Kirehe: Hakenewe ibyumba by’amashuri 1400 ngo ubucucike bugabanyuke

Yanditswe na Hakizimana Jean Paul
Kuya 26 Werurwe 2019 saa 11:35
Yasuwe :
0 0

Ubuyobozi bw’Akarere ka Kirehe buvuga ko nibura kugira ngo bagabanye ubucucike bw’abana mu mashuri yo muri aka karere, hakenewe ibyumba by’amashuri 1400 bishya.

Aka karere kari mu dufite ubucucike bw’abana benshi mu ishuri, aho bugera kuri 86%. Nibura abana 100 cyangwa 120 nibo biga mu ishuri rimwe.

Muri uyu mwaka aka karere kari kubaka ibyumba by’amashuri 73 birimo 60 bubakirwa na Minisiteri y’Uburezi, naho 13 bikubakwa ku bufatanye n’abaturage ndetse n’abafatanyabikorwa.

Ubwo Minisitiri w’Uburezi, Dr. Eugène Mutimura, yasuraga urwunge rw’amashuri rwa Paysannat L, Umuyobozi w’iki kigo Sebisogo Jean Paul, yavuze ko ubucucike bw’abana benshi mu ishuri buri mu bituma ireme ry’uburezi ritagenda neza.

Yavuze ko bafite abana benshi mu ishuri ku buryo bitorohera umwarimu kubakurikirana neza bose.

Mu kiganiro cyihariye IGIHE yagiranye n’umwe mu barimu bigisha kuri iki kigo utarifuje ko amazina ye ajya ahagaragara, yavuze ko bavunika cyane ku buryo leta ikwiriye kugira icyo ikora mu kugabanya ubucucike bw’abana mu ishuri.

Yagize ati “Nkanjye nigisha mu mashuri abanza, ishuri ryanjye nigishamo abana 108 biga mu gitondo n’abandi 104 biga ikigoroba, mbwira ukuntu nzigisha nkagera kuri buri mwana nkanamukosora mu gihe cy’iminota 40 isomo riba rifite, kandi nkasabwa gukora uko nshoboye abo bana bose ntibasibire.”

Uyu mwarimu yakomeje avuga ko nibura hakwiye kongerwa amashuri menshi n’abarimu benshi kugira ngo ireme ry’uburezi rigende neza ku bana.

Akarere ka Kirehe ifite abanyeshuri ibihumbi 126 926 bigira mu byumba 1405, ni ukuvuga nibura mu ishuri rimwe habarirwamo abanyeshuri 90.

Mu kiganiro Ubuyobozi w’Akarere ka Kirehe bwagiranye n’itangazamakuru mu cyumweru gishize, umuyobozi w’Akarere ka Kirehe, wungirije ushinzwe imibereho myiza y’abaturage Mukandarikanguye Geraldine, yavuze ko bakeneye ibyumba 1400 kugira ngo ikibazo cy’ubucukike bakivaneho burundu.

Yagize ati “Kugira ngo tugabanye ingendo ndende abana bakora, tunagabanye ubucucike, dusanga mu karere kacu haramutse nibura hubatswe ibyumba 1400 ari bwo twaba twumva dutekanye ku buryo ntakibazo cy’ubucucike twagira.”

Uyu muyobozi yakomeje avuga ko n’abanyarwanda bakwiye kwigishwa kuboneza urubyaro kuko ngo hari igihe bubaka amashuri bavuga ngo ikibazo cy’ubucucike kirarangiye, ariko wajya kureba abana bavutse muri ako gace ugasanga ni benshi cyane.

Umuyobozi w’Akarere ka Kirehe, Muzungu Gerard, asanga agereranyije n’aho bavuye bakwiye kwishimira aho bageze kuko mbere ya Jenoside muri aka karere nta shuri ryisumbuye ryaharangwaga, yose yaje nyuma.

Yakomeje agira ati “Ubu dufite amashuri aho mwarimu yigisha abanyeshuri 100 mu ishuri rimwe ariko dufatanyije na Minisiteri y’Uburezi ndetse n’ababyeyi nzi neza ko iki kibazo tuzagikemura”.

Uyu muyobozi yanavuze ko mu ngengo y’imari itaha hari miliyoni 100 Frw, bajyaga bashyira mu kuzamura amazi n’amashanyarazi mu baturage bateganya kuzazishyira mu burezi mu rwego rwo kugabanya ubucucike bw’abana mu mashuri.

Mu karere ka Kirehe habarurwa amashuri abanza 68 yigamo abana ibihumbi 99 224 ndetse n’ayisumbuye 53 yigamo abanyeshuri ibihumbi 27 702.

Muri aka Karere habarurwa intebe ibihumbi 20 485.Ni ukuvuga ngo izi ntebe uzigabanyijeho abanyeshuri nibura intebe imwe yicaraho abanyeshuri 6.

Gusa ubuyobozi bw’Akarere buvuga ko bufatanyije n’ababyeyi bwakoresheje intebe ibihumbi 35 zitezweho gukemura iki kibazo.

Ubuyobozi bw'Akarere ka Kirehe buravuga ko nibura bukeneye ibyumba by'amashuri 1400 kugira ngo bugabanye ikibazo cy'ubucucike bw'abanyeshuri mu ishuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza