00:00:00 IGIHE NETWORK KN KINYARWANDA EN ENGLISH FR FRANCAIS

Kigali: Bane bafashwe bakekwaho kwiba ibikoresho bya sosiyete ikora iminara

Yanditswe na Thamimu Hakizimana
Kuya 13 April 2022 saa 05:23
Yasuwe :

Abagabo bane barimo n’umusekirite bo mu Mujyi wa Kigali batawe muri yombi bakekwaho kwiba ibikoresho bya Sosiyete yo muri Koreya yitwa Only Infra Construction (OIT)ikora iminara.

Kuri uyu wa Gatatu tariki ya 13 Mata 2022 nibwo abafashwe beretswe itangazamakuru.

Polisi ivuga ko aba bagabo ibyuma bari baribye bifite agaciro ka miliyoni 11 Frw mu gihe bo bari babigurishije amafaranga ari hagati y’ibihumbi 130 n’ibihumbi 140.

Ibi byuma babikuye ahantu habiri harimo kubakwa umunara mu Murenge wa Nyarugunga mu karere Kicukiro n’ahazwi nko mu Izindiro.

Yemeza ko umusekirite ari we wibaga ibyo bikoresho maze akabiha umusore bakoranaga na we akajya kubigurisha ku wundi mugabo waguraga ibyuma.

Umuvugizi wa Polisi y’u Rwanda, CP Kabera John Bosco, yabwiye IGIHE ko ikibabaje ariko mu bibaga ibyo bikoresho harimo n’uwari ushinzwe kubirinda.

Yagize ati “ Navuga ko ikibazo gikomeye gihari ari ukuba umuntu ashinzwe kurinda ibikoresho akaba ari we ubyiba akabigurisha. Bikwiye kubera isomo buri muntu cyane cyane abashinzwe umutekano bikorera.”

Yongeyeho ko abayobozi za sosiyete zishinzwe umutekano bakwiye kujya bagenzura abakozi babo n’aho bakorera kugira ngo bamenye imikorere n’imyitwarire yabo.

Umuyobozi muri sosiyete ishinzwe umutekano umusekirite wafashwe yakoragamo, yavuze ko nyuma y’uko bamenyesherejwe ko hari ibintu by’abakiliya babo byibwe, bihutiye kubimenyesha Polisi kugira ngo ikore iperereza.

Yagize ati “Mu cyumweru gishize batubwiye ko hari ibintu byabo byibwe tubabwira ko tugiye kubikurikirana ariko mubo twakekaga harimo n’umukozi wacu noneho twiyambaza polisi tuyibwira ko tumukeka kuko hari n’undi mukiliya wacu wari wabitubwiye, ikora iperereza nibwo ejo bundi bamufashe.”

Ingingo ya 166 yo mu gitabo cy’amategeko ahana ibyaha mu Rwanda ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe ariko kitarenze imyaka ibiri, ihazabu y’amafaranga y’u Rwanda atari munsi ya miliyoni 1 Frw ariko atarenze miliyoni 2 Frw, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.

Abafashwe bagiye gushyikirizwa inzego z'ubutabera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .