00:00:00 IGIHE NETWORK KN KINYARWANDA EN ENGLISH FR FRANCAIS

Kigali: Izamuka ry’ibiciro rigiye kubarisha Noheli nabi

Yanditswe na IGIHE
Kuya 23 Ukuboza 2022 saa 07:32
Yasuwe :

Abaturage batandukanye bo mu Mujyi wa Kigali baravuga ko batazizihiza neza iminsi mikuru isoza umwaka ya Noheli n’Ubunani kubera uburyo ibiciro by’ibintu byose byazamutse.

Ibi aba baturage babitangarije IGIHE kuri uyu wa Gatanu tariki ya 23 Ukuboza 2022.

Bavuga ko mbere Noheri n’Ubunani iyo byabaga byegereje babashaga kugurira abana babo imyenda ndetse bakanahaha ibiryo bitandukanye birimo n’akaboga (inyama), gusa ngo kuri ubu iyi minsi bazayifata nk’indi isanzwe bitewe n’uko nta mafaranga bafite yo kuzasabanamo n’imiryango yabo.

Mukayisenga Jose, yagize ati “ Njye kuri Noheli ikintu nzakora ni ukujya gusanga narangiza njye n’abana tugataha bakarya imvange nko mu yindi minsi kuko sinabona amafaranga yo kubaguriramo ikiro cy’inyama kigura 4000Frw.”

Kabanda Viateur, we avuga ko ari kwibaza uburyo Noheli izaba we n’abana be babure kuyizihiza.

Ati “Nibwo bwa mbere Noheli n’Ubunani bigeye kumbihira, uzi ko no muri Covid-19 bitari bimeze uku? Ubu nibeshye nkashaka gushimisha abana sinzi ko nazabona amafaranga y’ishuri yabo kuko ubu umuceri ikiro kiri kugura 1700Frw, inyama zikagura 4000 Frw utarashyiramo ibirungo, noneho ibaze wihaye ibyo kugurira abana imyambaro uko byagenda batangiye ishuri?”

Uwamahoro Diane, yagize ati “ Ubu kuva mu gitondo nta mukiliya wari waza ngo anambaze ikintu kandi urabona ko bigeze saa sita n’igice kubera ko bose baba bavuga ngo ibintu birahenze rero nkubeshye nakubwira ngo Noheri izagenda neza.”

Ikigo cy’igihugu gishinzwe ibarurishamibare, giherutse gutangaza ko mu kwezi k’Ugushyingo 2022, hirya no hino mu Rwanda ibiciro ku masoko byazamutse ku ijanisha rya 33,8%.

Iyi mibare igaragaza ko ibiciro bikomatanyije (byo mu mijyi no mu byaro) byazamutse kuri iki kigero bivuye ku ijanisha rya 31% byari byiyongereyeho mu Ukwakira 2022.

Bimwe mu byatumye ibiciro byiyongera mu kwezi k’Ugushyingo 2022, ni ibiciro by’ibiribwa n’ibinyobwa bidasembuye byiyongereyeho 64,5% n’ibiciro by’inzu, amazi, amashanyarazi, gaz n’ibindi bicanwa byiyongereyeho 14,6%.

Abakorera mu isoko ry'i Nyamirambo bavuga ko babona abakiliya biyushye akuya
Abacuruzi bararira ayo kwarika kuko batakibona abakiliya
Benshi bemeza ko muri iki gihe inyama iribwa n'uwifite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .