuzabitsina, amakuru yizewe akemeza ko ibikenewe bafashwa kubibona.

Mu kiganiro aherutse kugirana na IGIHE, Umuyobozi w’Ishami ry’Uburenganzira bwa Muntu mu Muryango Uharanira Guteza Imbere Ubuzima (HDI), Christopher Sengoga, yavuze ko hari byinshi Leta ikora mu kwita ku burenganzira bw’abanyamuryango ba LGBTQ.

Yavuze ko hari abaganga bakorera mu bigo nderabuzima birenga 25, bahuguwe ku bijyanye no kwita ku banyamuryango ba LGBTQ. Ibyo bigo nderabuzima ntabwo biri i Kigali gusa, kuko hari n’ibiri i Huye na Nyaruguru.

Ku rundi ruhande, Ikigo cy’Igihugu Gishinzwe Ubuzima, RBC, gisanzwe gitanga serivisi zimwe na zimwe ku baryamana bahuje ibitsina, zirimo imiti ibafasha mu bihe by’imibonano mpuzabitsina n’ubundi buvuzi butandukanye, ndetse kijya kibakoraho ubushakashatsi butandukanye, dore ko iki cyiciro kiri mu byibasirwa n’indwara zandurira mu mibonano mpuzabitsina.

Mu kiganiro na IGIHE, umwe mu banyamuryango ba LGBTQ mu Rwanda, yavuze ko ababeshya ko uburenganzira bwabo butubahirizwa babiterwa no kutagira amakuru.

Ati “Biterwa no kutagira amakuru, ntabwo baba bazi ibibera inaha. Bose bazi ko muri Afurika yose nta burenganzira tugira, ariko ibihugu bimwe na bimwe birabutanga. Ntiwagereranya u Rwanda na za Zimbabwe cyangwa Sudani, ho usanga na Leta zibarwanya ku mugaragaro, ntabwo ari ko bimeze mu Rwanda.”

Yakomeje avuga ko ikibazo bagira ari ikijyanye n’abantu bamwe na bamwe babatoteza, ariko atari igikorwa wakwitirira Leta.

Ati “Ikibazo tukigirana n’abaturanyi, imiryango yacu n’abandi bantu batarasobanukirwa, ntabwo tukigirana na Leta. Ejo bundi twizihije ‘Pride Month’ (Igihe cyahariwe kwishimira uburenganzira bw’abanyamuryango ba LGBTQ). Henshi muri Afurika ntibashobora kwizihiza uwo munsi, kandi twe byabaye ku mugaragaro dutumira n’abantu rwose ari ibintu bidahishiriwe. Ntabwo igikorwa nka kiriya cyabera ahantu baturwanya, ni icyerekana ko twisanzuye.”

Yakomeje avuga ko “Maze imyaka myinshi narerekanye uko niyumva. Nahuye n’ibibazo byinshi ariko ntabwo nigeze ntotezwa na Leta, ntabwo nigeze mbuzwa kwinjira muri bus, amasoko, amavuriro n’ibindi bikorwaremezo rusange byose mbijyamo, niyo mpamvu mvuga ko twisanzuye. Uwaguhutaza ni ugikeneye igihe cyo gusobanukirwa, ariko ntabwo ari uwatumwe na Leta.”

Abanyamuryango ba LGBTQ mu Rwanda bajya bategura ibikorwa bigamije kubahuza kugira ngo bishimire abo bari bo

U Rwanda rwahinduwe igicuruzwa

Uwo munyamuryango wa LGBTQ yavuze ko nubwo atari impuguke mu bya politiki, abavuga ko u Rwanda rutubahiriza uburenganzira bw’abanyamuryango ba LGBTQ babiterwa no gushaka izindi nyungu.

Ati “Ntabwo nabihamya neza ariko ntekereza ko icyo baba bagamije ari inyungu zabo bwite. Nka biriya byo mu Bwongereza, hari abantu bakwishimira ko abimukira bataza mu Rwanda, abo bari kudukoresha [nk’abanyamuryango ba LGBTQ] kugira ngo basebye igihugu, ariko ibyo bavuga nta hantu bihuriye n’ukuri ahubwo ni ugukoresha u Rwanda mu nyungu zabo, barugize nk’igicuruzwa bakoresha mu nyungu zabo."

Yasobanuye ko “hari abantu bacu [abanyamuryango ba LGBTQ] bakora amakosa bagahanwa. Niba umuntu wacu yibye ihene y’abandi agafungwa, ubwo wavuga ko azize icyo ari cyo cyangwa azize icyaha runaka. Kuba turi Aba-LGBTQ nta mwihariko biduha imbere y’amategeko, niyo mpamvu dukwiriye kwitwararika nk’abandi Banyarwanda.”

Yashimangiye ko “U Rwanda si paradizo, dufite ibibazo byinshi. Nubwo mvuga ibi haracyari akarengane kenshi mu miryango, ubukangurambaga ni buke rwose. Ni kimwe mu bintu mbona Leta ikwiriye gukoraho, buri Munyarwanda agasobanukirwa neza ko akwiriye kutwubaha kuko nta kintu dutandukaniyeho n’abandi, natwe turi abantu mu buryo bwuzuye.”

Mu bindi asaba byakorwa harimo gushyiraho uburyo bwo kuvugira abanyamuryango ba LGBTQ kuko “Benshi banga gutanga ibirego kuko bakeka ko nta kintu byahindura. Bumva ko uko bafatwa ari ibyo nyine, ariko hagiyeho inzego z’ubuvugizi, byafasha bagenzi bacu bakiri bato kwitinyuka vuba.”

Ku ruhande rwa Leta, Umuvugizi Wungirije wa Guverinoma y’u Rwanda, Alain Mukuralinda, aherutse kuvuga ko imbere y’amategeko y’igihugu abantu bose bareshya kandi nta vangura ribaho.

Ati “Hano mu Rwanda imbere y’amategeko abantu bose barareshya nta kuvangura uruhu, idini cyangwa se ababana bahuje ibitsina ariko ntekereza ko abafite icyo kibazo bashobora no kureba ijambo Perezida wa Repubulika yigeze kuvugira muri Rwanda Day. Kandi nta tegeko dufite rivangura, nta mpungenge rero abantu babana bahuje ibitsina bari bakwiye kugira.”

Mu bitandukanye, u Rwanda rwakunze kwerekana ubushake mu gushyigikira abanyamuryango ba LGBTQ. Mu 2011, u Rwanda rwabaye igihugu rukumbi kiri muri Afurika yo Hagati n’Iburasirazuba, cyasinye amasezerano mpuzamahanga y’Umuryango w’Abibumbye yamagana ihohoterwa rikorerwa abanyamuryango ba LGBTQ.

Mu 2017, u Rwanda rwasinye umwanzuro w’Umuryango w’Abibumbye, wamagana ibihugu bikoresha igihano cy’urupfu ku bantu bakoze imibonano mpuzabitsina babihuje kandi babyumvikanyeho. Ni amasezerano na Leta Zunze Ubumwe za Amerika zitashyizeho umukono.

Raporo Ngarukamwaka ya ILGA yo mu 2020, igaragaza uburyo amategeko y’ibihugu bitandukanye ashyirwa mu bikorwa ku bijyanye n’abaryamana bahuje ibitsina, igaragaza ko u Rwanda rutagira amategeko ahana cyangwa abangamira uburenganzira bw’abanyamuryango ba LGBTQ.

Mu Rwanda hajya haba ibirori bikoranya imbaga y'abanyamuryango ba LGBTQ, bigakorerwa ku karubanda nta rwikekwe
Abanyamuryango ba LGBTQ mu Rwanda barahura bagasabana, ikimenyetso cy'uko nta n'umwe uhutazwa
Ambasaderi w'u Bwongereza mu Rwanda, Omar Daair, yakiriye abanyamuryango ba LGBTQ mu Rwanda mu gikorwa kizwi nka IDAHOBIT kigamije guteza imbere ubukangurambaga bw'uwo muryango
Byari ibyishimo bidasanzwe ku banyamuryango ba LGBTQ ubwo bizihizaga umunsi wa IDAHOBIT
Abanyamuryango ba LGBTQ mu Rwanda bizihije igikorwa cya IDAHOBIT basangira umutsima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .