KIM yagaragaje uko ifasha abayigamo kuba ababaruramari b’umwuga

Yanditswe na Habimana James
Kuya 28 Ugushyingo 2019 saa 08:32
Yasuwe :
0 0

Ubuyobozi bwa Kaminuza ya KIM, butangaza ko nubwo abaharangije baba bafite ubumenyi buhambaye ku isoko ry’umurimo, ubu bwahisemo ko umunyeshuri wese uharangije agomba kuba ari umubaruramari w’umwuga abifashijwemo n’iyi Kaminuza.

KIM ifite amateka akomeye kuko ariyo yabaye iya mbere mu gihugu mu gutangiza amasomo y’ibaruramari ry’umwuga bigizwemo uruhare na Peter Rutaremera wayitangije.

Kuba umubaruramari w’umwuga bisaba kuba waratsinze amasomo ya CPA (Certified Public Accountant) na CAT (Certified Accounting Technicians), kandi buri mwaka ukihugura amasaha 40 ku bintu bishya byinjiye mu mwuga.

Bisaba kandi kuba umwe mu banyamuryango b’urugaga rw’ababaruramari rwemewe n’ishyirahamwe ryabo ku Isi (IFAC).

Kuri uyu wa Gatatu ubwo IGIHE yageraga kuri iri shuri rihereye ahazwi nko kuri 12 i Nyandungu mu Mujyi wa Kigali, hari hateraniye abarenga 800 baturutse mu bice bitandukanye by’igihugu baje kuhakorera ibizamini bibemerera kuba ababaruramari b’umwuga.

Umuyobozi w’agateganyo wa KIM, Dr Mugabe Jean Baptiste, yabwiye IGIHE ko kugeza ubu iyi Kaminuza ari ihuriro ry’abanyeshuri batandukanye mu gihugu, aho bakorera ibizamini by’umwuga w’ibaruramari.

Yagize ati “Twe nka KIM twigisha amasomo asanzwe ariko icy’ingenzi turashako ko umunyeshuri wacu ava hano yize amasomo y’ababaruramari b’umwuga (Certified Public Accountant, CPA) n’andi, ubu bumenyi bumufasha kuba yajya ku isoko ry’umurimo kandi agahatana.”

Yakomeje agira ati “Ibi tubikora ku bufasha duha abanyeshuri bacu, iyo umunyeshuri aje kwiga hano tumuha ubufasha bwo kuba twamurihira 50% by’amafaranga bagomba kuba bishyura muri CPA, iyo avuye hanze ho yishyura 100%, ni amahirwe rero tubaha.”

Avuga abanyeshuri barenga 300 bamaze gufashwa na KIM kwiga aya masomo kandi bose babonye akazi keza mu gihugu n’ahandi.

Dr Mugabe avuga ko “Twe turabagabanyiriza kugira ngo rya shyaka dufite aba banyeshuri b’abanyarwanda koko bazabe abacungamutungo b’umwuga, bazavemo abantu bagirira igihugu akamaro."

Avuga ko abanyeshuri bakwiye kujya bareka ubunebwe, amahirwe babonye bakayakoresha neza kugira ngo bazasohoke bafite ubumenyi bwo kumenya umwuga.

Ati “KIM dufite abarimu b’inzobere bava mu Rwanda n’ahandi bagatanga ubumenyi bufite ireme, abarangije amashuri yisumbuye imiryango irakinguye kandi hari n’uburyo tubagabanyiriza mu mafaranga y’ishuri, ubu twagejeje kuri 75% ku yo bari basanzwe bishyura.”

Umuyobozi w’Ikigo ‘KASNEB’ gikoresha ibizamini bifasha abantu kuba abanyamwuga mu bijyanye n’ibaruramari, ubugenzuzi bw’imari n’imigabane, ubuyobozi n’ikoranaburanga, Jeanne Abayo, avuga ko KIM ariyo yabaye iya mbere mu Rwanda mu gutegura ibi bizamini.

Ati “Umwihariko wa KIM ni uko bari mu bantu batumye aya masomo agera mu Rwanda, ikindi nibo bantu ba mbere bakiriye ibi bizamini byacu kandi banakora mu mafaranga yabo kugira ngo bishyurire bamwe mu banyeshuri babo b’abahanga ngo bige aya masomo ya kinyamwuga."

Avuga ko “Undi mwihariko wa KIM ni uko hari irindi somo twatangije ryitwa Certified investment and Financial Analyst, KIM niyo ya mbere itanga ayo mahugurwa mu gihugu, izana abarimu kuko hano tudafite abaryize ikabishyura ngo bigishe abanyeshuri bashaka kwiga iryo somo.”

Abayo avuga ko kuba warize Kaminuza ari ibintu byibanze iyo wize aya masomo uba ugiye gukora ibintu biri ku rwego mpuzamahanga, ku buryo umuntu wa hano wize ibaruramari ry’umwuga, yakora ibihwanye n’ibyo uwaryize muri Amerika yakora.

Abanyeshuri bafashwa na KIM kwiga aya masomo bizeye icyerekezo cyiza.

Ester Mutoni wiga muri KIM mu mwaka wa gatatu, avuga ko yahisemo kwiga aya masomo kuko bizatuma ubuzima bwe buba bwiza, akaba yahangana ku isoko ry’umurimo.

Ati “KIM iradufasha kuko iduha abarimu bakatwigisha ku buntu, amafaranga y’ishuri mbese ni byose, ndabwira abandi bantu ngo bahitemo neza baze kwiga hano kuko aya masomo atuma umunyeshuri yaguka mu bitekerezo.”

Muvara Olivier umunyeshuri mu mwaka wa kane muri KIM, yiga isomo rya CPA, avuga ko ubwo yasozaga amashuri yisumbuye, yumvise amahirwe KIM itanga afata icyemezo cyo kujya kuhiga.

Ati “Batubwiraga ibyiza bya KIM ko harimo n’ayo masomo, tuje koko twasanze ahari, kugeza ubu nta mafaranga turatanga yo kwishyura, wishyura amafaranga asanzwe yo kwiga, aya CPA tukayishyurirwa.”

Amwe mu masomo atangirwa muri KIM arimo ay’Ubucuruzi (Bachelor of Business Management (BBM), ay’Amabanki n’Imari (Finance and Banking), ayo Kugenzura Amasoko (Procurement and Logistics Management) ajyanye n’Ubukungu (Bachelor of Science in Economics with specializations in Health Economics) n’ayandi.

Inibanda ku masomo y’Ibaruramari n’Icungamutungo, Ikoranabuhanga n’ay’umwuga yo muri urwo rwego nka CPA (Certified Public Accounts) na CAT (Certified Accounting Technician) n’ayandi.

Abanyeshuri barenga 800 bateraniye muri KIM bakora ibi bizamini by'ibaruramari ry'umwuga
Ester Mutoni wiga muri KIM avuga ko iyi Kaminuza imufasha kwiga aya masomo yo kuba umunyamwuga
KIM iherereye kuri 12 mu Mujyi wa Kigali
KIM itanga amasomo akomeye afasha umunyeshuri kuba umunyamwuga
KIM itanga ubumenyi bufite ireme
KIM yabaye ubukombe mu kwakira abashaka kuba ababaruramari b'umwuga
Muvara Olivier umunyeshuri mu mwaka wa kane muri KIM yiga isomo rya CPA yizeye kuzahava afite ubumenyi bukenewe ku isoko ry'umurimo
Umuyobozi wa Kasneb, Abayo Jeanne avuga ko KIM yabaye iya mbere mu gutangiza amasomo atuma umuntu aba umubaruramari w'umwuga
Umuyobozi w'agateganyo wa KIM, Dr Mugabe ashishikariza buri wese ubishaka kujya kwihahira ubumenyi muri KIM

Amafoto:Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .