Kigali: Umushinga w’inkwavu zitunganya ubusitani wegukanye miliyoni 4 Frw mu marushanwa y’urubyiruko

Yanditswe na IGIHE
Kuya 19 Ukwakira 2019 saa 09:59
Yasuwe :
0 0

Umushinga w’inkwavu zitangiza ibidukikije witwa Green Rabbit wabaye uwa mbere mu mishinga itandukanye yateguwe n’amatsinda y’urubyiruko mu Mujyi wa Kigali ubwo hasozwaga amahugurwa agamije kurwanya ubukene rwagenewe.

Aya mahugurwa yari afite inyanganyamatsiko igira iti “Kuva mu magambo, ukajya mu bikorwa”, yitabiriwe n’urubyiruko 320 rusanzwe rwanditse mu bubiko bw’Ikoranabuhanga bw’Ikigo cy’Umujyi wa Kigali gishinzwe guteza imbere umurimo (Kigali Employment Service Center).

Yatanzwe ku bufatanye bwa KESC na EYES Rwanda (Employment and Youth Empowerment Solutions).

Nyuma y’aya mahugurwa yibanze ku kurwanya ubukene yasojwe hahembwa imishinga ine myiza itanga icyizere ku hazaza h’urubyiruko n’ah’igihugu.

Umushinga wa mbere wabaye ‘Green Rabbit’, wifashisha inkwavu zitunganya ubusitani zirya ibyatsi, wegukanye miliyoni 4 Frw; uwa kabiri ni ‘Avoka Iwacu’, wo gutera avoka umuntu atazitabye mu butaka ziri mu bihoho (aho zikurira) , ku buryo ubasha kwimukana igiti cyawe niyo cyaba kiriho umusaruro, wahembwe miliyoni 3 Frw; uwa gatatu ni uw’ubworozi bw’amagweja avamo ubudodo, wahawe miliyoni 2 Frw mu gihe uwa kane ari uwo korora inkoko n’inkwavu wahawe miliyoni 1 Frw.

Inkunga yose ya miliyoni 10 Frw yose hamwe, izatangwa n’Umuryango EYES, umufatanyabikorwa w’Umujyi wa Kigali mu kurwanya ubushomeri mu rubyiruko.

Biteganyijwe ko urubyiruko rwatsinze ruzajya ruhabwa amafaranga make bitewe n’icyo rugiye gukora kugeza ruyahawe yose.

Umushinga ‘Green Rabbit’ wabaye uwa mbere witezweho kuzagabanya imyuka ihumanya ikirere yaturukaga mu mashini zikoresha mazutu benshi bifashishaga.

Izi nkwavu kuko ziba zaratojwe gukata ibyatsi mu buryo bwo kubirisha, zikora akazi n’ubundi ko gutunganya ubusitani, ibyatsi zikabirya, zigatanga ifumbire kandi nta myuka ihumanya yoherejwe mu kirere.

Urukwavu rumwe rubasha gukata ibyatsi by’ahantu hangana na metero ebyiri kuri ebyiri ku munsi.

Ifumbire zataye aho zariye ba nyirazo bahita bayikusanya bakazayigurisha n’abayikeneye ku buryo nayo bayisaruramo amafaranga.

Hakizimana Nkotanyi Issa umaze igihe akora ubushakashatsi kuri uwo mushinga yavuze ko ari ubushakashatsi yatangiye umwaka ushize, abuhera ku nkwavu ebyiri, akaba amaze kugira inkwavu 125 kandi ko we na bagenzi be ubwo bamaze kubona inkunga bifuza kugera ku nkwavu 3000.

Ati “Ni umushinga maze igihe ntekereza kandi nkabona ko ujyanye na gahunda y’igihugu yo kugabanya imyuka ihumanya ikirere kuko imashini ntiziba zigikenewe dufite izi nkwavu zitunganya ubusitani. Igisigaye ni ukugira inkwavu nyinshi tukazitoza noneho n’abantu bakatugirira icyizere bakajya baduha akazi.”

Umuyobozi wa EYES Rwanda, Mporananayo Gerard, yatangaje ko nk’umushinga uteza imbere urubyiruko buri mwaka bene aya mahugurwa bayakora mu gihugu hose kandi ko guhindura imyumvire aricyo urubyiruko rukeneye kurusha inkunga y’amafaranga kuko rwifitemo ubushobozi bwinshi.

Ati “Iyi gahunda yo guhugura urubyiruko, rukishakamo imishinga yakemura ibibazo byugarije abaturage buri mwaka tuyikora mu Ntara zose n’Umujyi wa Kigali, turanabakurikirana tukareba ko batacitse intege kandi bigenda bitanga umusaruro.”

Ku ruhande rw’Umujyi wa Kigali, Bizimungu Abel, Umuyobozi Mukuru ushinzwe Iterambere ry’Imibereho Myiza y’Abaturage yasabye urubyiruko kuzakomeza ubumwe mu matsinda yabo no kureka kwitinya.

Ati “Nk’uko mwahoze mubiririmba murashoboye kandi imishinga mwakoze yose ni myiza, n’itabashije guhabwa inkunga ni myiza birakwiye ko mwazayishyira mu bikorwa. Tangirira kuri duke ufite, udukoreshe kuko ‘Ntinde bigwire yapfuye atarongoye’. Uwo ni umugani wa Kinyarwanda uratwigisha ko umuntu wese uretse kwitinya agakoresha ibyo afite niyo byaba bike, bitinda akagera ku nzozi ze.”

Uretse guhabwa inkunga ku mishinga yahize iyindi, urubyiruko ruzakomeza gukurikiranwa mu kureba uko ruyishyira mu bikorwa n’iy’abantu ku giti cyabo itanga icyizere, izakomeza gushakirwa abaterankunga.

Uyu muhango witabiriwe n'abantu bahagarariye inzego zitandukanye
Urubyiruko rwihurije hamwe mu mushinga wa 'Green Rabbit' rwasobanuye imiterere yawo birambuye
Abayobozi batandukanye bakurikirana imishinga y'urubyiruko rugamije gusubiza ibibazo by'abaturage mu Mujyi wa Kigali n'ahandi
Hakizimana Nkotanyi Issa ubwo yasobanuraga ibyiza by'umushinga w'inkwavu zikata ibyatsi
Hakizimana Nkotanyi Issa amurika umushinga w'inkwavu zikata ibyatsi mu busitani
Hari akanama nkemurampaka kari gashinzwe gutanga amanota
Mbarimombazi Aimable Wilson umwe mubakoze umushinga Avoka Iwacu wahembwe miliyoni 3 Frw
Umuyobozi wa EYES Rwanda, Mporananayo Gerard, yatangaje ko nk’umushinga uteza imbere urubyiruko buri mwaka bene aya mahugurwa bayakora mu gihugu hose
Umushinga wa avoka umuntu atera akanayimukana, ku buryo abakodesha badashobora kugira ikibazo cyo kugira imbuto za avoka na wo wahembwe
Uyu mushinga ugaragaza uburyo inkwavu zitozwa gukata ibyatsi ku buryo imashini zisohora imyuka ihumanya ikirere zahagarara
Umuyobozi Mukuru ushinzwe Iterambere ry’Imibereho Myiza y’Abaturage mu Mujyi wa Kigali, Bizimungu Abel, yasabye urubyiruko kureka kwitinya
Ibyishimo byabarenze, ubwo umushinga wabo w'Inkwavu wegukanaga umwanya wa mbere, ugahabwa inkunga ya Miliyoni 4 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza