Abajya mu Majyepfo n’Iburengerazuba batangiye gutegera imodoka kuri Stade ya Kigali i Nyamirambo

Yanditswe na IGIHE
Kuya 24 Ukuboza 2020 saa 02:51
Yasuwe :
0 0

Umujyi wa Kigali watangaje ko abakora ingendo zijya mu Ntara y’Amajyepfo n’iy’Iburengerazuba batangiye gutegera imodoka kuri Stade i Nyamirambo aho kuba muri Gare ya Nyabugogo nk’uko byari bisanzwe hagamijwe kugabanya umuvundo w’abagenzi.

Ni icyemezo ubuyobozi bw’Umujyi buvuga ko bwafashe nyuma yo kubona ubwiyongere bw’umubyigano uri guterwa n’umubare munini w’abifuza kujya kwizihiriza iminsi mikuru mu ntara bari kumwe n’imiryango yabo.

Mu itangazo Umujyi wa Kigali washyize kuri Twitter wavuze ko abarebwa n’iki cyemezo ari abajya mu Ntara y’Amajyepfo n’iy’Iburengerazuba mu Turere twa Rusizi, Karongi, Nyamasheke na Ngororero.

Rigira riti “Mu kugabanya ubucucike i Nyabugogo ahategerwa imodoka, aberekeza mu Majypefo bose n’aberekeza mu gice cy’Iburengerazuba mu Turere twa Rusizi, Karongi, Nyamasheke na Ngororero barimo kujya gufatira imodoka i Nyamirambo kuri stade, abasigaye bose barakomeza gutegera Nyabugogo.”

Iki cyemezo gifashwe nyuma y’umunsi umwe muri Gare ya Nyabugogo hagaragaye uruvunganzoka rw’abagenzi, rwatumye bamwe babura imodoka basabwa gusubira aho baturutse.

No mu gitondo cyo kuri uyu wa 24 Ukuboza 2020 byasaga nk’aho nta cyahindutse cyane kuko abageze muri gare mu masaha ya mbere ya saa Sita babwiwe ko itike zashize.

Ubwo yaganiraga na IGIHE kuri uyu wa 23 Ukuboza 2020, Umuyobozi wa Serivisi zo gutwara Abantu n’Ibintu muri Rwego Ngenzuramikorere (RURA), Anthony Kulamba, yavuze ko hari kurebwa uburyo abagenzi bashaka kujya mu ntara bafashwa byihuse ku buryo nta kibazo bagirira mu nzira.

Ubwinshi bw’abagenzi bari muri Gare ya Nyabugogo bwari bwateye impungenge ko bushobora kuba intandaro yo kwanduzanya icyorezo cya Coronavirus cyane ko wasangaga bigoye ko abantu bahana intera kubera umubyigano wari uhari.

Imodoka zijya mu Ntara y'Amajyepfo n'ibice bimwe by'iy'u Burengerazuba zatangiye guhagurukira kuri stade i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .