Kiliziya Gatolika yatangije urugendo rwo gushyira mu batagatifu abitangiye abandi muri Jenoside

Yanditswe na Cyprien Niyomwungeri
Kuya 7 Ukuboza 2019 saa 03:32
Yasuwe :
0 0

Abepisikopi gatolika mu Rwanda, bemeje itangizwa ry’urugendo ruganisha ku ishyirwa mu batagatifu ry’abakristu batanze ubuzima bwabo kubera abandi mu gihe cya jenoside yakorewe abatutsi mu 1994.

Ni icyemezo cyafatiwe mu nama yabo yateraniye i Kigali kuva ku wa 3-6 Ukuboza 2019.

Umushumba wa Diyosezi Gatolika ya Butare akaba na Perezida w’Inama y’Abepiskopi Gatolika mu Rwanda, Musenyeri Philippe Rukamba, yabwiye IGIHE ko uru rugendo rugamije guha agaciro abitangiye abandi mu bihe bikomeye bya jenoside.

Ati “Ni abantu bazwi n’abatazwi bitangiye abandi, bapfuye kubera abandi cyangwa se bapfuye ku buryo bugaragara bw’ubutagatifu muri kiriya gihe cya Jenoside yakorewe Abatutsi”.

Mu bazwi, Musenyeri Rukamba atanga urugero rwa Felicite Niyitegeka, waguye i Nyundo, abapadiri bapfuye, abihayimana n’abana b’i Nyange bapfuye kugira ngo bakomeze bagire ubumwe n’abandi.

Musenyeri Rukamba ati “Abantu bamwe bashobora kuvuga ngo ese bapfiriye Imana?. Gupfira Imana na bagenzi babo ni ugupfira uko bateye cyane cyane icyo kintu cy’Imana, cya bagenzi babo. Batanze ubuzima bwabo kubera abandi cyangwa se banze kwitandukanya nabo mu gihe gikomeye”.

Nka Niyitegeka yishwe ku wa 21 Mata 1994, mu gihe cya Jenoside yakorewe Abatutsi kubera ko yanze kwitandukanya n’abo yari yahaye ubuhungiro hamwe na bagenzi be bari muri Centre Saint Pierre ku Gisenyi.

Nk’uko biri mu buhamya bunyuranye bwatanzwe nyuma y’urupfu rwe, musaza we Col. Nzungize Alphonse wari mu Ngabo za Leta y’Abatabazi wayoboraga ikigo cya gisirikari cya Bigogwe muri icyo gihe, ngo yashatse kumuhungisha, ariko Niyitegeka arabyanga.

Mu kabaruwa kagufi yamwandikiye, yamushimiye ko ashatse kumukiza, ariko amubwira ko atakwemera gusiga abari bamuhungiyeho. Ati “aho guhungisha ubuzima bwanjye, nsize abo nshinzwe bagera kuri 43, mpisemo gupfana nabo…”.

Kiliziya Gatolika igira ibyiciro bibiri by’abatagatifu, icyiciro kimwe ni ababa abatagatifu kuko bakoze ibikorwa bidashyikirwa, umuntu akaba yarabayeho ku buryo bugaragara, agakora ibikorwa by’ubudashyikirwa.

Icyiciro cya kabiri ni ababa abatagatifu kubera guhorwa Imana, ubutagatifu bwabo bukomoka ku gupfira abandi, gupfira Imana cyangwa se bagenzi babo.

Abatanze ubuzima bwabo kubera abandi muri Jenoside yakorewe abatutsi bazaba babarirwa muri iki cyiciro cy’abamaritiri bahowe Imana, bafasha bagenzi babo mu rukundo bari babafitiye.

Musenyeri Rukamba avuga ko bitewe n’uko ubutagatifu buri mu kwemera kwa Kiliziya Gatolika, abakristu Gatolika gusa ari bo barebwa n’uru rugendo rwo kubagira abatagatifu.

Ati “Ubutagatifu ni ikintu cy’idini, ni ukuvuga ko na bo bagize neza ariko se uzamugira umutagatifu atari umugatolika, ntibyakunda”.

Uru rugendo Kiliziya Gatolika mu Rwanda yatangiye ruzahera mu kubaza, gukora amaperereza bishobora kumara umwaka cyangwa kurenga.

Amakuru azaboneka azoherezwa i Roma kuko nibo babyemeza nk’ibintu bya Kiliziya bitari iyo mu Rwanda gusa, ahubwo by’Isi yose.

Mgr Rukamba avuga ko amakuru azashakwa aho abo bantu babaye kandi bizoroha dore ko uburyo bapfuye buzwi ndetse hari ababyanditseho. Paruwasi babagamo nazo zizifashishwa mu gushaka ubuhamya bw’uko uwo muntu koko yari n’umukristu ukomeye, na mbere yakoze ibintu byiza.

Yongeraho ko ari ibintu by’agaciro kuzirikana ubwitange bw’abemeye guhara ubuzima bwabo mu gihe gikomeye nka Jenoside yakorewe abatutsi.

Ati “Nk’iki kintu cyabaye iwacu noneho abatagatifu ari bene wacu, ari abantu b’iwacu urumva ko ari ikintu cyiza kandi ni uguha agaciro uburyo babayeho, ubuzima bwabo nk’abakristu”.

Hari abakristu bakoze ibikorwa by’indashyikirwa muri Jenoside ariko bakiriho, aba bagizwe abarinzi b’igihango n’inzego za leta.

Mgr Rukamba avuga ko aba nabo ibyo bakoze ari ibintu by’agaciro byo kurwana ku bantu ‘ariko ntabwo wamuha ubutagatifu ubungubu akiri muri ubu buzima, ashobora guhinduka, cyangwa se hari ibindi bintu bindi abantu bamunenga’.

Ubusanzwe kugira ngo umuntu usanzwe abe umutagatifu bisaba ko hari ibitangaza bigaragara kuri we nyuma yo gupfa ariko ngo ku bahowe Imana, ubuhamya bw’ababanye na we abamuzi n’abandi ngo birahagije ngo ashyirwe muri urwo rwego rwa Kiliziya Gaturika.

Musenyeri Rukamba yavuze ko abitangiye abandi muri jenoside hatangiye urugendo rwo kubagira abatagatifu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .