00:00:00 IGIHE NETWORK KN KINYARWANDA EN ENGLISH FR FRANCAIS

Komiseri w’amagereza muri Zambia yatangiye uruzinduko rw’iminsi itanu mu Rwanda

Yanditswe na Ntabareshya Jean de Dieu
Kuya 28 Ugushyingo 2022 saa 04:35
Yasuwe :

Komiseri Mukuru w’Urwego rushinzwe Igorora mu Rwanda (RCS), CGP Juvenal Marizamunda, yakiriye mugenzi we wa Zambia, CG Chilikutu Frederick, uri mu ruzinduko rw’iminsi itanu mu Rwanda.

RCS n’urwego rushinzwe imfungwa n’abagororwa muri Zambia, bifitanye amasezerano y’ubufatanye agamije kongera ubushobozi bw’abagize izi nzego n’imikoranire muri rusange.

Kuri uyu wa Mbere Tariki ya 28 Ugushyingo 2022 nibwo Komiseri Mukuru wa RCS, CGP Juvenal Marizamunda, yakiriye itsinda ry’abayobora ZCS (Zambia Correctional Services ) barangajwe imbere na Komiseri Mukuru w’uru rwego.

CG Chilukutu yabwiye itangazamakuru ko muri uru rugendo rw’icyumweru bagiye kugirira mu Rwanda, bazigiramo byinshi bigendanye n’imikorere yo kwita ku muntu ufunzwe.

Yagaragaje ko kimwe mu bintu bikomeye bashaka kwigira ku Rwanda ari ikoreshwa ry’ibicanwa bitandiza ibidukikije bikoreshwa mu magororero, by’umwihariko Biogas.

Ati "Turi kungurana ibitekerezo, turareba aho buri umwe ari gukora neza kugira ngo twigiraneho. Amateka y’inzego zacu yatangiye ari uguhana no gufunga abanyabyaha gusa, ariko ubu ni inshingano zo kugorora tugezemo."

Yongeyeho ati "Twiteze kwiga byinshi kandi kimwe mu bintu twifuza kwiga ni uburyo bw’ikoreshwa rya Biogas mu magororero. Nibyo uyu munsi u Rwanda rwarabigezeho, ruri gukoresha ubundi buryo butangiza ibidukikije, dushaka kurwigiraho uburyo rwabigezeho. Nubwo iwacu turi kurwanya ikoreshwa ry’inkwi, mu bice byinshi by’ibyaro baracyakoresha inkwi kandi zangiza ibidukikije."

CGP Marizamunda yavuze ko kuri hari ibintu bitandukanye inzego zombi zishobora kunguranaho ibitekerezo, cyane ko Urwego rw’u Rwanda rushinzwe igorora hari intambwe rwateye mu kubungabunga ibidukikije hakoreshwa Biogas mu guteka.

Yakomeje agira ati "Ntekereza ko ikoreshwa rya Biogas mu magororero ari hamwe mu hantu rihagaze neza, ubu tuyikoresha ku kigero cya 55%, akandi 45% ni briquettes. Ni ikintu cyadufashije kubungabunga ibidukkije kubera ko twakoreshaga inkwi nyinshi cyane kuko twatemaga nibura hegitare 365 z’amashyamba mbere yo gutangira kubikoresha."

Marizamunda kandi yagaragaje ko u Rwanda rwakigirwaho byinshi birimo n’ikoreshwa ry’ikoranabuhanga ryifashishwa mu kugenzura no gucunga amadosiye y’abantu bafunzwe (Integrated Electronic Case Management Systems) n’ibindi.

Ku ruhande rw’u Rwanda, yavuze ko hari byinshi bashobora kwigira kuri Zambia birimo iterambere ry’ibikorwa nko mu rwego rw’ubuhinzi n’inganda, aho ZCS yateye imbere kuri byo.

Biteganyijwe ko muri uru rugendo, aba bayobozi bazasura ibikorwa bitandukanye mu rwego rwo kurebera hamwe imikorere ya RCS nk’aho bazasura Igororero rya Nyarugenge n’irya Rubavu, Urwibutso rwa Jenoside rwa Kigali, Ingoro y’Amateka yo guhagarika Jenoside, ndetse bazagira n’umwanya wo gusura Pariki y’Igihugu y’Ibirunga.

Urwego rw’Igihugu rushinzwe Igorora mu Rwanda, RCS n’Urwego rw’Imfungwa n’Abagororwa muri Zambia, ZCS, zifitanye amasezerano y’ubufatanye mu guhanahana ubumenyi, amahugurwa n’ibindi.

Mu ishyirwa mu bikorwa ry’ayo masezerano, muri Gashyantare 2022 abacungagereza batanu bo mu Rwanda bavuye muri Zambia mu mahugurwa ajyanye n’ubumenyi mu kazi kabo ka buri munsi, imyitozo igenerwa Abacungagereza b’umwuga ndetse no gukora ubushakashatsi, bahabwa ipeti rya AIP [Assistant Inspector of Prison].

Uretse uruzinduko ry’uyu muyobozi ariko, mu 2021 Dr Chisela Chileshe wari Komiseri Mukuru w’Urwego Rushinzwe Imfungwa n’Abagororwa muri Zambia yagiriye uruzinduko mu Rwanda, ashima kuba u Rwanda rwarashyizeho uburyo bwo kwigisha imyuga n’ubumenyingiro mu magororero.

CG Marizamunda yakira mugenzi we wa Zambia
Abayobozi bakuru muri RCS bari biteguye kwakira abashyitsi
Itsinda ryo muri Zambia ryakiranywe urugwiro
CSP James Mugisha aganira na SAC Kapalu Luneta ku mikorere y'inzego zombi
Komiseri Mukuru wungirije wa RCS, DCGP, Rose Muhisoni, yari mu bayobozi bakiriye abashyitsi
SP Sydney Mwaal ari mu bagize itsinda rihagarariye Zambia
Umuyobozi w'Ishuri ry'amahugurwa rya RCS, CP John Bosco Kabanda, yari yitabiriye ibi biganiro
Bamwe mu bagize itsinda rya ZCS riri mu Rwanda
Komiseri Mukuru wa ZCS, CG Chilukutu hamwe na mugenzi we w'u Rwanda, CG Juvenal Marizamunda
Aba bayobozi bafashe ifoto y'urwibutso

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .