Kigali Leading TVET School yahaye impamyabushobozi abasaga 260, basabwa gusigasira umuco nyarwanda (Amafoto)

Yanditswe na Evariste Nsengimana
Kuya 24 Kanama 2019 saa 10:27
Yasuwe :
0 0

Abanyeshuri 264 barangije amasomo yabo mu mashami y’ubukerarugendo, amahoteli n’ikoranabuhanha mu ishuri Kigali Leading TVET School, bahawe impamyabushobozi zibemerera kujya ku isoko ry’umurimo cyangwa gukomereza muri Kaminuza.

Aba banyeshuri barimo 120 bize amasomo amara imyaka itatu bahawe impamyabushobozi ya A2, abandi bahawe amahugurwa yo guteka amara amezi atatu n’amara umwaka umwe, bahawe impamyabushobozi kuri uyu wa 23 Kanama 2019.

Uyu muhango Kigali Leading TVET School ikoze ku nshuro ya Karindwi, wabereye muri Kigali Serena Hotel, witabiriwe n’abanyeshuri, ababarera, inshuti zabo n’abayobozi b’inzego zitandukanye.

Umuyobozi w’inama y’ubutegetsi y’iri shuri, Safari Valens, yashimiye abagize uruhare mu myigire n’imyigishirize ya Kigali Leading TVET School.

Yakomeje abwira abitabiriye ibi birori ati “Icyo nabibutsa ni uko abanyeshuri ba Kigali Leading baratandukanye, bahawe ubumenyi buhagije n’abarimu b’inzobere... Icyo tubifuzaho ni uko aho bazagenda bazakora neza bakiteza imbere, bagateza imbere n’igihugu, ubumenyi bwo twarabubahaye.”

Uwibambe Libéré, uhagarariye ababyeyi, yashimye uburyo abanyeshuri bitwaye mu bihe bitandukanye by’amasomo bitari biboroheye kugira ngo abahabwe izo mpamyabumenyi.

Yakomeje agira ati “Nubwo hari heza mugeze twishimira, turifuza ko ikinyabupfura cyabarangaga kitazahagarara, turifuza ko aho muzajya hose muzahagararira Kigali Leading TVET School n’imiryango yanyu neza.”

Umuyobozi wa Kigali Leading TVET School, Alphonse Habimana, yibukije abanyeshuri ‘gukomeza gukora no kwitwararika kugira ngo bazarusheho kuba indashyikirwa mu buzima bwabo’.

Ati “Nabasaba kuzirikana ko mukiri abacu nk’uko tubikora buri gihe duharanira ko mujya ku isoko ry’umurimo, twishimira amakuru y’abakoresha banyu iyo batubwiye ko mwitwara neza mu kazi. Mugomba kugira imyitwarire myiza, kumvira, kubahiriza gahunda y’akazi no gushyira mu bikorwa ibyo mwize.”

Uyu muyobozi yatanze urugero ku banyeshuri iri shuri ryohereje kwiga muri Mauritius bagera kuri 16, aho bimenyereza umwuga andi mahoteli akabishimira ndetse agasaba ko ryabongera.

Umunyamabanga Nshingwabikorwa w’Umurenge wa Gitega wari uhagarariye Umuyobozi w’Akarere ka Nyarugenge iri shuri riherereyemo, Mutuyimana Gabriel, yashimangiye ko abarangije muri iri shuri ari ikimenyetso cy’ubuyobozi bwiza u Rwanda rufite.

Mutuyimana yavuze ko ubumenyingiro iri shuri ritanga ‘Tububonamo igisubizo kuko buhuye n’ibindi twifuza biri mu muco nyarwanda’.

Ati “Nabasaba guhagararira umuco n’ibihugu byacu aho bazajya gukorera hose n’aho bazakomereza amasomo yabo. Turanashimira ubuyobozi uruhare bagira mu gushimangira umuco.”

Abanyeshuri bahawe impamyabushobozi bagaragaraje ibyishimo batewe n’umunsi udasanzwe bagezeho nyuma y’igihe kirekire biga amasomo atandukanye nk’uko Umuhoza wavuze mu izina ry’abarangije yabitangaje, asaba bagenzi be kwigirira icyizere mu rugendo rwabo rw’ubuzima.

Ishuri rya Kigali Leading TVET School ryatangiye mu 2013. Ubu rifite abanyeshuri hafi 400, rimaze guha impamyabushobozi abanyeshuri 896.

Kigali Leading TVET School yahaye impamyabushobozi abasaga 260, basabwa gusigasira umuco nyarwanda
Abarangije muri Kigali Leading TVET School bahabwa impamyabushobozi
Ibi birori byitabiriwe n'abashyitsi batandukanye
Mutuyimana yavuze ko ubumenyingiro iri shuri ritanga babubonamo igisubizo kuko buhuye n’ibindi bifuza biri mu muco nyarwanda
Umuyobozi wa Kigali Leading TVET School, Alphonse Habimana
Umuyobozi w'ishuri n'abandi bashyitsi ari gushyikiriza impamyabushobozi umwe mu banyeshuri baharangije
Ababaye indashyikirwa babishimiwe
Itorero ribyina ririmo gususurutsa abashyitsi
Uyu muhango wabayemo n'imbyino gakondo
Abarerera muri Kigali Leading TVET School bari baje gushyigikira abana babo
Abarezi ba Kigali Leadinga TVET bari gufata ifunguro rya mu gitondo
Bimwe mu bihembo byahawe abanyeshuri babaye indashyikirwa
Bafashe amafoto rusange y'urwibutso

Amafoto: Noah Niyontegereje

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza