Kirehe: Imvura idasanzwe yasenye inzu 52 n’insengero eshatu

Yanditswe na Hakizimana Jean Paul
Kuya 19 Nzeri 2019 saa 09:24
Yasuwe :
0 0

Imvura idasanzwe yiganjemo umuyaga mwinshi yaguye mu Karere ka Kirehe mu Murenge wa Nasho, yasambuye inzu z’abaturage 52, insengero eshatu, isenya ibikoni 33 n’ubwiherero 52.

Iyi mvura yaguye kuri uyu wa Kane tariki 19 Nzeri ahagana saa munani kugeza saa cyenda z’amanywa ngo yari yiganjemo umuyaga mwinshi cyane ari nawo watumye hangirika inzu nyinshi.

Umunyamabanga Nshingwabikorwa w’Umurenge wa Nasho, Nzirabatinya Modeste yabwiye IGIHE ko iyi mvura yaguye mu gihe gito ariko ikangiza ibintu byinshi, usibye inzu n’insengero yangije ngo yanangije n’urutoki.

Ati “Yangije urutoki rungana na hegitari icumi aho ibitoki byari birimo ibyinshi byaguye, yanangije insinga z’amashanyarazi zatwaraga umuriro mu midugudu ibiri ya Gatare na Gatarama yo mu Kagari ka Rugoma.”

Yakomeje agira ati “Kugeza ubu turi gutegura umuganda udasanzwe kugira ngo dusubizeho ibisenge ku nzu ba nyirazo babone uko bazisubiramo, ikindi kuri uyu mugoroba tubashije kubashakira aho bacumbika mu baturanyi.”

Iyi mvura kandi yatumye Mukampore Gaudence agwirwa n’igisenge kubw’amahirwe aza kuba muzima kuri ubu ari kuvurirwa ku Kigo Nderabuzima cya Mulindi.

Akarere ka Kirehe ni kamwe mu dukunda kwibasirwa n’imvura, nko muri Mata uyu mwaka nabwo imvura idasanzwe yangije inzu nyinshi cyane.

Muri Mutarama uyu mwaka nabwo haguye imvura yiganjemo umuyaga yangiza inzu 228 z’abaturage, hegitari 183 z’imyaka.

Inzu z’abaturage 52 zasambutse
Abaturage bahuye n'ibyago bacumbikishirijwe
Hegitari 10 z'urutoki zangiritse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza