00:00:00 IGIHE NETWORK KN KINYARWANDA EN ENGLISH FR FRANCAIS

Kigali na Musanze mu mijyi izungukira mu kigega cya miliyari 66$ cyo kubaka ubudahangarwa mu by’amazi

Yanditswe na Cyprien Niyomwungeri
Kuya 22 June 2022 saa 11:38
Yasuwe :

Umujyi wa Kigali n’uwa Musanze iri muri itandatu muri Afurika izatangirizwamo ibikorwa byo kubaka ubudahangarwa mu bigendanye n’amazi. Ni umushinga uzatwara miliyari 66 z’Amadolari muri Afurika yo munsi y’Ubutayu bwa Sahara.

Imijyi irimo gukorana n’ikigo cy’umutungo kamere w’amazi (WRI), ari nacyo cyakoze ubushakashatsi ku bigendanye no kubaka ubudahangarwa mu bigendanye n’iby’amazi mu mijyi ya Afurika. Uyu mushinga wamurikiwe mu nama ya CHOGM yiga ku iterambere ry’imijyi ibungabunga ibidukikije.

Ku ikubitiro uyu mushinga uzakorerwa mu mijyi itandatu yatoranyijwe harimo uwa Kigali, Musanze, Addis Ababa, Johannesburg n’iyindi. Ubushakashatsi bwagaragaje intego 10 n’ibikorwa 30 bigomba gushakirwa amafaranga yo kubishyira mu bikorwa, umujyi wa Kigali watoranyijemo ibikorwa bitanu byihutirwa.

Umuyobozi w’Umujyi wa Kigali wungirije Ushinzwe Imiturire n’Ibikorwaremezo, Dr Mpabwanamaguru Merard, yasobanuye ko hari ibikorwa bitanu uyu mujyi wahisemo.

Hari ugukora urutonde rugaragaza ibikenewe kugira ngo umujyi wubake ubudahangarwa mu bigendanye n’iby’amazi, kubaka ubushobozi bw’abaturage mu bijyanye no kubungabunga no gukoresha amazi, gushyiraho uburyo abaturage bibonamo mu gukoresha amazi, gushyiraho uburyo buhamye abantu batangiraho ibitekerezo mu bigendanye n’ikoreshwa, ibungwabungwa no gufata neza umutungo w’amazi.

Dr Mpabwanamaguru ati "Mu bikorwa bikeneye amafaranga harimo ibyo gukora ubukangurambaga ku ikoreshwa neza ry’umutungo w’amazi, gukora ibikorwa bishingiye ku kutonona amazi, yaba ibigendanye n’imyubakire, ubuhinzi n’ubworozi, kubungabunga amashyamba".

Uko imijyi igenda yiyongera, uko abaturage biyongera, ni nako ibibazo imijyi igenda ihura na byo biterwa n’amazi byiyongera.

Dr Mpabwanamaguru avuga ko mu bigomba gukorwa harimo no kubungabunga amazi akomoka ku mvura harimo kubaka za ruhurura ndetse no kugira ngo abe ari amazi abyazwa umusaruro kuruta uko yateza ibibazo birimo imyuzure n’ibindi.

Umuyobozi w’Akarere ka Musanze Ramuli Janvier, yavuze ko akarere ayoboye kakunze kugira ibibazo biturutse ku mihindagurikire y’ibihe. Ubu kakaba karatangiye kuganira n’abafatanyabikorwa ku kumenya ibibazo n’imbogamizi ziterwa n’amazi zihari kugira ngo hashakwe ibisubizo.

Nyuma yo gukora urutonde rw’imishinga ni bwo hazamenyekana ingengo y’imari Umujyi wa Kigali na Musanze izakenera muri ziriya miliyari 66 z’amadolari.

Abitabiriye inama yiga ku iterambere ry'imijyi, imwe mu zigize CHOGM iri kubera mu Rwanda
Ubwo hatangizwaga uyu mushinga wo kubaka ubudahangarwa bw'amazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .