Kigali: Umusanzu w’utuzu dutanga udukingirizo ku guhangana n’ubwandu bwa virusi itera Sida

Yanditswe na Thamimu Hakizimana
Kuya 13 Gashyantare 2020 saa 09:37
Yasuwe :
0 0

Abanyarwanda batandukanye biganjemo urubyiruko n’abakora uburaya mu Mujyi wa Kigali bemeza ko utuzu dutanga udukingirizo ku buntu twashyizwe mu bice bigaragaramo uburaya twagize uruhare mu rugendo rwo kwirinda virusi itera Sida.

Ni ubutumwa bwagarutsweho kuri uyu wa Kane tariki ya 13 Gashyantare 2020, ubwo Isi yose yizihizaga Umunsi Mpuzamahanga wahariwe Agakingirizo.

Igikorwa cyo gushyiraho ahatangirwa udukingirizo ku buntu mu duce tubarizwamo indaya nyinshi mu Turere twa Nyarugenge, Gasabo na Kicukiro cyatangiye mu 2016 bikozwe n’Ikigo cy’Igihugu gishinzwe Ubuzima, RBC ifatanyije n’Umuryango Mpuzamahanga ufasha mu kurwanya no gukumira Virusi itera Sida, AHF Rwanda n’Umujyi wa Kigali.

Cyatanze umusaruro mu kugabanya ubwandu bushya mu rubyiruko n’abakora uburaya by’umwihariko.

Nubwo nta rwego ruhamya igabanuka mu mibare, abaganiriye na IGIHE bemeza ko gushyirwaho utuzu dutanga udukingirizo ku bashaka gukora imibonano mpuzabitsina byabafashije cyane kwirinda Virusi itera Sida.

Mu buhamya bwabo bagaragaza ko mbere yo gushyirirwaho utu tuzu, bagorwaga no kubona udukingirizo ku buryo hari n’abahitagamo gukorera aho rimwe na rimwe, bamwe bikabaviramo kwandura.

Nyirabahinde Saidat umaze imyaka irindwi mu buraya yavuze ko agakingirizo gafasha mu bintu bitandukanye birimo kwirinda sida.

Yagize ati “Kanadufasha kwirinda kubera ko hari igihe umugabo aza ashaka gukorera aho noneho iyo ugafite urakamuha yakwanga ukamubwira akigendera.”

Byukusenge Zamda na we yemeza ko agakingirizo kagize uruhare mu kumufasha kudatwara inda zitateganyijwe.

Ati “Ndagakoresha kandi karamfasha cyane kuko kandinda gutwara inda zitateganyijwe no kubyara abana badahuje ba se; ikindi kandi iyo wagakoresheje uba utekanye kuko uba uziko nta ndwara n’imwe yandurira mu mibonano mpuzabitsina wakwandura.”

Umuyobozi w’Ishami rishinzwe kurwanya Sida mu Kigo cy’Igihugu cy’Ubuzima (RBC), Dr Mugwaneza Placidie, yavuze ko mu Rwanda hatangwa udukingirizo tugera kuri miliyoni 30 ku mwaka.

Ati “Ku mwaka hatangwa udukingirizo tugera kuri miliyoni 30 kandi turiya tuzu dutanga udukingirizo icyo dufasha, ni ukugeza udukingirizo ku badukeneye cyane. Tuba turi ahantu haba indaya nyinshi aho abantu baba bashobora kwandura kurusha ahandi nk’uko ubushakashatsi bwabigaragaje.”

Minisiteri y’Ubuzima yagiye ishyira utuzu dutanga udukingirizo ku buntu ahantu hagaragara indaya cyane kurusha ahandi harimo i Nyamirambo, Gikondo Magerwa, Remera Giporoso, Nyabugogo no mu Migina hafi ya Stade Amahoro. Utu duce twiyongeraho Rubavu n’i Rusizi aho udukingirizo twashyizwe mu rwego rwo gufasha Abanyarwanda kwirinda gukora imibonano mpuzabitsina idakingiye.

Mu Rwanda abafite ubwandu bwa Virusi itera SIDA ni 3%; imibare iheruka y’Ishami ry’Umuryango w’Abibumbye ry’Ubuzima (OMS) igaragaza ko abari hagati y’imyaka 15 na 45 yageze kuri 2.6%. Kuri ubu abafata imiti ni 97%.

U Rwanda rwarenze zimwe mu ntego Ishami ry’Umuryango w’Abibumbye rishinzwe kurwanya SIDA (UNAIDs) ryihaye yo kugeza ubuvuzi ku bafite virusi itera Sida mu 2020.

Ni intego (90-90-90) isobanura ko abafite virusi itera Sida bazaba bazi uko bahagaze ari 90%, abafata imiti 90% n’ubwandu bwaragabanutse kuri 90%.

Imibare yo mu 2018 igaragaza ko abarenga miliyoni 37.9 bafite virusi itera Sida ku Isi. Muri bo abagera kuri 79% nibo bazi uko bahagaze, 62% bafata imiti igabanya ubukana na 53% bafashe imiti igabanya ingano ya HIV kubera imiti ndetse hari amahirwe make yo kwanduza abandi.

Udukingirizo tw'ubuntu dutangirwa mu tuzu twabugenewe twagize uruhare mu kugabanya ubwandu bwa Virusi itera Sida

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza