Kirehe: Ntibavuga rumwe na Gitifu w’Umurenge wababujije gushinga koperative

Yanditswe na Hakizimana Jean Paul
Kuya 8 Ugushyingo 2020 saa 08:57
Yasuwe :
0 0

Abaturage 202 bo mu Murenge wa Mushikiri ntibavuga rumwe n’Umunyamabanga Nshingwabikorwa wawo, nyuma y’uko bifuje gushinga koperative ibyaza umusaruro inikomoka ku nsina, ubuyobozi bukabima ibyangombwa.

Abo baturage bavuga ko Umurenge wanga kubaha ibyangombwa bitewe n’itsinda ry’abacuruzi bafite amafaranga menshi, bagura umusaruro w’ibitoki ku mafaranga make, bagashinja Gitifu gukorana n’iryo tsinda batsikamira umuturage.

Perezida w’iyi koperative itaremererwa yitwa Mushikiri Babanas Development Cooperative, Munyampeta Fabien, yavuze ko kuva muri Gashyantare bishyize hamwe nk’abaturage, kugira ngo bashinge koperative ibyaza umusaruro ibikomoka ku nsina birimo gukora umutobe, kuboha ibiseke bikoze mu birere ndetse no gucuruza ibitoki, mu rwego rwo kuzamura amafaranga umuhinzi agurirwaho.

Igitekerezo cyabo ngo bakigejeje ku Murenge, ubuyobozi bubanza kubabwira ko nta yindi koperative ikenewe muri uyu Murenge kuko hari ihasanzwe y’abahinzi b’urutoki, nyuma ngo bubasuye bubasaba gukora ibindi byose, uretse gucuruza ibitoki.

Ati “Gitifu afite itsinda ry’abacuruzi nka bane cyangwa batanu bakomeye inaha, nibo bagura ibitoki bonyine, ikilo usanga umuturage bamuhereye nka 50 Frw cyangwa 80 Frw bo bakakigurisha nka 200 Frw. Rero twe tubona impamvu atwima icyangombwa ari ukugira ngo tutaza kuvangira ba bacuruzi bakorana na we, kuko bagura umusaruro ku mafaranga make cyane, ku buryo umuturage atatera imbere.”

Yakomeje avuga ko nta muntu n’umwe ushobora kugura ibitoki muri uyu Murenge atabanje kubonana na Gitifu, kuko ari we utanga ubwo burenganzira.

Umuturage witwa Nsengiyumva Bonaventure we yavuze ko bababazwa no kuba barishyize hamwe, bakananizwa n’ubuyobozi aho kubafasha ngo bubereke ibyo babura, ngo babafashe nk’ayandi makoperative.

Rwamakobwa Jeanne d’Arc we yagize ati “Muri iyi koperative yacu njye nshinzwe gukora imisambi n’ibiseke bikoze mu birere, hari ubwo banzanira umukiliya ushaka ngo dusinyane amasezerano, bikarangira tudakoranye bitewe nuko koperative dukoreramo itagira ibyangombwa. Nasaba ubuyobozi kudufasha.”

Umunyamabanga Nshingwabikorwa w’Umurenge wa Mushikiri, Hakizamungu Adelite, we yabwiye IGIHE ko ibyo abo baturage bamuvugaho ari ukumuharabika.

Yavuze ko bifuza gushinga koperative, ariko amaze kubasura inshuro zirindwi abereka ibitagenda neza, akabasaba kubikosora ntibabyemere.

Ati “Ubusanzwe inaha dufite koperative y’abahinzi b’urutoki ari nayo hafi ya bariya bose baturutsemo, basa n’abayigumuyeho bashaka gushinga iyabo. Baraduhamagaye tujya kubasura, batubwira ko bafite abanyamuryango 202, wababaza abamaze gutanga umugane shingiro ungana n’ibihumbi icumi ugasanga ni 65, wabaza abanyamuryango izina rya koperative n’ibyo bazakora ugasanga ntibarabimenya, tubagira inama yo kubanza kwitegura neza, bakaganira ku byo koperative yabo izakora.”

Yakomeje avuga ko ubuyobozi bwanababajije imbanzirizamushinga yabo bakanga kuyitanga.

Ati “Bo icyo bishyizemo ni ugukora koperative nta kindi. Tubereka ibyo bakosora ngo tubasinyire ntibabikore, kandi nk’ubuyobozi tubereyeho kureberera inyungu z’umuturage, sinakwemera gusinyira abantu bashaka gushinga koperative mu nyungu zabo bwite baciye mu baturage bataranamenya intego za koperative.”

Umuyobozi w’Akarere ka Kirehe, Muzungu Gerard yabwiye IGIHE ko ikibazo cy’iyi koperative bakimenye, ndetse mu minsi ya vuba bazegera abaturage bakabafasha.

Yagize ati “Icyo kibazo ndakizi turi mu nzira zo kugira ngo turebe uko tubafasha, harimo ibyo tubagiramo inama ntibabikore, icya mbere urumva hari ibyo bahuje na koperative ihasanzwe kandi ikora neza, tukabona ko byayisenya. Turashaka kubereka umurongo w’ibyo bakora bishya akaba ari byo tubahera ibyangombwa, mu cyumweru gitaha turashaka gukorana nabo inama tukabafasha.”

Muzungu yahakanye iby’uko Gitifu w’uyu Murenge akorana n’itsinda ry’abacuruza ibitoki muri uyu Murenge, yizeza abaturage kubafasha mu bikenewe ngo koperative yabo ikore.

Abanyamuryango bamaze gukora ibintu bitandukanye ariko babuze icyangombwa cy'agateganyo
Inzu abanyamuryango bakoreramo nayo ntabwo ubuyobozi buyemera
Perezida w'iyi koperative itaremerwa, Munyampeta Fabien, avuga ko bandikiye inama Njyanama y'Akarere ka Kirehe basaba kurenganurwa, ikaba itarabasubiza
Rwamakobwa avuga ko kutagira ibyangombwa bikomeje kubadindiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .