Kigali: Abagore 150 bari guhabwa amahugurwa agamije kububakira ubushobozi

Yanditswe na Iradukunda Serge
Kuya 19 Gashyantare 2020 saa 08:39
Yasuwe :
0 0

Banki ya Kigali ifatanyije n’Umuryango Resonate n’Umushinga w’Umujyi wa Kigali uzwi nka Agaseke byatangije amahugurwa agamije kongerera abagore 150 b’Abanyarwanda ubumenyi mu miyoborere, kwiteza imbere n’uburyo bakorana n’amabanki.

Aya mahugurwa yagenewe abagore bari muri koperative eshatu zisanzwe zikorana n’umushinga Agaseke yatangiye ku wa 18 Gashyantare 2020 akazamara ibyumweru bitatu.

Ku ikubitiro yatangiriye ku bagore 50 bo muri Koperative ya ‘Injishi’ iboha uduseke n’iya ‘Tujye mbere’ ikora imirimo y’ubukorikori.

Umuyobozi w’Umushinga Resonate mu Rwanda ari nawo uri gutanga aya mahugurwa, Norette Turimuci, yavuze ko ubumenyi buri gutangwa bugamije gukuraho imbogamizi abagore bagiraga mu guteza imbere amakoperative yabo.

Ati “Mu gukuraho imbogamizi ziri mu iterambere ry’abagore nk’abari mu bucuruzi cyangwa ba rwiyemezamirimo bisaba uburyo bukomatanyije. Ibi bishobora kugerwaho hahuzwa amahugurwa y’ubumenyi buri tekiniki n’ubw’ishoramari burimo ubujyanye n’ubuyobozi, gufata ibyemezo no kwishyiriraho intego no kubaha uburyo bworoshye bwo kugera kuri serivisi z’imari. Uru ruhurirane rukemura imbogamizi abagore bahura nazo igihe bari kugerageza guteza imbere koperative zabo”

Yakomeje avuga ko kubakira ubushobozi umugore bigira inyungu kuri bo, imiryango yabo n’igihugu.

Yagize ati “Uko aba bagore bagenda barushaho kugira ubushobozi mu bijyanye n’amafaranga bakabasha kwishyurira abana babo amashuri, bigira inyungu ku bana babo n’umuryango wabo n’igihugu cyose muri rusange.”

Aya mahugurwa kandi azibanda ku nyigisho zigamije kuzamura icyizere abagore bigirira berekwa ko bashoboye kimwe n’abagabo.

Umukozi wa Banki ya Kigali ushinzwe Itumanaho, Umulinga Dahlia, yagarutse ku mpamvu yatumye nka banki bahitamo gutera inkunga aya mahugurwa.

Ati “Aya mahugurwa twayabonye nk’uburyo bwatuma abari n’abategarugori bazamuka mu mibereho, niyo mpamvu twateye inkunga iki gikorwa. Ubusanzwe mu bikorwa bya Banki ya Kigali harimo no guhindura ubuzima bw’abatugana n’ubw’Abanyarwanda muri rusange.”

Yavuze ko bizeye ko aya mahugurwa azahindura uburyo abagore bari basanzwe bakoramo ibikorwa byabo akanabafasha kwiteza imbere.

Ati “Nyuma y’aya mahugurwa bano bategarugori tubitezeho ko bazabasha kugira ibikorwa byiza mu makoperative barimo bakaba bakora ibikorwa bizabateza imbere. Turabizi ko iyo umugore ateye imbere aba ateje imbere umuryango we n’igihugu muri rusange. Tubitezeho rero cyane ko ubumenyi bahawe buzabateza imbere mu bijyanye n’ibikorwa bakoraga ndetse bakaba bafite ubumenyi buhamye.”

Umuyobozi wa Koperative Injishi akaba n’umwe mu bitabiriye aya mahugurwa, Kanyange Domina, yavuze ko hari byinshi bigiyemo byongeye kubaremamo icyizere.

Ati “Ni amahugurwa yagiye atwibutsa aho twavuye, aho tugeze ndetse tunaganira ku ntumbero dufite, ni amahugurwa yabaye meza cyane, hari ukuntu amakoperative agera aho ukabona harimo abagenda bacika intege ariko yongeye atwongeramo imbaraga.”

Mu cyumweru cya mbere aya mahugurwa yabereye ku Biro by’Umurenge wa Gisozi. Akurikiraho azabera ku Biro by’Akagari ka Kimisagara mu gihe hazaheruka azabera muri Gatsata Business Center.

Umuhango wo kuyasoza ku mugaragaro uzaba ku wa 6 Werurwe 2020, uzahuza abagore 150 bazaba barahuguwe muri iyi gahunda.

Imibare ya Resonate yerekana ko mu yandi mahugurwa bagiye bakora bagamije kongerera ubushobozi umugore mu 2019 yasize abagore bagera kuri 70% bafashe inshingano mu bijyanye no kuyobora, 46% bo batangira ibikorwa by’ubucuruzi, mu gihe 31% bo bazamutse mu rwego rw’akazi n’amashuri.

Umuyobozi w’Umushinga Resonate mu Rwanda, Norette Turimuci, yaganirije abagore ku gukuraho imbogamizi ziri mu nzira z'ibyo bakora
Mu gihe cy'ibyumweru bitatu aba bagore bazahabwa inyigisho ziganjemo izizabafasha kumva ko bashoboye
Umukozi wa Banki ya Kigali ushinzwe Itumanaho, Umulinga Dahlia, yavuze ko biteze ko aya mahugurwa azafasha aba bagore kwigira, guteza imbere imiryango yabo n'igihugu muri rusange
Mu cyumweru cya mbere habanje guhugurwa abagore 50 baturutse muri koperative ebyiri
Aba bagore bagira umwanya wo kujya mu matsinda bakungurana ibitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza