Kigali n’Uburengerazuba byihariye umubare munini w’abanyeshuri batasubiye ku masomo n’abarimu bataye akazi

Yanditswe na Iradukunda Serge
Kuya 16 Ugushyingo 2020 saa 07:35
Yasuwe :
0 0

Minisiteri y’Uburezi yashyize hanze imibare y’abarimu n’abanyeshuri batarasubira ku mashuri kuva yafungurwa nyuma y’igihe yari amaze afunze kubera Covid-19. Iyi mibare igaragaza ko kugera ubu mu mashuri abanza abanyeshuri 11% n’abarimu 4.8% batarasubira ku mashuri.

Minisiteri y’Uburezi yatangaje imibare y’abarimu n’abanyeshuri batarasubira ku mashuri kuva yafungurwa aho igaragaza ko mu mashuri abanza abanyeshuri 11% n’abarimu 4,8% batarasubira ku mashuri.

Tariki ya 2 Ugushyingo nibwo amashuri yongeye gusubukura ibikorwa nyuma y’amezi umunani afunzwe muri gahunda yo kwirinda ikwirakwira ry’icyorezo cya COVID-19 kimaze guhitana abantu 45 mu Rwanda mu gihe abandi 5455 bacyanduye.

Mu mashuri abanza hatangiye abo mu mwaka wa Gatanu n’uwa Gatandatu naho mu yisumbuye hatangira abo mu mwaka wa Gatatu, uwa Gatanu n’uwa Gatandatu.

Uretse aba kandi hatangiye abo mu mashuri y’ubumenyi ngiro bari mu mwaka wa Gatatu n’uwa Gatanu n’abo mu y’Inderabarezi mu mwaka wa Mbere n’uwa Gatatu.

Nubwo aba banyeshuri basubukuye amasomo, Minisiteri y’Uburezi yagaragaje ko hari imibare minini y’abanyeshuri batarasubira ku masomo yaba mu Mujyi wa Kigali no mu Ntara zitandukanye.

Muri rusange mu mashuri abanza, umubare w’abanyeshuri basubiye ku masomo ni 89%,bivuze ko hari 11% batarasubirayo kandi bitaramenyekana niba ari uguta ishuri cyangwa bafite izindi mpamvu.

Muri aba basubiye ku mashuri, mu Mujyi wa Kigali bari kuri 85%, Intara y’Amajyepfo bari kuri 94,5%, Intara y’Amajyaruguru bakaba kuri 89,3%, Intara y’Iburasirazuba bari kuri 89,2% mu gihe mu Ntara y’Iburengerazuba abasubiye ku ishuri bo mu mashuri abanza ho babarirwa kuri 84,2%.

Ikibazo cy’umubare munini w’abanyeshuri batasubiye ku masomo ntikigaragara gusa mu mashuri abanza ahubwo no mu yisumbuye hari abatarasubirayo, kuko imibare ya Mineduc igaragaza ko abasubiyeyo babarirwa muri 91% mu gihe abagera ku 9% batasubiyeyo.

Muri aba abagera kuri 85,4% ni abo mu Mujyi wa Kigali, mu gihe abo mu Ntara y’Amajyepfo ari 92,1% mu Majyaruguru bakaba 93,5%, mu Ntara y’Iburasirazuba ni 92% ,mu iy’Iburengerazuba ari 89,4%.

Na bamwe mu barimu ntibasubiye mu kazi

Iki kibazo kiva ku banyeshuri kandi kikagera no ku barimu kuko mu igenzura Mineduc yakoze yasanze hari abarimu batasubiye mu kazi haba mu mashuri abanza n’ayisumbuye.

Imibare yerekana ko abarimu bigisha mu mashuri abanza mu Mujyi wa Kigali, abagera kuri 96% aribo basubiye mu kazi, mu Ntara y’Amajyepfo ni 97%, mu Ntara y’Amajyaruguru bo ni 96%, Iburasirazuba ni 93% mu gihe abarimu bo mu mashuri abanza mu Ntara y’Iburengerazuba basubiye mu kazi bo bagera kuri 94%.

Ibi bituma mu gihugu cyose abarimu bo mu mashuri abanza basubiye mu kazi bagera kuri 95,2%, mu gihe abagera kuri 4,8% batagasubiyemo.

Abarimu bo mu mashuri yisumbuye basubiye mu kazi babarirwa kuri 95,6% mu gihe abatarasubiyeyo bagera kuri 4,4% muri abagera kuri 96% ni abo mu Mujyi wa Kigali; 97,2% ni abo mu Ntara y’Amajyepfo, mu Ntara y’Amajyaruguru ni 97%, abo mu Ntara y’Iburasirazuba ni 93,3%, mu gihe abo mu Burengerazuba ari 94,8%.
Abanyeshuri bari gukorerwa ubukangurambaga, abarimu bo bataye akazi

Mu kiganiro Minisitiri w’Uburezi, Dr Uwamariya Valentine, yagiranye n’itangazamakuru kuri uyu 16 Ugushyingo yavuze ko hari gukorwa ubukangurambaga kugira ngo aba banyeshuri basubire ku masomo.

Yagize ati “Kugira ngo hatazagira umwana ucikanwa Minisiteri y’Uburezi n’abafatanyabikorwa bari mu bukangurambaga bwo kugira ngo abana bagaruke mu mashuri.”

Minisitiri Dr Uwamariya yavuze ko hatarakorwa ubushakashatsi bugamije kureba impamvu aba bana batarasubira ku ishuri ariko yemeza ko kuba Umujyi wa Kigali ari wo ufite umubare munini w’abana batarasubira ku ishuri bifite aho bihuriye no kuba haboneka akazi wenda abana bakaba barataye ishuri bakajya mu mirimo itandukanye.

Ku bijyanye n’abarimu batarasubira mu kazi, Minisitiri Dr Uwamariya yavuze ko bo bafatwa nk’abataye akazi kuko itegeko riteganya ko umukozi wa Leta umaze iminsi 15 atagera ku kazi nta mpamvu izwi afatwa nk’uwagataye.

Minisitiri w'Uburezi, Dr Uwamariya Valentine, yavuze ko hari gukorwa ubukangurambaga kugira ngo abana batarajya ku masomo basubire ku mashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .