Kuki Google Translator isemura nabi Ikinyarwanda?

Yanditswe na Ndahayo Emmanuel
Kuya 16 Mutarama 2021 saa 12:47
Yasuwe :
0 0

Niba warigeze ukoresha Google Translator ushaka kuvana imvugo mu Kinyarwanda uyishyira mu Cyongereza, ugomba kuba warigeze gutungurwa n’uburyo hari amagambo n’imvugo zimwe na zimwe ziza zitandukanye n’ibyakagombye gukoreshwa.

Nk’urugero, iyo ushaka guhindura imvugo igira iti “Nagushatse, ndakubura” ukayishyira mu Cyongereza, yagahindutse iti “I looked for you, I couldn’t find you”.

Gusa ibi si ko bigenda kuko muri Google Translator, iyi mvugo ihinduka iti “I married you, I missed you”, bisobanuye ngo “Naragushatse (gushyingiranwa), naragukumbuye”.

Nyuma y’umwaka Google yongereye Ikinyarwanda mu ndimi eshanu zishobora gukoreshwa na Google Translator, hakomeje kugaragara ingero nyinshi z’uburyo Ikinyarwanda kitarahuzwa neza n’izindi ndimi muri Google Translator, ku buryo mu gihe umuntu yayifashisha agamije gusemura Ikinyarwanda mu zindi ndimi, bishobora kumuha amakuru atari yo.

Umuhanga mu by’indimi, akaba n’umusemuzi w’Ikinyarwanda, Jean Bosco Iradukunda, yabwiye The East African ko impamvu ituma Google Translator idasemura Ikinyarwanda neza uko bikwiye, ari uko Ikinyarwanda gikoreshwa gacye cyane kuri murandasi, bityo bigatuma n’amagambo yacyo ari macye cyane ugereranyije n’izindi ndimi.

Yagize ati “Ikinyarwanda ntigikoreshwa cyane kuri murandasi, kandi ibyo bigisubiza inyuma. Tugomba gushyira umuco wacu kuri murandasi, tugasohora ibitabo byanditse mu Kinyarwanda, imivugo, inkuru n’inyandiko [byose bikajya mu Kinyarwanda]”.

Iyi mpuguke yaboneyeho gusobanura ko uko Abanyarwanda bazarushaho gukoresha Ikinyarwanda kuri murandasi ari benshi, ikoranabuhanga rya Google (Google algorithms) rizarushaho kumenya amagambo y’Ikinyarwanda maze mu gihe umuntu ari gusemura akoresheje Google Translator, akabasha kubona amagambo ahuye n’ibyo ashaka.

Ubusemuzi Google Translator ikorera Ikinyarwanda ntiburanoga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .