Kirehe: Agronome yafatanywe toni ebyiri z’imbuto y’ibigori yagenewe abatishoboye agiye kuyigurisha

Yanditswe na Hakizimana Jean Paul
Kuya 22 Ukwakira 2019 saa 01:39
Yasuwe :
0 0

Umukozi ushinzwe ubuhinzi mu Murenge wa Gahara, mu Karere ka Kirehe Munyakazi Benoni Nicodem, yafatanywe imbuto y’ibigori yari igenewe abaturage batishoboye bo mu cyiciro cya mbere n’icya kabiri cy’ubudehe agiye kuyigurisha.

Yafatanywe imifuka 40 ihwanye na toni ebyiri ubwo yarimo kubishakira umuguzi ngo abigurishe.

Muri iki gihembwe cy’ihinga 2019B bamwe mu baturage batishoboye bo mu Murenge wa Gahara leta yabageneye imbuto y’ibigori byo guhinga, ibicisha muri Koperative COAIGA iherereye muri uyu Murenge.

Agronome w’umurenge Munyakazi akaba yarayinyujije ku ruhande ajya kuyibitsa umuturage witwa Kanimba Cleophas utuye mu Kagari ka Ruhimba mu Mudugudu wa Byimana.

Ibigori babigejejeyo barabyogeje babikuraho irange riba ribiriho ubundi babipakira imifuka batangira kubishakira isoko, amakuru yaje kumenyekana bigizwemo uruhare n’abaturage bituma polisi itangira gushakisha aho iyo mbuto yagiye niko kuyifatana Agronome mu ijoro ryo kuri uyu wa Mbere.

Umuvugizi wa Polisi mu Ntara y’Iburasirazuba CIP Twizeyimana Hamdun, yabwiye IGIHE ko bamenye amakuru ko imbuto y’ibigori yari igenewe abaturage batishoboye bo muri uyu Murenge yibwe bigatuma abaturage batayibona batangira kubikurikirana basanga byibwe na agronome w’umurenge.

Yakomeje agira ati “Yabyibye aho byari bibitse muri Koperative yitwa COAIGA, ajya kubibitsa ku muturage witwa Kanimba Cleophas, bagezeyo barabironga babikuraho irange biba bifite, Polisi yabifashe baramaze kubironga baranabipakiye mu mifuka mishya bagiye kubigurisha.”

CIP Twizeyimana yashimiye abaturage batanze amakuru, anagaya abayobozi baba bashinzwe kugeza ibintu ku baturage ahubwo bagashaka kubigurisha avuga ko nta bunyangamugayo burimo.

Yakomeje agira ati “Turamenyesha abantu bose batekereza gukora ibyaha ko nta mahirwe bafite kuko hari ubufatanye bwiza hagati y’abaturage na polisi, uzajya abigerageza tuzajya tumufata kandi n’amayeri bakoresha twarayamenye.”

Kuri ubu agronome Munyakazi n’umuturage bafatanyije mu kubyiba bashyikirijwe urwego rw’igihugu rw’ubugenzacyaha kugira ngo rubakorere dosiye bakurikiranwe ku cyaha bakekwaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza