Kigali Leading TVET School igiye kohereza abanyeshuri 30 gukomeza amasomo muri Île Maurice

Yanditswe na Evariste Nsengimana
Kuya 27 Ukuboza 2019 saa 10:17
Yasuwe :
0 0

Ishuri ryigisha Ubukerarugendo n’Amahoteli rya Kigali Leading School rigiye kohereza icyiciro cya gatatu cy’abanyeshuri 30 kwiga no kwimenyereza umwuga muri Kaminuza ya Jeet’s Hospitality and Tourism Management, iherereye mu Birwa bya Maurice.

Aba banyeshuri bagiye gukomereza amasomo atandukanye muri iki gihugu nyuma y’amasezerano ibigo byombi byagiranye umwaka ushize, ateganya uburyo bwo kohereza abanyeshuri kwigayo, guhanahana abarimu n’imfashanyigisho.

Bagiye kugenda bakurikira ibyiciro bibiri by’abandi boherejweyo aho icya mbere cy’abanyeshuri batanu cyagiye muri Werurwe 2019, abandi icyenda bagenda muri Kanama 2019.

Kuri uyu wa 27 Ukuboza 2019 nibwo aba banyeshuri bashyikirijwe ibyangombwa birimo Visa n’itike y’indege izabajyana muri iki gihugu ku wa mbere taliki ya 30 Ukuboza 2019, mu muhango witabiriwe n’ababyeyi, ubuyobozi, ku cyicaro cy’iri shuri riherereye mu Karere ka Nyarugenge.

Umuyobozi wa Kigali Leading TVET School, Habimana Alphonse, yavuze ko batoranya aba banyeshuri bagendeye ku mitsindire n’imyitwarire yabo, ariko hakazamo no kumvikana n’ababyeyi.

Inshuro ya mbere aboherejweho bishyuriwe ibyo bazakenera byose 100% ariko kugira ngo hoherezweyo benshi, biba ngombwa ko biyishyurira 50% gusa. Bazamarayo amezi 18.

Ati “Turabasaba gukomeza gushyira imbaraga mu myigire nk’uko musanzwe mubikora hano..Mugomba kugira uruhare mu mitangire myiza ya serivisi kandi mukaba hariya nk’abahagarariye igihugu mwubahiriza icyabajyanye kandi mukarinda indangagaciro zanyu nk’Abanyarwanda.”

Umuyobozi w’Umurenge wa Gitega, Nyamutera Innocent, wari uhagarariye Meya w’Akarere ka Nyarugenge, yabwiye abanyeshuri ko bagomba kurangwa no gukunda igihugu.

Ati “Amahirwe mubonye muyabyaze umusaruro, iyo muhashye ubumenyi hari icyo bubazamuraho ariko n’igihugu hari icyo kibona. Muzahahe muronke ariko n’igihugu kibyungukiremo…Ntihazagire ubacamo ashaka kugambanira igihugu.”

Aba banyeshuri bijeje ababyeyi n’ubuyobozi bw’ikigo gukomera ku ndangagaciro, bikazabafasha guhesha ishema igihugu.

Ingabire Flavia yagize ati “Ndishimye kuri aya mahirwe akomeye mu buzima mbonye, ngiye kuyakoresha neza kugira ngo mbashe guteza imbere igihugu cyanjye.”

Mugenzi we witwa Nkundabera Ephrem yagize ati “Intego njyanye ni ukwiga nkagera ku rundi rwego.”

Ishuri rya Kigali Leading TVET School ryatangiye mu 2013. Ubwo ryatangaga impamyabumenyi ku nshuro ya karindwi muri Kanama 2019 ryari rifite abanyeshuri hafi 400, rimaze guha impamyabushobozi abagera kuri 896.

Abanyeshuri 30 bagiye kwiga mu Birwa bya Maurice n'ababaherekeje bateze amatwi impanuro bahaye
Bamwe mu babyeyi b'aba banyeshuri baherekeje abana babo
Ubwo abanyeshuri bahabwaga impanuro bari hamwe n'ababyeyi babo
Umuyobozi wa Kigali Leading TVET School, Habimana Alphonse, yavuze ko batoranya aba banyeshuri bagendeye ku mitsindire n’imyitwarire yabo
Umuyobozi wa Muhabura Integrated Polytechnic, Pasiteri Manirakiza Vital, ari gutanga impanuro
Umuyobozi w’Umurenge wa Gitega, Nyamutera Innocent, yasabye abanyeshuri bagiye kujya kwiga guhagararira neza u Rwanda
Abanyeshuri bagiye kwiga hanze bijeje guhesha ishema igihugu
Byari ibishimo ku banyeshyri bagiye kwiga muri Île Maurice
Ubwo bamwe mu banyeshuri bashyikirizwaga ibyangombwa
Umwe mu boherejwe muri Île Maurice ahabwa icyangombwa
Abanyeshuri 30 bagiye koherezwa gukomeza amasomo muri Île Maurice

Amafoto: Munyarugerero Gift

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .