Kigali: Hatangijwe irushanwa ryo gukora ibishushanyo mbonera by’intebe zo mu byanya rusange

Yanditswe na Nkurunziza Ferdinand
Kuya 20 Gicurasi 2020 saa 08:08
Yasuwe :
0 0

Ubuyobozi bw’Umujyi wa Kigali bwatangije amarushanwa yo gukora ibishushanyo mbonera by’intebe zizajya zishyirwa ku mihanda no mu byanya bihuriramo abantu benshi ryiswe ‘Kigali Yacu’-Activating Public Outdoor Space One Bench at a Time.”

Umujyi wa Kigali watangaje ko uhamagarira abanyeshuri ba Kaminuza y’u Rwanda bize ibijyanye n’ubumenyi mu gukora ibishushanyo mbonera (Architecture) kwitabira iri rushanwa kuko abazatsinda bazahembwa.

Ibizagenderwaho hakorwa ibyo bishushanyo mbonera ni ingano y’iyo ntebe, hakenewe ko izajya yicarwaho n’abantu batarenze bane, imiterere ihoraho ndetse n’uburyo bwo kuzitera ahateganyijwe bitabangamiye ibindi bikorwa remezo.

Abazitabira iri rushanwa basabwa kuzakora ibishushanyo ku buryo bugaragaza korohereza abazazikoresha, kandi bikajyana n’iterambere ry’ibikorwa remezo by’imihanda mu Mujyi wa Kigali.

Biteganyijwe ko intebe zizakorwa hagendewe ku bishushanyo bizahiga ibindi mu irushanwa, zizashyirwa no ku nkengero z’imihanda mu buryo buhoraho, bityo ko zigomba gukorwa ku buryo buzifasha guhangana n’ihindagurika ry’ibihe.

Ubukomere bwazo kandi bugomba guhuzwa n’uko zizakoreshwa n’abantu benshi kandi batandukanye.

Izo ntebe zigomba kuba zoroshye mu buryo bwo kuziteranya, gukorerwa isuku, gusanwa igihe zangiritse kandi zikaba zihendutse […] byiyongera ku bwiza zigomba kuba zubakanwe.

Iri rushanwa ryatangijwe ku wa 20 Gicurasi 2020; kwakira ibihangano bikazasozwa ku wa 20 Nyakanga 2020; mu gihe abatoranyijwe bazatangazwa nyuma y’icyumweru kimwe.

Inyandiko zikubiyemo ibihangano by’irushanwa zizoherezwa mu buryo bw’ikoranabuhanga kuri email: [email protected]

Abazarushanwa bemerewe kubikora ari umuntu umwe cyangwa itsinda ry’abantu.

Bane ba mbere bazahiga abandi, ibihangano byabo bizashyirwa mu imurikabihangano muri Kigali City Exhibition Room ndetse bahabwe icyemezo cy’uko bitabiriye irushanwa.

Uzaba uwa gatatu azahembwa 200 000 Frw, anahabwe umwanya wo gukarishya ubumenyi mu kigo cya Gasabo 3D; uwa kabiri we azahembwa 300 000 Frw no gukarishya ubumenyi mu kigo cya Gasabo 3D; mu gihe uwa mbere we azahembwa 500 000 Frw n’amezi atatu yishyurwa yo gukarishya ubumenyi muri MASS Design Group.

Ishusho igaragaza intebe zishobora kuzashyirwa ku nkengero z'imihanda no mu byanya bihuriramo abantu benshi mu Mujyi wa Kigali
Icyanya cyahariwe kuruhukiramo imbere y'ibiro by'Umujyi wa Kigali, kigaragaramo intebe zigenewe abahasura n'abaharuhukira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .