Kigali: Abamotari bashyiriweho amasomo y’Icyongereza mu kwitegura inama ya CHOGM

Yanditswe na Thamimu Hakizimana
Kuya 8 Werurwe 2020 saa 02:10
Yasuwe :
0 0

Ishyirahamwe ry’Abamotari mu Rwanda (Ferwacotamo) ryatangije amasomo y’Icyongereza muri buri Karere kagize Umujyi wa Kigali, kugira ngo bazabashe gukorana neza n’abashyitsi bazitabira inama ya 26 izahuza Ibihugu bikoresha ururimi rw’Icyongereza (CHOGM).

Inama ya CHOGM izabera mu Rwanda kuva tariki ya 22 kugeza tariki 27 Kamena 2020, ikazitabirwa n’abakuru b’ibihugu na za guverinoma zikoresha Icyongereza.

Ubuyobozi bw’abamotari mu Rwanda bwatangaje ko bwahisemo gushyiraho amashuri y’Icyongereza mu rwego rwo kwitegura inama ya CHOGM kuko bwasanze abamotari bagifite imbogamizi muri uru rurimi.

Umuyobozi wa FERWACOTAMO, Ngarambe Daniel, yabwiye IGIHE ko basanze bakwiye gushinga ishuri ry’Icyongereza kugira ngo bafashe abamotari kumenya uru rurimi.

Yagize ati “Hari nk’igihe umumotari yatse umunyamahanga amafaranga 100 yayavuze mu Cyongereza kandi yashakaga kumwaka 1000 ntibumvikana. Umunyamahanga yatubwiye ibyo yamubwiye dusanga batumvikanye kubera ururimi, rero twabikoze mu rwego rwo kugira ngo bajye batanga serivisi nziza kandi neza.”

Nk’abantu bahura n’abantu benshi, Ngarambe yavuze ko bifuza ko abamotari bazabasha kumvikana n’abazaba bitabiriye inama ya CHOGAM mu gihe bagize aho babasaba kubajyana.

Ati “Inama ya CHOGM iri mu byatumye dutegura aya mashuri kuko nubwo dufite abamotari bize, umubare mwinshi ni uw’abatazi izindi ndimi mu gihe usanga dutwara abanyamahanga benshi.”

Yongeyeho ko bafite icyizere cy’uko muri Kamena abamotari benshi bo muri Kigali bazaba bazi byibuze amagambo y’ibanze bashobora gukoresha baciririkanwa n’abanyamahanga.

Byukusenge Emmanuel ukora akazi ko gutwara abantu kuri moto mu Mujyi wa Kigali, yavuze ko kuba barashyiriweho ishuri bizabafasha kubona inyungu ifatika muri CHOGM.

Ati “Ni ibintu twishimiye cyane kuko wasangaga duhura n’abagenzi b’abanyamahanga cyane cyane abazungu tukananirwa kumvikana rimwe na rimwe bakatwishyura amafaranga make ugereranyije n’ayo twagakwiye guhabwa kubera ikibazo cy’ururimi ariko kuba twashyiriweho amashuri byadushimishije kuko bizatwongerera inyungu.”

Muhizi Jean Claude, we avuga ko ishuri ry’Icyongereza ku bamotari riziye igihe ndetse akanashimangira ko ribafiteye akamaro kanini.

Ati “Ubu twatangiye kukiga kugira ngo mu kwa Gatandatu hazagere tukidudubiza neza kandi twizeye ko bizadufasha cyane. Hari aho umuntu yahuraga n’umuzungu akamwihorera kubera ko yabaga azi ko batari bwumvikane ku bijyanye n’ururimi.”

Biteganyijwe ko abamotari baziga indimi eshatu zirimo Igifaransa, Igiswahili n’Icyongereza ariko umwihariko ukaba Icyongereza.

Buri mumotari yishyura amafaranga ibihumbi bitatu mu kwezi kugira ngo yigishwe izo ndimi. Ku munsi, umumotari ahabwa amasaha abiri yo kwiga.

FERWACOTAMO itangaza ko nyuma y’Umujyi wa Kigali, ayo masomo azagezwa no mu tundi turere.

Abamotari muri Kigali bishimiye gushyirirwaho amashuri abigisha Icyongereza mu gihe bitegura CHOGM

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza