Kuba abakoze Jenoside batanga ubuhamya mu kwibuka ntibivugwaho rumwe

Yanditswe na IGIHE
Kuya 7 Mutarama 2019 saa 12:12
Yasuwe :
0 0

Mu bikorwa byo kwibuka jenoside yakorewe Abatutsi, usanga hirya no hino mu gihugu haba hateganyijwe umwanya w’ubuhamya bw’uko Jenoside yateguwe, uko abatutsi bagiye batotezwa n’uko yakozwe, bugatangwa n’abayirokotse.

Ubu buhamya kandi buba bunagamije kumenya aho imibiri y’abishwe muri Jenoside ariko itaraboneka iherereye ngo ishyingurwe mu cyubahiro, no gushaka icyatuma abanyarwanda bongera kugirana ubumwe.

Mu cyumweru gishize bamwe mu bayobozi barimo Perezida wa Komisiyo y’Igihugu y’ubumwe n’ubwiyunge, Bishop John Rucyahana, bagaragaje ko abakoze Jenoside bakwiye kujya batanga ubuhamya mu gihe cyo kwibuka, ntibikomeze guharirwa abayirokotse gusa.

Mu gusobanura iki gitekerezo, avuga ko bitumvikana uburyo uwahigwaga muri Jenoside ari na we kandi uza kuvuga uko Jenoside yakozwe.

Ati “Nimushake abatangabuhamya babonaga uko Jenoside yakorwaga, abacitse ku icumu ntabwo aribo bari bazi ibyakorwaga cyane kuko bari bihishe, ababibonye mubivuge mubishyire ahagarara, dukure ikibi hagati muri twe.”

Ni igitekerezo gikomeje kutavugwaho rumwe n’ab’ingeri zinyuranye ariko bose bagahuriza ko gipfobya ubuhamya bwatanzwe n’abarokotse jenoside mu myaka hafi 25 ishize, bagasaba ko imvugo y’uko ‘abarokotse bari bihishe batabonaga uko jenoside yakorwaga’ isobanurwa byimbitse.

Umunyamabanga wa Leta muri Minisiteri y’Ububanyi n’Amahanga, Amb. Olivier Nduhungirehe, yanditse kuri Facebook ko ku bwe hagomba gutandukanywa ‘Kwibuka na Ndi Umunyarwanda’. Yavuze ko kwemerera abagize uruhare muri jenoside gutanga ubuhamya mu kwibuka ari ‘ugutoneka abayirokotse’.

Yanditse ko ‘Umuhango wo Kwibuka ugamije kwibuka no guha icyubahiro inzirakarengane zazize Jenoside yakorewe Abatutsi. Ubundi uwo muhango utera ihahamuka ku buryo buhagije, bivuze ko kwemerera abagize uruhare muri Jenoside gutangamo ubuhamya byaba ari ugutoneka abarokotse kurushaho’.

Ndi Umunyarwanda yo ni gahunda rusange y’ubumwe n’ubwiyunge, igamije gushishikariza abanyarwanda kwiyumvamo ubunyarwanda no kurwanya icyabatanya. Iyo gahunda rero ifunguriwe buri munyarwanda, harimo n’abakoze Jenoside.

Nduhungirehe yasobanuye ko ibi bivuze ko abagomba gutanga ubuhamya mu muhango wo Kwibuka batarimo abagize uruhare muri jenoside ahubwo ari; abarokotse Jenoside (abatutsi n’abandi bahigwaga); ababarokoye (abasirikari ba FPR, abarinzi b’igihango n’abandi bahishe bakanakiza abahigwaga muri jenoside) ndetse n’ababonye uko Jenoside yateguwe ikanashyirwa mu bikorwa (ariko batabigizemo uruhare).

Avuga ko ubundi buhamya, burimo ubw’abakoze Jenoside bireze bakemera icyaha, ndetse n’ibyo buri munyarwanda azi, byo bigomba gutangwa mu rwego rwa Ndi Umunyarwanda cyangwa se mu bindi biganiro bigamije ubumwe n’ubwiyunge.

Uwiyise Karoli mu bitekerezo byatanzwe ku nkuru igira iti ‘Bishop Rucyahana yibajije impamvu gutanga ubuhamya mu cyunamo bigiharirwa abarokotse Jenoside’ yagarutse ku mvugo ya Bishop Rucyahana, avuga ko ‘ntabwo abarokotse bari bihishe batabonye uko jenoside yakozwe!’

Ati “Turabizi twarabibonye twarabyumvise batunyuraho ku nzira turayizi itegurwa, igeragezwa, yaradusogose ntitwapfa ngo tunogonoke. Iyo uwarokotse atanga ubuhamya avuga urugendo rutoroshye yanyuzemo ndetse n’uburyo isi yamwituyeho akabura uyimwubururaho”.

Akomeza agira ati “Bishop rero nizere ko mwamuvugiye ibyo atavuze kuko bibaye byo kwaba ari uguhinyuza ubuhamya twatanze kuva turokotse kugeza no muri gacaca”.

Uwitwa Leo Kabalisa yanditse ko ‘Kwibuka si igihe cyo kwiga ku mateka ya jenoside. Ni igihe cyo kwibuka abacu biciwe uko bavutse kandi ni igihe cyo gusana imitima y’abo basize’.

Yakomeje anenga igitekerezo cyo’uko abagize uruhare muri jenoside batanga ubuhamya mu kwibuka agira ati “Bazana abatangabuhamya bishe kugira ngo bahoze abo biciye cyangwa kugira ngo babannyege”.

Annie Mongi yagize ati “Jyewe sinumva ukuntu ashobora kuvuga gutyo. None se abashoboye gutanga ubuhamya barahimba? Jenoside se iyo batavuga ibyo babonye, wowe Rucyahana ntawe wabonye washinja ngo aze avuge uko byagenze? Reka gutoneka abantu, ibyabaye twese turabizi tutarindiriye ubuhamya bwabo bicanyi”.

“Imyaka hafi 25 nibwo wibutse ko abicanyi bagomba gutanga ubuhamya? Ahubwo uzabasengere maze berekane aho bashyize abacu tubashyingure mu cyubahiro muzaba muduhaye ubuhamya bukomeye”.

Uwitwa Vestine Umutoni na we yagize ati “Ndumiwe aho nari nihishe interahamwe zavuze ko bagomba kwica abatutsi bose ngo ntihagire uzarokoka wo kubara inkuru none umva baratubuza no gutanga ubuhamya ni ukumirwa ahubwo baba bashaka ko tuba ibiragi ntituvuge maze bizibagirane, ndumiwe gusa baracyadukora mu jisho ariko ntituzongera kubyemera na gato twarababaye bihagije nibatureke dutange ubuhamya ku babishoboye ahubwo tuzashyiraho site yo gutanga ubuhamya”.

Gatari Victor na we yifuje ko ibyatangajwe na Bishop Rucyahana byasobanuka neza kuko bitumvikana uko uwakorewe yaba adafite ubuhamya bwose.

Ati “Ni ugushaka uyu mugabo Rucyahana agatanga ibisobanuro birenze ibyo yatanze banza turi kumwumva nabi bitaba ibyo uko turi kumwumva byaba ari ko kuri agaca bugufi agasaba imbabazi hari ahantu hadakorwaho hari n’ibidakinishwa ! Abanze gutanga ubuhamya muri gacaca ku byabaye babona ubu nibwo bakenewe ngo batuvugire amateka? Nagende buhoro!”.

Iyi ngingo itavugwaho rumwe ije mu gihe habura amezi atatu ngo Abanyarwanda bibuke ku nshuro ya 25, Jenoside yakorewe Abatutsi.

Nduhungirehe avuga ko kwemerera abagize uruhare muri Jenoside gutangamo ubuhamya byaba ari ugutoneka abarokotse kurushaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza