Kigali: Babiri bafashwe baha abana inzoga, utubari turafungwa

Yanditswe na Bukuru JC
Kuya 22 Nzeri 2019 saa 07:30
Yasuwe :
0 0

Mu ijoro rya tariki ya 20 rishyira 21 Nzeri 2019 Polisi y’u Rwanda yakoze umukwabu wo kugenzura ahakorerwa ubucuruzi bw’inzoga mu turere twose tugize umujyi wa Kigali utubari tuneturafungwa, babiri mu bashinzwe gucunga utwo tubari bashyikirizwa urwego rw’ubugenzacyaha (RIB).

Polisi y’u Rwanda yatangaje ko hari bamwe mu bafite utubari bacitse bagishakishwa mu gihe abana icyenda bari munsi y’imyaka 18 ari bo bafatiwe muri icyo gikorwa.

Mu karere ka Nyarugenge mu murenge wa Muhima mu kabari kitwa VIP Bar basanzemo umwana w’umukobwa ufite imyaka 17 anywa inzoga, hafatwa ushinzwe gucunga ako kabari (Manager). Mu kabari kitwa Service Club naho bahasanze umwana w’umukobwa ufite imyaka 17 anywa inzoga, hafatwa ushinzwe gucunga akabari.

Mu karere ka Kicukiro mu murenge wa Nyarugunga, mu kabari kitwa Carioka hafatiwe abana bane, abahungu batatu n’umukobwa umwe bose bari munsi y’imyaka 18, gusa abacuruzaga muri ako kabari baracitse bakaba bakirimo gushakishwa.

Ni mu gihe mu karere ka Gasabo mu murenge wa Remera mu kabari kitwa New Hirwa hafatiwe abana 3, ushinzwe gucunga ako kabari na we ahita acika.

Umuvugizi wa Polisi mu mujyi wa Kigali Chief Inspector of Police (CIP) Marie Gorette Umutesi, yavuze ko itegeko ribuza abantu guha abana inzoga ndetse n’indi mirimo yo mu tubari rihari kandi abacuruza inzoga bararimenyeshejwe.

Avuga ko Polisi itazahwema kurwanya abantu bose barirengaho.

Yagize ati “Itegeko rirahari ndetse abanyarwanda bose bararibwiwe na ba nyir’utubari bararizi. Ubu rero hatangiye ibikorwa byo gufata abarirengaho, kandi ntibirangiye bizakomeza."

CIP Umutesi yakomeje asaba ababyeyi kuba maso bagakurikirana uburere bw’abana babo bakabarinda kujya mu tubari kunywa inzoga cyangwa gukoreshwayo indi mirimo. Yakomeje asaba abanyarwanda bose kujya bihutira gutanga amakuru y’aho babona abana banywa inzoga mu tubari.

Mu gitabo cy’amategeko arengera abana cyo kuwa 31 Kanama 2018 mu ngingo yacyo ya 27 igika cya gatatu bavuga ko umuntu ugurisha umwana inzoga cyangwa itabi, ubimushoramo cyangwa umushishikariza kubinywa cyangwa kujya mu tubari aba akoze icyaha. Iyo abihamijwe n’urukiko, ahanishwa igihano cy’igifungo kitari munsi y’amezi atatu ariko kitageze ku mezi atandatu n’ihazabu y’amafaranga y’u Rwanda atari munsi y’ibihumbi ijana ariko atarenze ibihumbi magana abiri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza