00:00:00 IGIHE NETWORK KN KINYARWANDA EN ENGLISH FR FRANCAIS

Kirehe: Imibiri 12 y’abishwe muri Jenoside yashyinguwe mu cyubahiro (Amafoto)

Yanditswe na Hakizimana Jean Paul
Kuya 15 April 2022 saa 03:47
Yasuwe :

Imibiri 12 y’abishwe muri Jenoside yakorewe abatutsi mu 1994 yashyinguwe mu cyubahiro mu Karere ka Kirehe, abaturage bongera gusabwa gutanga amakuru ku hantu baba bazi haherereye imibiri itarashyingurwa mu cyubahiro.

Iki gikorwa cyabaye kuri uyu wa Kane tariki ya 14 Mata 2022 ku rwibutso rwa Jenoside yakorewe abatutsi mu 1994 rwa Nyarubuye, ubwo hibukwaga uko kuri iyi tariki Abatutsi bari bahungiye ku Kiliziya cya Nyarubuye bishwe urw’agashinyaguro.

Uyu muhango witabiriwe kandi na Guverineri w’Intara y’Iburasirazuba, Gasana Emmanuel, intumwa za rubanda, inzego z’umutekano n’abandi bayobozi batandukanye.

Nkubiri Alfred na Rwagasana Erneste bavukiye muri aka Karere batanze ikiganiro cyagarutse ku bumwe bw’abanyarwanda bari batuye muri Nyarubuye mu myaka yo hambere, bavuze ko ahagana mu myaka 1957 ubwo babyirukaga basanze babana neza nta macakubiri yaharangwaga kugeza mu 1961 ubwo ubuyobozi bwari buriho bwatangiraga kubiba urwango mu banyarwanda.

Bavuze ko muri aka gace kimwe n’ahandi henshi mu gihugu habayeho ivangura mu mashuri, abatutsi ngo batangiye kwicwa kugeza ubwo Inkotanyi zihagaritse Jenoside yakorerwaga abatutsi.

Perezida wa Ibuka mu Karere ka Kirehe, Nduwimana Bonaventure, yavuze ko n’ubwo abatutsi b’i Nyarubuye banyuze mu buzima bushaririye muri Jenoside yakorewe abatutsi, ubu bishimira ko bafite igihugu cyunga abanyarwanda aho kubacamo ibice, giha agaciro buri wese uko agakwiye.

Yavuze ko kandi abarokotse Jenoside b’i Nyarubuye bashimira Inkotanyi na Nyakubahwa Perezida wa Repubulika wari uzirangaje imbere zihagarika Jenoside yakorerwaga Abatutsi zikagarurira abahigwaga icyizere cyo kongera kubaho.

Guverineri w’Intara y’Iburasirazuba, Gasana Emmanuel, yihanganishije imiryango yabuze ababo muri Jenoside yakorewe abatutsi abibutsa ko kuri ubu bafite igihugu kibakunda kandi kibitayeho.

Yagize ati "Turashima cyane abarokotse Jenoside yakorewe abatutsi ubutwari bagaragaza iteka. Batanga imbabazi, ubudaheranwa bwabo, kwihangana, kwiyubaka n’ibindi. Leta nayo ntiyahwemye kubafata mu mugongo no kubaba hafi mu kongera kwiyubakamo icyizere cy’ejo hazaza."

Mu gihe Abanyarwanda bakiri mu minsi 100 yo Kwibuka ku nshuro ya 28 Jenoside yakorewe abatutsi, Guverineri Gasana yagize ati "Ndabasaba ko dukomeza gufasha abarokotse Jenoside, kandi abantu bakagira ubutwari bwo kwerekana ahantu hose hakiri imibiri y’abatutsi itarashyingurwa, ngo ishyingurwe mu cyubahiro."

Yibukije abarokotse ko bahawe icyizere n’Umukuru w’Igihugu wavuze ko n’ubwo babuze ababo kuri ubu bafite igihugu kibakunda.

Ati “Ubu mufite igihugu cyiza, igihugu cyunze ubumwe, kitarangwamo amacakuburi, kidaheza, igihugu gifite icyerekezo cy’umuturage utekanye, uteye imbere kandi ufite imibereho myiza.”

Uyu muhango wasojwe hashyingurwa mu cyubahiro imibiri 12 yabonetse muri aka Karere y’abishwe muri Jenoside yakorewe abatutsi. Urwibutso rwa Nyarubuye rushyinguyemo abatutsi basaga 58,000 bishwe muri Jenoside yakorewe Abatutsi mu 1994.

Hashyinguye imibiri 12 y'abatutsi bishwe muri Jenoside
Nkubiri Alfred yashimiye Inkotanyi zabohoye igihugu
Guverineri Gasana yasabye abaturage bazi ahari imibiri itarashyingurwa kuhagaragaza
Urwibutso rwa Nyarubuye rushyinguyemo abatutsi basaga 58,000 bishwe muri Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .